തൃശ്ശൂർ: പട്ടാപ്പകൽ അംഗൻവാടി അധ്യാപികയുടെ കണ്ണിൽ മുളകുപൊടി എറിഞ്ഞ് മൂന്ന് പവൻ സ്വർണമാല കവർച്ച ചെയ്യാൻ ശ്രമിച്ച കേസിൽ മൂന്ന് പ്രതികൾ പൊലിസ് പിടികൂടി. മാള സ്വദേശിനി അഞ്ജന (22), കൂട്ടാളികളായ ജീസൻ (18), ഒരു 17-കാരൻ എന്നിവരാണ് മണിക്കൂറുകൾക്കുള്ളിൽ അറസ്റ്റിലായത്.

കവർച്ചയ്ക്ക് പിന്നിൽ പരിചയം

മാളയിലെ അംഗൻവാടി അധ്യാപികയായ മോളി ജോർജിനെ ആക്രമിച്ചതിന് പിന്നിൽ പരിചയക്കാരിയായ അഞ്ജനയുടെ ബുദ്ധിയായിരുന്നു. അഞ്ജനയുടെ കുട്ടി പഠിക്കുന്നത് മോളി ടീച്ചറുടെ അം​ഗൻവാടിയിലാണ്. കുട്ടിയെ കൂട്ടാൻ വന്നപ്പോഴാണ് മോളിയുടെ കഴുത്തിലെ സ്വർണമാല അഞ്ജനയുടെ ശ്രദ്ധയിൽപ്പെട്ടത്. പെട്ടെന്ന് പണമുണ്ടാക്കുക എന്ന ലക്ഷ്യത്തോടെ ഇൻസ്റ്റഗ്രാം വഴി പരിചയപ്പെട്ട രണ്ട് യുവാക്കളെ കൂട്ടുപിടിച്ച് കവർച്ച ആസൂത്രണം ചെയ്യുകയായിരുന്നു.

ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന മോളി ജോർജിനെ മൂവർ സംഘം ബൈക്കിൽ പിന്തുടർന്നു. സമീപത്തെത്തിയപ്പോൾ സംഘത്തിലെ ഒരാൾ കണ്ണിൽ മുളകുപൊടി എറിഞ്ഞ് ടീച്ചറെ ആക്രമിച്ചു. ഈ സമയം മറ്റൊരാൾ കഴുത്തിൽ നിന്നും മാല പൊട്ടിച്ചെടുത്തു. കവർച്ച നടത്തിയ ശേഷം ബൈക്കിൽ പാഞ്ഞ പ്രതികൾ ചാലക്കുടിയിലെ ഒരു ജ്വല്ലറിയിൽ മാല വിൽക്കാൻ ശ്രമിച്ചെങ്കിലും നടന്നില്ല. പരിഭ്രാന്തരായി മാളയിലേക്ക് മടങ്ങിയെത്തിയപ്പോഴാണ് പൊലിസ് വലയിൽ വീണത്.

മോളി ജോർജിന്റെ പരാതി ലഭിച്ച ഉടൻ മാള പൊലിസ് ഊർജ്ജിതമായി അന്വേഷണം ആരംഭിച്ചു. സംഭവസ്ഥലത്തെ സിസിടിവി ദൃശ്യങ്ങൾ പരിശോധിച്ചതിൽ പ്രതികളുടെ ബൈക്കിൻ്റെ രജിസ്ട്രേഷൻ നമ്പർ ലഭിച്ചു. മാള എസ്.ഐ.യുടെ നേതൃത്വത്തിൽ മാള-ചാലക്കുടി മേഖലകളിൽ നടത്തിയ വ്യാപകമായ അന്വേഷണത്തിലാണ് മണിക്കൂറുകൾക്കകം പ്രതികളെ പിടികൂടിയത്. അറസ്റ്റിലായ അഞ്ജനയുടെ കുട്ടിയാണ് മോളി ടീച്ചറുടെ അം​ഗൻവാടിയിൽ പഠിക്കുന്നതെന്ന വിവരം പൊലിസാണ് വെളിപ്പെടുത്തിയത്.

അറസ്റ്റ് ചെയ്ത പ്രതികളെ കോടതിയിൽ ഹാജരാക്കി റിമാൻഡ് ചെയ്തു. പ്രായപൂർത്തിയാകാത്ത പ്രതിയെ ജുവനൈൽ ഹോമിലേക്ക് മാറ്റി. മോഷണശ്രമം, പൊതുസ്ഥലത്ത് ആക്രമണം തുടങ്ങിയ വകുപ്പുകളാണ് പ്രതികൾക്കെതിരെ ചുമത്തിയിരിക്കുന്നത്. ജോലി കഴിഞ്ഞ് മടങ്ങുന്ന സ്ത്രീകൾ നേരിടുന്ന സുരക്ഷാ വെല്ലുവിളികളെ ഓർമ്മിപ്പിക്കുന്ന ഈ സംഭവം പ്രദേശവാസികൾക്കിടയിൽ ആശങ്കയുണ്ടാക്കിയിട്ടുണ്ട്.