പ്രത്യേക ക്വാട്ട ഉണ്ടായിട്ടും മിഡിൽ അല്ലെങ്കിൽ അപ്പർ ബെർത്തുകൾ ലഭിക്കുന്നതിലെ നിരാശ ചിലപ്പോഴെങ്കിലും മുതിർന്നവരും പ്രായമായവരും പങ്കുവയ്ക്കാറുള്ളതാണല്ലോ? എന്നാൽ ഇതിന് പരിഹാരമുണ്ട്. വാസ്തവം എന്താണെന്നാൽ നമുക്ക് മിക്കവർക്കും ഇക്കാര്യം അറിയില്ല എന്നതാണ്. റെയിൽവേയുടെ ഓട്ടോമേറ്റഡ് ബുക്കിംഗ് സംവിധാനം സംബന്ധിച്ച അത്ര അറിയപ്പെടാത്ത ഒരു നിയമം ഇപ്പോൾ വൈറലായ ഒരു വീഡിയോയിലൂടെ ഒരു ട്രാവലിംഗ് ടിക്കറ്റ് എക്സാമിനർ (TTE) വിശദീകരിക്കുന്നത് അടുത്തിടെ സമൂഹമാധ്യമങ്ങളിൽ വൈറലായിരുന്നു.

ലോവർ ബെർത്ത് (LB) ക്വാട്ട മുതിർന്ന പൗരന്മാർക്ക് ലഭിക്കുന്നതിന് ഗ്രൂപ്പ് ബുക്കിംഗിന് റെയിൽവേ ഏർപ്പെടുത്തിയ കർശനമായ നിയമമാണ് വീഡിയോയിൽ വ്യക്തമാക്കുന്നത്.

ദിബ്രുഗഡ്-രാജ്ധാനി എക്സ്പ്രസിൽ ചിത്രീകരിച്ചതെന്ന് കരുതുന്ന 36 സെക്കൻഡ് ദൈർഘ്യമുള്ള വീഡിയോയിൽ, ഒരേ ടിക്കറ്റിൽ ബുക്ക് ചെയ്ത നാല് മുതിർന്ന പൗരന്മാർക്ക് ലോവർ ബെർത്ത് അനുവദിക്കാത്തതിന്റെ കാരണം TTE യാത്രക്കാരോട് വിശദീകരിക്കുന്നുണ്ട്. TTEയുടെ അഭിപ്രായത്തിൽ, സീനിയർ സിറ്റിസൺ ക്വാട്ട പ്രകാരം ലോവർ ബെർത്ത് ലഭിക്കാൻ ടിക്കറ്റിലുള്ള യാത്രക്കാരുടെ എണ്ണം സംബന്ധിച്ച് റെയിൽവേ കർശനമായ നിയമം പാലിക്കുന്നുണ്ട്.

പരമാവധി രണ്ട് യാത്രക്കാർ: ലോവർ ബെർത്തിനായുള്ള സീനിയർ സിറ്റിസൺ ക്വാട്ട ആനുകൂല്യം ലഭിക്കാൻ, ഒരു ടിക്കറ്റിൽ പരമാവധി രണ്ട് യാത്രക്കാർക്ക് മാത്രമേ ബുക്കിംഗ് നടത്താൻ പാടുള്ളൂ.

ALSO READ: ലിഥിയം ബാറ്ററികള്‍, പവര്‍ ബാങ്കുകള്‍ എന്നിവ കൊണ്ടുവരുന്നതിന് പുതിയ നിര്‍ദ്ദേശങ്ങള്‍ പുറപ്പെടുവിച്ച് ഒമാന്‍ എയര്‍ 

സിസ്റ്റം ക്വാട്ടയെ മറികടക്കും: ഒരു ടിക്കറ്റിൽ മൂന്നോ നാലോ യാത്രക്കാർക്ക് വേണ്ടിയുള്ള ബുക്കിംഗ് ശ്രമിക്കുമ്പോൾ, സീനിയർ സിറ്റിസൺ ക്വാട്ടയുടെ ആനുകൂല്യം റെയിൽവേയുടെ ഓട്ടോമേറ്റഡ് സിസ്റ്റം നഷ്ടപ്പെടുത്തും. തുടർന്ന്, ഈ റിസർവേഷൻ ഒരു ജനറൽ ക്വാട്ട ബുക്കിംഗായി കണക്കാക്കി ലഭ്യത അനുസരിച്ച് സീറ്റുകൾ അനുവദിക്കും.

രണ്ടിൽ കൂടുതൽ മുതിർന്ന പൗരന്മാർക്ക് ലോവർ ബെർത്തുകൾ ആവശ്യമുണ്ടെങ്കിൽ, ഓരോ ടിക്കറ്റിലും രണ്ട് യാത്രക്കാരെ മാത്രം ഉൾപ്പെടുത്തി റിസർവേഷനെ പ്രത്യേക ടിക്കറ്റുകളായി വിഭജിക്കണം എന്ന് TTE നിർദ്ദേശിച്ചു. ഇത് ലോവർ ബെർത്തുകൾ ലഭിക്കാനുള്ള സാധ്യത വർദ്ധിപ്പിക്കും.

ഇന്ത്യൻ റെയിൽവേ കാറ്ററിംഗ് ആൻഡ് ടൂറിസം കോർപ്പറേഷനും (IRCTC) ഈ ബുക്കിംഗ് യുക്തി മുമ്പ് സ്ഥിരീകരിച്ചിട്ടുണ്ട്. 'X' പ്ലാറ്റ്‌ഫോമിൽ ഒരു ഉപയോക്താവിന്റെ സമാനമായ ചോദ്യത്തിന് മറുപടി നൽകവേയാണ് IRCTC ഇക്കാര്യം വ്യക്തമാക്കിയത്.

60 വയസ്സോ അതിൽ കൂടുതലോ പ്രായമുള്ള പുരുഷന്മാരേയും 45 വയസ്സോ അതിൽ കൂടുതലോ പ്രായമുള്ള സ്ത്രീകളേയുമാണ് ഇന്ത്യൻ റെയിൽവേ സീനിയർ സിറ്റിസൺസായി പരി​ഗണിക്കുന്നത്.

ക്വാട്ട വ്യവസ്ഥ: യോഗ്യരായ മുതിർന്ന പൗരന്മാർ ഒറ്റയ്ക്കോ അല്ലെങ്കിൽ ഒരേ ടിക്കറ്റിൽ മറ്റൊരു മുതിർന്ന പൗരനൊപ്പം യാത്ര ചെയ്യുമ്പോഴോ മാത്രമേ ഈ ഇളവ് നൽകൂ.

ജനറൽ ക്വാട്ട: ടിക്കറ്റിൽ രണ്ടിൽ കൂടുതൽ യാത്രക്കാരുണ്ടെങ്കിലോ, ഒരു മുതിർന്ന പൗരൻ മുതിർന്ന പൗരനല്ലാത്ത ഒരാളോടൊപ്പം യാത്ര ചെയ്യുകയാണെങ്കിലോ, സിസ്റ്റം ടിക്കറ്റ് ജനറൽ ക്വാട്ടയ്ക്ക് കീഴിൽ ബുക്ക് ചെയ്യും. അത്തരം സന്ദർഭങ്ങളിൽ ലോവർ ബെർത്തിന് യാതൊരു ഉറപ്പും ലഭിക്കില്ല.

Indian Railways offers special provisions to help senior citizens get lower berths while booking tickets. By selecting the senior citizen quota or the lower berth option during reservation, elderly passengers can significantly increase their chances of getting a confirmed lower berth.