മുംബൈ: 2026 ഐ.പി.എൽ. മെഗാ ലേലത്തിന് മുന്നോടിയായി കൊൽക്കത്ത നൈറ്റ് റൈഡേഴ്‌സ് (കെ.കെ.ആർ.) അവരുടെ സൂപ്പർ ഓൾറൗണ്ടർ ആന്ദ്രെ റസ്സലിനെ ഒഴിവാക്കിയ നടപടിയിൽ അമ്പരന്നതായി മുൻ ഇന്ത്യൻ ക്രിക്കറ്റ് താരം ഇർഫാൻ പത്താൻ. 12 കോടി രൂപയ്ക്ക് 2025 സീസണിൽ നിലനിർത്തിയ റസ്സലിനെ പെട്ടെന്ന് ഒഴിവാക്കിയത് അപ്രതീക്ഷിതമാണെന്ന് പത്താൻ തുറന്നടിച്ചു.

 കെ.കെ.ആർ. ചെയ്തത് വലിയ അബദ്ധം

വർഷങ്ങളോളം കെ.കെ.ആറിന് വേണ്ടി ഒറ്റക്ക് മാച്ച് വിന്നിങ് പ്രകടനങ്ങൾ നടത്തിയ താരമാണ് റസ്സൽ. പരിക്കുകളും മോശം ഫോമും ഉണ്ടായിരുന്നെങ്കിൽ പോലും റസ്സലിന് പിന്തുണ നൽകേണ്ടതായിരുന്നുവെന്ന് പത്താൻ തൻ്റെ യൂട്യൂബ് ചാനലിൽ സംസാരിക്കവെ അഭിപ്രായപ്പെട്ടു.

"എന്നെ ശരിക്കും ഞെട്ടിച്ച പല പ്രമുഖ താരങ്ങളെയും റിലീസ് ചെയ്തു. അതിൽ ഏറ്റവും വലിയ പേര് ആന്ദ്രെ റസ്സലിൻ്റേതാണ്. അദ്ദേഹം കെ.കെ.ആറിൽ ഇല്ല എന്നത് വലിയ അത്ഭുതം തന്നെയാണ്. പരിക്കിൻ്റെ ആശങ്കകളും കഴിഞ്ഞ വർഷം ഫോമില്ലായ്മയും ഉണ്ടായിരുന്നു. പക്ഷേ, വർഷങ്ങളായി അദ്ദേഹം നിങ്ങൾക്ക് വേണ്ടി എത്രയോ കളികൾ വിജയിപ്പിച്ചു തന്നു. 14 മത്സരങ്ങളിലും അദ്ദേഹം കളിക്കില്ല എന്ന് ഉറപ്പുണ്ടെങ്കിൽ അത് വേറെ കാര്യം. പക്ഷെ എൻ്റെ അഭിപ്രായത്തിൽ തീർച്ചയായും അദ്ദേഹത്തെ പിന്തുണയ്ക്കാമായിരുന്നു. വർഷങ്ങളോളം പിന്തുണച്ച കെ.കെ.ആർ ഈ നിർണായക ഘട്ടത്തിൽ അങ്ങനെ ചെയ്തില്ല. റസ്സലിൻ്റെ കഴിവുകളുള്ള ഒരു പകരക്കാരനെ കണ്ടെത്തുക അവർക്ക് ബുദ്ധിമുട്ടായിരിക്കും."

കെ.കെ.ആറിനായി 133 ഐ.പി.എൽ. മത്സരങ്ങളിൽ നിന്ന് 174.97 എന്ന ഞെട്ടിക്കുന്ന സ്ട്രൈക്ക് റേറ്റിൽ 2593 റൺസും 122 വിക്കറ്റുകളും റസ്സൽ നേടിയിട്ടുണ്ട്. 2024-ൽ കെ.കെ.ആർ. കിരീടം നേടിയപ്പോഴും 222 റൺസും 19 വിക്കറ്റും നേടി അദ്ദേഹം നിർണായക പങ്ക് വഹിച്ചു.

പതിരനയുടെ റിലീസും അമ്പരപ്പിച്ചു

അഞ്ചു തവണ ചാമ്പ്യൻമാരായ ചെന്നൈ സൂപ്പർ കിംഗ്‌സിൻ്റെ (സി.എസ്.കെ.) മറ്റൊരു വലിയ റിലീസായ മതീഷ പതിരനയുടെ കാര്യത്തിലും ഇർഫാൻ പത്താൻ അത്ഭുതം പ്രകടിപ്പിച്ചു. മറ്റ് പദ്ധതികൾ ഇല്ലെങ്കിൽ പതിരനയെ റിലീസ് ചെയ്തത് യുക്തിക്ക് നിരക്കുന്നതല്ലെന്നാണ് പത്താൻ്റെ പക്ഷം.

"കണ്ടെത്താൻ പ്രയാസമുള്ള ആ പ്രത്യേക കഴിവ് പതിരനയ്ക്കുണ്ട്. ആ സ്ലിംഗിംഗ് ആക്ഷനിലൂടെ കൃത്യമായ യോർക്കറുകൾ എറിയാനുള്ള അദ്ദേഹത്തിൻ്റെ ശേഷി അപാരമാണ്. കുറഞ്ഞ വിലയ്ക്ക് തിരികെ വാങ്ങാൻ വേണ്ടിയാണ് ഈ റിലീസെങ്കിൽ മനസ്സിലാക്കാം, അല്ലെങ്കിൽ അവർ മറ്റൊരാളെ നോക്കുകയും ഇദ്ദേഹത്തെ വേണ്ടെന്ന് വെയ്ക്കുകയും ചെയ്തിട്ടുണ്ടെങ്കിൽ മാത്രമേ ഈ തീരുമാനത്തിന് അർത്ഥമുള്ളൂ."

കഴിഞ്ഞ സീസണിൽ 10.13 എക്കണോമിയിൽ 13 വിക്കറ്റുകൾ നേടിയ പതിരന സി.എസ്.കെയ്ക്കായി സ്ഥിരതയാർന്ന പ്രകടനമാണ് കാഴ്ചവെച്ചത്. 2023-ൽ സി.എസ്.കെ. കിരീടം നേടിയപ്പോഴും 12 മത്സരങ്ങളിൽ നിന്ന് 19 വിക്കറ്റുകളെടുത്ത് താരം നിർണായകമായിരുന്നു.

വമ്പൻ താരങ്ങളെ ഒഴിവാക്കിയ ഈ തീരുമാനങ്ങൾ ലേലത്തിന് മുന്നോടിയായുള്ള ഫ്രാഞ്ചൈസികളുടെ തന്ത്രമാണെങ്കിലും, ഇത്തരം മാച്ച് വിന്നർമാരെ നഷ്ടപ്പെടുത്തുന്നത് ടീമുകൾക്ക് വലിയ തിരിച്ചടിയാകുമെന്നും ഇർഫാൻ പത്താൻ കൂട്ടിച്ചേർത്തു.