കുവൈത്ത് സിറ്റി: ട്രാവൽ ഏജന്റുമാരും ലൈസൻസില്ലാത്ത ബ്രോക്കർമാരും നടത്തുന്ന തട്ടിപ്പുകൾ തടയുന്നതിനായി നടപടികൾ ശക്തമാക്കി കുവൈത്ത് വ്യോമയാന അധികൃതർ. നിയമലംഘനങ്ങളെക്കുറിച്ചുള്ള പരാതികളും ആക്ഷേപങ്ങളും വർധിച്ചുവരുന്ന സാഹചര്യത്തിലാണ് അധികൃതരുടെ പുതിയ നീക്കം. സാമ്പത്തിക നഷ്ടങ്ങൾക്ക് കാരണക്കാരായ ട്രാവൽ ഓഫീസുകൾക്കും ലൈസൻസില്ലാത്ത ഓപ്പറേറ്റർമാർക്കുമെതിരെ സിവിൽ ഏവിയേഷനായുള്ള പബ്ലിക് അതോറിറ്റിയുടെ (DGCA) പരാതികളും ആർബിട്രേഷൻ കമ്മിറ്റിയും അടുത്തിടെ പിഴ ചുമത്തിയിരുന്നു.

നിയമലംഘകർക്കെതിരെ DGCA കർശനമായ നടപടികളാണ് സ്വീകരിക്കുന്നത്. സോഷ്യൽ മീഡിയ ലൈസൻസിംഗ് നിയമങ്ങൾ ലംഘിച്ചതിന് 66 ട്രാവൽ ഏജൻ്റുമാർക്കെതിരെ കമ്മിറ്റി നടപടിയെടുത്തിരുന്നു. ബിസിനസ് ലൈസൻസ് നിയന്ത്രണങ്ങൾ ലംഘിച്ച രണ്ട് വ്യക്തികൾ പ്രോസിക്യൂഷൻ നേരിടുന്നുമുണ്ട്. ഔദ്യോഗിക നിയമങ്ങൾ പാലിക്കാത്തതിന് അടുത്തിടെ എട്ട് ട്രാവൽ ഏജൻസികൾക്കും ഒരു എയർലൈനിനും പിഴ ചുമത്തുകയും ചെയ്തിരുന്നു.

വ്യാജ വെബ്സൈറ്റുകൾ, വ്യാജ പേയ്മെൻ്റ് ലിങ്കുകൾ, തെറ്റിദ്ധരിപ്പിക്കുന്ന പരസ്യങ്ങൾ തുടങ്ങിയ പുതിയ ഓൺലൈൻ തട്ടിപ്പ് രീതികൾ അതോറിറ്റി അതീവ ഗൗരവത്തോടെയാണ് നിരീക്ഷിക്കുന്നത്. വഞ്ചനാപരമായ ലിങ്കുകൾ പ്രവർത്തനരഹിതമാക്കാൻ കമ്മ്യൂണിക്കേഷൻസ് ആൻഡ് ഇൻഫർമേഷൻ ടെക്നോളജി റെഗുലേറ്ററി അതോറിറ്റിയുമായും ഇലക്ട്രോണിക് പേയ്മെൻ്റ് കമ്പനികളുമായും ഏകോപിച്ച് പ്രവർത്തിക്കുന്നതായി അധികൃതർ അറിയിച്ചു.

ALSO READ: ഇ-വിസ തട്ടിപ്പ് വ്യാപകം; മുന്നറിയിപ്പുമായി കുവൈത്തിലെ ഇന്ത്യൻ എംബസി 

വ്യാജ വിമാന ടിക്കറ്റുകൾ ഓൺലൈനായി വിൽക്കൽ, ലൈസൻസില്ലാത്ത ഇടനിലക്കാർ അധിക ഫീസ് ഈടാക്കൽ, അമിത വിലയ്ക്ക് വ്യാജ ഓഫറുകൾ പരസ്യം ചെയ്യൽ എന്നിവയാണ് സാധാരണയായി കണ്ടുവരുന്ന നിയമലംഘനങ്ങൾ.

നിരീക്ഷണ സംവിധാനങ്ങൾ ശക്തിപ്പെടുത്തി

വ്യോമഗതാഗത വകുപ്പ് ഡയറക്ടറും DGCA പരാതികളുടെയും ആർബിട്രേഷൻ കമ്മിറ്റിയുടെയും തലവനുമായ അബ്ദുല്ല അൽ-രാജ്ഹി കുനയോട് സംസാരിക്കവെ, അതോറിറ്റി 890 ലൈസൻസുള്ള ഓഫീസുകളുടെയും കമ്പനികളുടെയും പുതുക്കിയ ഡാറ്റാബേസ് പരിപാലിക്കുന്നുണ്ടെന്ന് വ്യക്തമാക്കി. ഇതിൽ 728 ട്രാവൽ ഏജൻസികൾ, 89 എയർ കാർഗോ ഓഫീസുകൾ, 73 എയർലൈനുകൾ എന്നിവ ഉൾപ്പെടുന്നു.

ലൈസൻസുള്ള ഓഫീസുകളെ നിരീക്ഷിക്കുകയും ലൈസൻസില്ലാത്ത സ്ഥാപനങ്ങൾ നടത്തുന്ന നിയമലംഘനങ്ങൾ അന്വേഷിക്കുകയും ചെയ്യുന്നതായി അധികൃതർ വ്യക്തമാക്കി. ലൈസൻസില്ലാത്ത യാത്രാ, ടൂറിസം ഏജൻസികളുടെ വെബ്സൈറ്റുകളും സോഷ്യൽ മീഡിയ അക്കൗണ്ടുകളും പ്രത്യേക DGCA സംഘം ദിവസവും നിരീക്ഷിക്കുന്നുണ്ട്. ജനുവരി 1-നും സെപ്റ്റംബർ 30-നും ഇടയിൽ മാത്രം എയർ ട്രാൻസ്പോർട്ട് പരാതി വകുപ്പിന് 3,012 പരാതികളാണ് ലഭിച്ചത്. ഇതിൽ വഞ്ചനയുമായി ബന്ധപ്പെട്ട കേസുകളും ഉൾപ്പെടുന്നു.

നിയമലംഘകർക്ക് സാമ്പത്തികവും ഭരണപരവുമായ പിഴകൾ ചുമത്തുകയും ലൈസൻസില്ലാത്ത ഓപ്പറേറ്റർമാരെ പബ്ലിക് പ്രോസിക്യൂഷൻ ഉൾപ്പെടെയുള്ള അന്വേഷണ അധികാരികൾക്ക് റഫർ ചെയ്യുകയും ചെയ്യും. ലൈസൻസുകൾ താൽക്കാലികമായി നിർത്തിവയ്ക്കൽ അല്ലെങ്കിൽ റദ്ദാക്കൽ തുടങ്ങിയ ശിക്ഷാ നടപടികളും ഉണ്ടാകും.

സർക്കാരിൻ്റെ ഏകീകൃത ഇലക്ട്രോണിക് സേവന ആപ്ലിക്കേഷനായ സാഹേൽ (Sahel) വഴി യാത്രക്കാരുടെ പരാതികൾ പരിഹരിക്കുന്നതിനും അന്വേഷണങ്ങളുടെ തുടർനടപടികൾ അറിയിക്കുന്നതിനും DGCA സൗകര്യമൊരുക്കിയിട്ടുണ്ട്. ലൈസൻസില്ലാത്ത ബ്രോക്കർമാർ ഉപഭോക്തൃ വിശ്വാസത്തെയും പ്രാദേശിക ടൂറിസം മേഖലയുടെ പ്രശസ്തിയെയും തകർക്കുന്നുമെന്ന് കുവൈത്ത് ട്രാവൽ ആൻഡ് ടൂറിസം ഏജൻസികളുടെ അസോസിയേഷൻ ചെയർമാൻ മുഹമ്മദ് അൽ-മുതൈരി വിമർശിച്ചു.

kuwait dgca strengthens surveillance against fraud, announcing strict measures, fines, and prosecution for travel agents and unlicensed operators to protect passengers.