ബല്ലിയ: വധൂവരന്‍മാരെ അനുഗ്രഹിക്കാന്‍ മത്സരിച്ചെത്തിയ ഒടുവില്‍ വിവാഹ വേദി തന്നെ തകര്‍ന്നു. ഉത്തര്‍പ്രദേശിലെ ബല്ലിയ ജില്ലയിലാണ് സംഭവം. സംഭവത്തിന്റെ വീഡിയോ സാമൂഹിക മാധ്യമങ്ങളില്‍ വൈറലായി. 

ബി.ജെ.പി നേതാവ് അഭിഷേക് സിങ് എഞ്ചിനീയറുടെ സഹോദരന്റെ വിവാഹച്ചടങ്ങിനിടെയായിരുന്നു സംഭവം. ബിജെപി ജില്ലാ പ്രസിഡന്റ് സഞ്ജയ് മിശ്ര, മുന്‍ എം.പി ഭരത് സിങ്, ബന്‍സ്ദിഹ് എം.എല്‍.എ കേതകി സിങ്ങിന്റെ പ്രതിനിധി വിശ്രാം സിങ്, മുന്‍ ജില്ലാ ജനറല്‍ സെക്രട്ടറി സുര്‍ജിത് സിങ്, മറ്റ് നിരവധി നേതാക്കള്‍ എന്നിവര്‍ വധൂവരന്മാരെ ആശിര്‍വദിക്കാന്‍ വേദിയിലേക്ക് കയറി. അഭിഷേക് സിങ്ങിന്റെ സഹോദരന്‍ ഓരോ നേതാവിന്റെയും കാലില്‍ തൊട്ട് വന്ദിക്കുന്നത് കാണാം. തുടര്‍ന്ന് എല്ലാവരും ഫോട്ടോക്ക് പോസ് ചെയ്യുമ്പോഴാണ് പ്ലൈവുഡ് കൊണ്ട് നിര്‍മിച്ച് വേദി തകര്‍ന്ന് വീഴുന്നത്. പ്രത്യേകം സജ്ജീകരിച്ച ഇരിപ്പിടത്തില്‍ ഇരിക്കുകയായിരുന്ന വധൂവരന്‍മാരുള്‍പ്പെടെ താഴേക്ക് പതിക്കുന്നതാണ് പുറത്തു വന്ന ദൃശ്യങ്ങളിലുള്ളത്.

ALSO READ: 'കുടുംബ രാഷ്ട്രീയത്തിന് വേദിയാകുന്നു' സത്യപ്രതിജ്ഞ ചെയ്ത് ഒരാഴ്ച പിന്നിടും മുമ്പേ ബിഹാര്‍ എന്‍.ഡി.എ ഘടകകക്ഷിയില്‍ പൊട്ടിത്തെറി, ഏഴ് നേതാക്കള്‍ രാജിവച്ചു

 ''വേദിക്ക് വേണ്ടത്ര ബലമുണ്ടായിരുന്നില്ല. ദമ്പതികളെ അനുഗ്രഹിക്കാന്‍ ഒരുപാട് കയറിയതാണ് പ്രശ്‌നമായത്'' ബി.ജെ.പി ജില്ലാ പ്രസിഡന്റ് സഞ്ജയ് മിശ്ര പറഞ്ഞു.

ആര്‍ക്കും ഗുരുതരമായ പരുക്കില്ല. മിക്കവര്‍ക്കും ചെറിയ മുറിവുകളും ചതവുകളും മാത്രമേ ഉണ്ടായിട്ടുള്ളൂവെന്നും റിപ്പോര്‍ട്ടുകള്‍ പറയുന്നു.