ദോഹ: പുതിയ കാർഷിക സീസണെ വരവേല്‍ക്കാനായി ഖത്തറിലെ പ്രാദേശിക ഫാമുകള്‍ ഒരുക്കം പൂര്‍ത്തിയാക്കി. ഈ വര്‍ഷം കാർഷിക ഉല്‍പാദനം 5 മുതല്‍ 10 ശതമാനം വരെ ഉയരുമെന്നാണ് മുനിസിപ്പാലിറ്റി മന്ത്രാലയത്തിന്റെ റിപ്പോര്‍ട്ട്. അനുകൂല കാലവസ്ഥയും സര്‍ക്കാര്‍ നല്‍കുന്ന പിന്തുണയും ഈ വളര്‍ച്ചയ്ക്ക് സഹാകമാണെന്ന് വിലയിരുത്തുന്നു.

മന്ത്രാലയം ഫാമുകള്‍ക്കാവശ്യമായ ഗുണമേന്മയുളള വിത്തുകളും, രാസവളങ്ങളും, കീടനാശിനികളും കൂപ്പണ്‍ സംവിധാനം വഴി നല്‍കുന്നു. കൂടാതെ നിലം തയ്യാറാക്കല്‍, ലെവലിംഗ് എന്നിവക്കും മൂന്ന് പ്രവര്‍ത്തി ദിവസത്തിനകം സര്‍ക്കാര്‍ സഹായിക്കുന്നു. കൃഷി സംബന്ധിച്ച നിര്‍ദേശങ്ങള്‍ നല്‍കുവാന്‍ മന്ത്രാലയത്തിലെ കാര്‍ഷിക വിദഗ്ധര്‍ നിരന്തരം ഫാം സന്ദര്‍ശനവും നടത്തുന്നു.

ALSO READ: സ്വകാര്യ കമ്പനികൾക്ക് അന്ത്യശാസനം: ഡിസംബറോടെ സ്വദേശിവൽക്കരണ ലക്ഷ്യം പൂർത്തിയാക്കണം; 2026 ജനുവരി മുതൽ പിഴ

ഉല്‍പ്പാദനം മെച്ചപ്പെടുത്താന്‍ ഗ്രീന്‍ഹൗസുകളും നിയന്ത്രിത അന്തരീക്ഷ കൃഷികളും കൂടുതല്‍ ഫാമുകള്‍ സ്വീകരിക്കുകയാണ്. ഇതുവഴി ചൂടുകാലത്തും കൃഷിയുടെ ചെലവ് കുറയ്ക്കാനും ഗുണമേന്മ ഉറപ്പാക്കാനാകുമെന്ന് അധികൃതര്‍ പറയുന്നു.

ഈ വര്‍ഷം പല വിളകളുടെയും വിത്ത് പാകല്‍ നേരത്തെ ആരംഭിച്ചതോടെ കക്കിരി, സുചിനി, വഴുതന, ഇലക്കറികള്‍ എന്നിവയുടെ വിളവെടുപ്പ് ഇതിനകം തന്നെ വിപണിയില്‍ എത്തിയിട്ടുണ്ട്. തക്കാളികളുള്‍പ്പെടെ കൂടുതല്‍ പച്ചക്കറികള്‍ ഉടന്‍ വിപണിയില്‍ ലഭ്യമാകുമെന്നാണ് റിപ്പോര്‍ട്ട്.

പ്രാദേശിക പച്ചക്കറികളുടെ പുതുമയും ഗുണനിലവാരവും ഉപഭോക്താക്കളുടെ വിശ്വാസം കൂട്ടുന്നുവെന്നും, ഇതുവഴി ഇറക്കുമതികളില്‍ നിന്നുളള ആശ്രയം കുറയ്ക്കാനാകുമെന്നും മന്ത്രാലയം വ്യക്തമാക്കി. ഖത്തറിന്റെ ദീര്‍ഘകാല ഭക്ഷ്യസുരക്ഷാ ലക്ഷ്യങ്ങള്‍ക്കായി കര്‍ഷകര്‍ക്ക് കൂടുതല്‍ പരിശീലനവും സാങ്കേതിക പിന്തുണയും നല്‍കുമെന്ന് അധികൃതര്‍ വ്യക്തമാക്കി.

Qatar's local farms are ready for the new agricultural season, with the Ministry of Municipality reporting an expected 5-10% increase in production this year, thanks to favorable weather conditions and government support.