മുംബൈ: ക്രിക്കറ്റ് ചരിത്രത്തിലെ അപൂർവ നേട്ടങ്ങളിലൊന്നാണ് 2025-ൽ ഇന്ത്യയിൽ ടെസ്റ്റ് പരമ്പര നേടിയ ദക്ഷിണാഫ്രിക്കൻ ക്യാപ്റ്റൻ ടെംബാ ബാവുമ (35) സ്വന്തമാക്കിയത്. ഹാൻസി ക്രോണിയയ്ക്ക് ശേഷം ഇന്ത്യൻ മണ്ണിൽ ടെസ്റ്റ് പരമ്പര നേടുന്ന ആദ്യ പ്രോട്ടീസ് നായകനായി മാറിയ ബാവുമയെ, ക്രിക്കറ്റ് ഇതിഹാസം എബി ഡിവില്ലിയേഴ്സ്, മുൻ ഇന്ത്യൻ നായകൻ എം.എസ്. ധോണിയുമായി താരതമ്യം ചെയ്തു.

"എം.എസ്. ധോണിക്കും ഇത് സമാനമായിരുന്നു. അദ്ദേഹത്തിന്റെ ശബ്ദം ഞാൻ ഒരിക്കലും ഉച്ചത്തിൽ കേട്ടിട്ടില്ല. വളരെ ശാന്തനായിരുന്നു, അധികം സംസാരിച്ചില്ല. പക്ഷേ സംസാരിച്ചപ്പോൾ, എല്ലാവരും ശ്രദ്ധിച്ചു. ടെംബയുടെ കാര്യത്തിലും ഇതുതന്നെയാണ് സംഭവിക്കുന്നതെന്ന്"ഡിവില്ലിയേഴ്സ് പറഞ്ഞു.

 ബാവുമയുടെ ഐതിഹാസിക വിജയം: 25 വർഷത്തെ 'ഇന്ത്യൻ ഭീതി'ക്ക് അന്ത്യം

 25 വർഷങ്ങൾക്ക് മുമ്പ്  ഇന്ത്യയിൽ നടന്ന 3 മത്സര ടെസ്റ്റ് പരമ്പരയിൽ 2-1നാണ് ദക്ഷിണാഫ്രിക്ക വിജയം നേടിയത്.പീന്നീട്  ദക്ഷിണാഫ്രിക്ക ഇന്ത്യൻ മണ്ണിൽ ഒരു ടെസ്റ്റ് പരമ്പര സ്വന്തമാക്കുന്നത് ടെംമ്പക്ക് കീഴിൽ ഇപ്പോഴാണ് 2-0ത്തിന്.ക്യാപ്റ്റനെന്ന നിലയിൽ 12 ടെസ്റ്റുകളിൽ 11 വിജയങ്ങളുമായി ബാവുമയുടെ റെക്കോർഡ് അത്ഭുതകരമാണ്.കൊൽക്കത്ത ടെസ്റ്റിൽ രണ്ടാം ഇന്നിങ്‌സിൽ 55 റൺസ് നേടി നാടകീയമായ ചേസിംഗിന് നേതൃത്വം നൽകിയ ബാവുമയാണ് 'പ്ലെയർ ഓഫ് ദി മാച്ച്' പുരസ്‌കാരം നേടിയത്.

 ഡിവില്ലിയേഴ്സിന്റെ 'ധോണി സ്റ്റൈൽ' നിരീക്ഷണം

മുൻ ദക്ഷിണാഫ്രിക്കൻ ക്യാപ്റ്റൻ എബി ഡിവില്ലിയേഴ്സ്, തന്റെ യൂട്യൂബ് ചാനലിലെ 'അശ്വിൻ' പോഡ്കാസ്റ്റിന്റെ പുതിയ എപ്പിസോഡിൽ ഇന്ത്യൻ സ്പിന്നർ രവിചന്ദ്രൻ അശ്വിനോട് സംസാരിക്കവെയാണ് ബാവുമയുടെ നായകത്വത്തെ പ്രശംസിച്ചത്."ഗ്രേം സ്മിത്തിന് ഉണ്ടായിരുന്നതുപോലെയുള്ള ദൃശ്യപ്രഭാവം ബാവുമയ്ക്കില്ല. വലിയ ശരീരഭാഷയോ ഭയപ്പെടുത്തുന്ന സാന്നിധ്യമോ അദ്ദേഹത്തിനില്ല," ഡിവില്ലിയേഴ്സ് പറഞ്ഞു."ടെംബ വളരെ ചെറുതാണ്. മൃദുവായി സംസാരിക്കുന്നു, ഒരിക്കലും ശബ്ദം ഉയർത്താറില്ല. വ്യത്യസ്ത ശൈലിയിലുള്ള ക്യാപ്റ്റൻസി വിജയിക്കുമെന്ന് ഇത് തെളിയിക്കുന്നു."

'പുസ്തകത്തിന്റെ പുറംചട്ട നോക്കി വിലയിരുത്തരുത്' എന്ന പഴമൊഴി ബാവുമയ്ക്ക് അന്വർത്ഥമാണെന്നും, ശാന്തതയിലൂടെയും കുറഞ്ഞ വാക്കുകളിലൂടെയും ധോണി നേടിയ വിജയങ്ങൾക്ക് സമാനമായ ശൈലിയാണ് ബാവുമയുടേതെന്നും ഡിവില്ലിയേഴ്സ് വിലയിരുത്തി.

ലോക ടെസ്റ്റ് ചാമ്പ്യൻഷിപ്പ് ഫൈനൽ നേട്ടം

ഈ വർഷം ജൂണിൽ ലോക ടെസ്റ്റ് ചാമ്പ്യൻഷിപ്പ് ഫൈനലിൽ ഓസ്ട്രേലിയയെ പരാജയപ്പെടുത്തി ഐ.സി.സി കിരീടം നേടിയതും ബാവുമയുടെ നേതൃത്വത്തിലാണ്.കേപ് ടൗണിൽ ജനിച്ച, 1.63 മീറ്റർ മാത്രം ഉയരമുള്ള ബാവുമയുടെ ഈ നേട്ടങ്ങൾ ക്രിക്കറ്റിലെ 'ഡേവിഡ് vs ഗോലിയാത്ത്' കഥയെ ഓർമ്മിപ്പിക്കുന്നു. ഡിവില്ലിയേഴ്സിന്റെ വാക്കുകളോടെ ബാവുമ ഇനി ലോകക്രിക്കറ്റിൽ 'ധോണി 2.0' എന്ന നിലയിലായിരിക്കും അറിയപ്പെടുക. ഈ താരതമ്യം, നിശബ്ദ നേതൃത്വത്തിന്റെ വിജയത്തിന് അടിവരയിടുന്നു.