പത്തനംതിട്ട: വൃത്തിഹീനമായ സാഹചര്യത്തില്‍ പ്രവര്‍ത്തിച്ചിരുന്ന ഹോട്ടലുകളില്‍ നിന്ന് പിഴ ഈടാക്കാന്‍ നഗരസഭ നോട്ടീസ് നല്‍കി. പന്തളം കടയ്ക്കാട് കുടുംബാരോഗ്യ കേന്ദ്രത്തിലേക്കുള്ള റോഡരികില്‍ അതിഥി തൊഴിലാളികള്‍ ലൈസന്‍സില്ലാതെ നടത്തിവന്ന ഹോട്ടലുകള്‍ക്കാണ് 10,000 രൂപവീതം പിഴ ഈടാക്കിയത്. 

അതിഥി തൊഴിലാളികള്‍ താമസിച്ചിരുന്ന കെട്ടിടത്തില്‍ പ്രവര്‍ത്തിച്ചിരുന്ന ഈ ഹോട്ടലുകള്‍ ഒന്നര ആഴ്ച്ച മുന്‍പ് ആരോഗ്യ വകുപ്പും, ഭക്ഷ്യസുരക്ഷ വകുപ്പ് വിഭാഗവും ചേര്‍ന്ന് പരിശോധന നടത്തി പൂട്ടിച്ചിരുന്നു. എന്നാല്‍ അധികൃതരുടെ കണ്ണുവെട്ടിച്ച് ഇവിടങ്ങളില്‍ വൈകുന്നേര ഹോട്ടലുകള്‍ പ്രവര്‍ത്തിച്ചെന്നാണ് പരാതി. തോന്നല്ലൂര്‍ സാബു ബില്‍ഡിങ്ങില്‍ ബംഗാള്‍ സ്വദേശികളായ താജ്മിര ഖാത്തൂന്‍, എസ്.കെ സുകുമാര്‍, ഡെലാവര്‍ ഹുസൈന്‍ എന്നിവര്‍ നടത്തിയ ഹോട്ടലുകള്‍ക്കെതിരായണ് നടപടി. 

ALSO READ: വീണ്ടും ആത്മഹത്യ; എസ്.ഐ.ആര്‍ ജോലി സമ്മര്‍ദം; വിവാഹ തലേന്ന് ബിഎല്‍ഒ ജീവനൊടുക്കി

വൃത്തിഹീനമായ സാഹചര്യത്തിലാണ് ഹോട്ടല്‍ പ്രവര്‍ത്തിച്ചിരുന്നത്. പരിശോധനയില്‍ പഴകിയ ചിക്കനും, മറ്റ് ഭക്ഷ്യവസ്തുക്കളും പിടിച്ചെടുത്തിട്ടുണ്ട്. മുഷിഞ്ഞ കര്‍ട്ടനിട്ട് മറച്ച ഭാഗത്താണ് പാചകം. ശുചിമുറിയില്‍ യൂറോപ്യന്‍ ക്ലോസറ്റില്‍വെച്ച് അരിപ്പയുപയോഗിച്ചാണ് ചിക്കന്‍ കഴുകിയിരുന്നത്. ഹോട്ടലിനകത്തേക്ക് കയറുമ്പോള്‍ തന്നെ കടുത്ത ദുര്‍ഗന്ധം വമിച്ചിരുന്നതായും ആരോഗ്യ വകുപ്പ് ഉദ്യോഗസ്ഥര്‍ കണ്ടെത്തിയിരുന്നു. കെട്ടിടത്തിലെ മുറികളും, പരിസരവും വൃത്തിഹീനമാണ്. ഹോട്ടലിലെ മാലിന്യം കെട്ടിടത്തിന്റെ പിന്‍ഭാഗത്തേക്കാണ് തള്ളിയിരുന്നത്. സുരക്ഷാക്രമീകരണങ്ങളില്ലാതെ പത്തോളം വാണിജ്യ സിലിണ്ടറുകളും കെട്ടിടത്തില്‍ സൂക്ഷിച്ചിരുന്നു.