മഞ്ചേരി: ബസുകളും ട്രെയിനുകളും കേന്ദ്രീകരിച്ചു കവര്‍ച്ച നടത്തുന്ന സംഘത്തിന്റെ തലവന്‍ മഞ്ചേരി പോലിസിന്റെ പിടിയിലായി. ഫറോക്ക് പാലക്കല്‍ പുതിയ വീട്ടില്‍ മുഹമ്മദ് കുട്ടി എന്ന ഡിങ്കന്‍ മമ്മുട്ടിയാണു പിടിയിലായത്. മഞ്ചേരി പാണായി സ്വദേശി ചാലില്‍ കിഴക്കേത്തൊടി അബൂബക്കറിന്റെ പരാതിയിലാണു പൊലിസ് പ്രതിയെ അറസ്റ്റ് ചെയ്തത്.
കന്നുകാലി കച്ചവടം നടത്തുന്ന പരാതിക്കാരന്റെ പണം തിരക്കുള്ള ബസില്‍ വെച്ചു പോക്കറ്റ് ബ്ലേഡ് ഉപയോഗിച്ച് കീറിയതിനു ശേഷം കൈക്കലാക്കുകയായിരുന്നു. മൂന്നാളുകള്‍ അടങ്ങിയ സംഘം തിരക്കുള്ള ബസുകളില്‍ ഒരാള്‍ പോക്കറ്റടിക്കുകയും പെട്ടെന്നു തന്നെ കൈമാറി പോകുകയുമാണ് ഇവര്‍ ചെയ്യുന്നത്.
പിടിയിലായ പ്രതിക്കു കോഴിക്കോട്, കസബ, നല്ലളം, പന്നിയങ്കര, എന്നിവിടങ്ങളിലും കോഴിക്കോട് റെയില്‍വേ പൊലിസിലും തമിഴ്‌നാട്ടിലെ കോയമ്പത്തൂര്‍, പഴനി സ്റ്റേഷനുകളിലും കേസുകള്‍ ഉണ്ട്. തിരൂര്‍ സ്റ്റേഷനില്‍ കഞ്ചാവ് വില്‍പനയുമായി ബന്ധപ്പെട്ട കേസ് വിചാരണയിലാണ്.
ഇയാളുടെ കൂട്ടാളികളെക്കുറിച്ച് വിവരം ലഭിച്ചിട്ടുണ്ടെന്നു പൊലിസ് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു. മഞ്ചേരി സി. ഐ ബിജുവിന്റെ നേതൃത്വത്തില്‍ എസ്.ഐ കൈലാസ് നാഥും ക്രൈം സ്‌ക്വാഡും ചേര്‍ന്നാണ് അന്വേഷണം നടത്തുന്നത്.