കാൺപുർ: മദ്യപാനത്തിനായി പണം നൽകാത്തതിനെ തുടർന്ന് ഭർത്താവിന്റെ ക്രൂരമായ മർദനത്തിന് ഇരയായ യുവതി, വീട്ടിൽ നിന്നിറങ്ങിപ്പോയ ഭർത്താവിനെ വിഡിയോ കോൾ ചെയ്തുകൊണ്ട് ജീവനൊടുക്കി. യുപിയിലെ കാൺപുരിലാണ് ഈ ദാരുണ സംഭവം നടന്നത്. മോന എന്ന യുവതിയാണ് ആത്മഹത്യ ചെയ്തത്.

മോനയും ഭർത്താവ് ശുഭം ദിവാകറും പ്രണയിച്ച് വിവാഹം കഴിച്ചവരാണ്. ഇവർക്ക് രണ്ട് കുട്ടികളുണ്ട്. കാൺപുരിലെ റാവത്പുരിലെ രാംലാല മൊഹല്ല മേഖലയിലാണ് ഇവർ താമസിച്ചിരുന്നത്.സ്ഥിരമായി മദ്യപിക്കുന്ന സ്വഭാവമുള്ള ശുഭം ദിവാകർ, ബുധനാഴ്ച വൈകുന്നേരം വീട്ടിലെത്തി ഭാര്യ മോനയോട് മദ്യപാനത്തിനായി പണം ആവശ്യപ്പെട്ടു.പണം നൽകാൻ മോന വിസമ്മതിച്ചതോടെ, ശുഭം ഭാര്യയെ ക്രൂരമായി മർദിച്ചു. തുടർന്ന് മോനയുടെ കൈവശമുണ്ടായിരുന്ന പണം ബലമായി കൈക്കലാക്കിയ ശേഷം അയാൾ വീട്ടിൽ നിന്നിറങ്ങിപ്പോയി.

ഭർത്താവ് വീട്ടിൽ നിന്ന് പോയി 15 മിനിറ്റിനുശേഷം മോന, ശുഭമിനെ വാട്‌സാപ്പിൽ വീഡിയോ കോൾ ചെയ്തു. ഭർത്താവ് കണ്ടുകൊണ്ടിരിക്കെ മോന വീടിനകത്ത് തൂങ്ങിമരിക്കുകയായിരുന്നു.ഇത് കണ്ട് പരിഭ്രാന്തനായ ദിവാകർ ഉടൻ വീട്ടിലേക്ക് ഓടിയെത്തിയെങ്കിലും വാതിലുകളെല്ലാം അകത്തുനിന്ന് അടച്ച നിലയിലായിരുന്നു. വാതിൽ തകർത്ത് അകത്ത് കയറിയപ്പോഴേക്കും മോന മരണപ്പെട്ടിരുന്നു.സംഭവത്തെ തുടർന്ന് പൊലിസ് കേസെടുത്ത് അന്വേഷണം ആരംഭിച്ചിട്ടുണ്ട്.