മലപ്പുറം: 14-കാരിയെ ലൈംഗികാതിക്രമത്തിന് വിധേയനാക്കിയ പ്രതിയെ നാല് വർഷം കഠിനതടവിനും 5,000 രൂപ പിഴ അടക്കാനും ശിക്ഷിച്ച് നിലമ്പൂർ അതിവേഗ പോക്‌സോ സ്പെഷ്യൽ കോടതി വിധി. മുത്തേടം കാരപ്പുറം സ്വദേശി പുതുവായ് വിനോദിനെയാണ് (34) ജഡ്ജി കെ.പി. ജോയ് ശിക്ഷ വിധിച്ചത്. പിഴ തുക അടച്ചാൽ അത് അതിജീവിതയ്ക്ക് നൽകുമെന്നും, അടക്കാത്ത പക്ഷം പ്രതി രണ്ട് മാസവും രണ്ട് ആഴ്ചയും അധിക തടവ് അനുഭവിക്കണമെന്നും കോടതി ഉത്തരവിൽ വ്യക്തമാക്കി. 2024 ജൂൺ 16-നാണ് കേസിന് ആസ്പദമായ സംഭവം നടന്നത്. 

അന്വേഷണവും വിചാരണയും: 17 സാക്ഷികളെ വിസ്തരിച്ചു

അതിജീവിതയുടെയും കുടുംബത്തിന്റെയും പരാതിയുടെ അടിസ്ഥാനത്തിലാണ് പോത്തുകല്ല് പൊലിസ് സ്റ്റേഷൻ കേസ് രജിസ്റ്റർ ചെയ്തത്. സ്റ്റേഷൻ സബ്-ഇൻസ്പെക്ടർ കെ. സോമനാണ് പ്രധാന അന്വേഷണം നടത്തിയത്, സീനിയർ സിവിൽ പൊലിസ് ഓഫിസർ എം. ബിജിതയാണ് സഹായിച്ചത്. പ്രോസിക്യൂഷൻ വശത്ത് സ്പെഷ്യൽ പബ്ലിക് പ്രോസിക്യൂട്ടർ അഡ്വ. സാം കെ. ഫ്രാൻസിസ് ഹാജരായി. വിചാരണയിൽ 17 സാക്ഷികളെ വിസ്തരിച്ചു, 13 രേഖകളും ഹാജരാക്കി. പ്രോസിക്യൂഷൻ ലയിസൺ വിങ്‌ഗിലെ സീനിയർ സിവിൽ പൊലിസ് ഓഫിസർ പി.സി. ഷീബയും പ്രോസിക്യൂഷനെ സഹായിച്ചു. ശിക്ഷ വിധിക്കപ്പെട്ട ഉടൻ പ്രതിയെ തവനൂർ സെൻട്രൽ ജയിലിലേക്ക് കൈമാറി.

പ്രായപൂർത്തിയാകാത്ത കുട്ടികളെ പീഡിപ്പിക്കാൻ ശ്രമിച്ച യുവാവ് അറസ്റ്റിൽ

അതേസമയം, കഴിഞ്ഞ ദിവസങ്ങൾക്കിടെ പുറത്തുവന്ന മറ്റൊരു ഞെട്ടിക്കുന്ന വാർത്തയിൽ, പ്രായപൂർത്തിയാകാത്ത സ്കൂൾ വിദ്യാർഥിനികളെ പീഡിപ്പിക്കാൻ ശ്രമിച്ച യുവാവിനെ പൊലിസ് അറസ്റ്റ് ചെയ്തു. കരുളായ് തെക്കേമുണ്ട ആറാട്ടു തൊടി സ്വദേശി സുഹൈലിനെയാണ് (35) പ്രത്യേക കുറ്റാന്വേഷണ സംഘം  എടവണ്ണയിൽ നിന്ന് പോക്‌സോ വകുപ്പ് പ്രകാരം അറസ്റ്റ് ചെയ്തത്. കഴിഞ്ഞ നവംബർ 26, 27 തീയതികളിൽ നടന്ന സംഭവങ്ങളാണ് കേസിന് ആസ്പദം.

സ്കൂളിലേക്ക് പോകുന്ന കുട്ടികളെ തന്റെ ഗുഡ്സ് ഓട്ടോറിക്ഷയിൽ കയറ്റി പീഡിപ്പിക്കാൻ ശ്രമിച്ചെന്നാണ് പരാതി. കുട്ടികളുടെ ബന്ധുക്കൾ പൊലിസിന് നൽകിയ പരാതിയെത്തുടർന്ന് പൂക്കോട്ടുംപാടം പൊലിസ് സ്റ്റേഷൻ കേസ് രജിസ്റ്റർ ചെയ്തു.  പൂക്കോട്ടുംപാടം എസ്.ഐ.മാരായ ജെയിംസ് ജോൺ, ദിനേഷ് കുമാർ; എ.എസ്.ഐ. ജാഫർ; എസ്.സി.പി.ഓ. സിയാദ്; സി.പി.ഒ.മാരായ ഉമ്മർ ഫാറൂഖ്, സബ്‌ന; കുറ്റാന്വേഷണ സംഘത്തിലെ സീനിയർ സിവിൽ പൊലിസ് ഓഫിസർമാരായ സാബിറലി, സജീഷ്, സി.പി.ഒ.മാരായ സജേഷ്, കൃഷ്ണദാസ് എന്നിരടങ്ങിയ സംഘമാണ് അന്വേഷണം നടത്തിയത്.
ഈ സംഭവങ്ങൾ, കേരളത്തിലെ പ്രായപൂർത്തിയാകാത്ത കുട്ടികളോടുള്ള അതിക്രമങ്ങൾക്കെതിരായ സമൂഹത്തിന്റെ ജാഗ്രത വർധിപ്പിക്കേണ്ടതുണ്ടെന്ന സൂചന നൽകുന്നു.