ലഖ്നൗ: വിവാഹാഭ്യർഥന തുടർച്ചയായി നിരസിച്ചതിന്റെ പകപോക്കലായി പെൺ സുഹൃത്തിനെ യുവാവ് വെടിവച്ച് കൊലപ്പെടുത്തി. ഉത്തർപ്രദേശിലെ ഗൗതംബുദ്ധ് നഗറിലെ നോയിഡയിലാണ് ഞെട്ടിക്കുന്ന സംഭവം നടന്നത്.

അംറോഹ സ്വദേശിനി സോനു (25) എന്ന യുവതിയെയാണ് ബിഹാർ സ്വദേശിയായ കൃഷ്ണ (26) എന്ന യുവാവ് കൊലപ്പെടുത്തിയത്. നോയിഡ ഫേസ്-2 മേഖലയിൽ പേയിങ് ഗസ്റ്റായി താമസിക്കുന്ന സോനുവിന്റെ മുറിയിലെത്തിയാണ് കൃഷ്ണ ആക്രമണം നടത്തിയത്.

പൊലിസ് സംഭവത്തെക്കുറിച്ച് വിവരിക്കുന്നത് ഇങ്ങനെയാണ് ഇരുവരും മുമ്പ് ഒരു ഫാക്ടറിയിൽ ഒരുമിച്ച് ജോലി ചെയ്തിരുന്നു. ആ സമയത്ത് പ്രണയത്തിലായി. പിന്നീട് ബന്ധം തുടർന്നിരുന്നെങ്കിലും കൃഷ്ണ സോനുവിനെ വിവാഹം കഴിക്കാൻ നിർബന്ധിച്ചു വരികയായിരുന്നു. സോനു ഇത് ആവർത്തിച്ച് നിരസിച്ചു. ഒടുവിൽ വീട്ടുജോലിക്ക് പോകാൻ തുടങ്ങിയ സോനു ബന്ധം പൂർണമായും അവസാനിപ്പിക്കാൻ തീരുമാനിച്ചു.

ഇന്നലെ വൈകിട്ട് സോനുവിന്റെ മുറിയിലെത്തിയ കൃഷ്ണ വീണ്ടും വിവാഹം ചെയ്യാൻ ആവശ്യപ്പെട്ടു. നിരസിക്കപ്പെട്ടതോടെ രോഷാകുലനായ ഇയാൾ പോക്കറ്റിലെ ഒളിപ്പിച്ചിരുന്ന തോക്കെടുത്ത് യുവതിയുടെ നെഞ്ചിലും തലയിലുമായി വെടിയുതിർത്തു. സോനു സംഭവസ്ഥലത്തുതന്നെ മരിച്ചു.

കൊലപാതകശേഷം കൃഷ്ണ സ്ഥലത്തുനിന്ന് പ്രതി രക്ഷപ്പെട്ടു. പ്രതിയെ പിടികൂടാനായി വിവിധ സംഘങ്ങളായി തിരച്ചിൽ ഊർജിതമാക്കിയതായി സെൻട്രൽ നോയിഡ ഡിസിപി ശക്തി മോഹൻ അവസ്ഥി അറിയിച്ചു.സോനുവിന്റെ മൊബൈൽ ഫോണും സമീപത്ത് കണ്ടെത്തിയ തോക്കും പൊലിസ് കസ്റ്റഡിയിലെടുത്തു. കേസ് രജിസ്റ്റർ ചെയ്ത് അന്വേഷണം തുടങ്ങി.