കുവൈത്ത് സിറ്റി: ഫർവാനിയയിലെ ഒരു വീട്ടിൽ അതിക്രമിച്ച് കയറി സ്വർണ്ണാഭരണങ്ങൾ മോഷ്ടിച്ച കേസിൽ രണ്ട് അറബ് പ്രവാസികളെ ഗവർണറേറ്റിലെ ക്രിമിനൽ ഇൻവെസ്റ്റിഗേഷൻ ഡിപ്പാർട്ട്‌മെൻ്റ് (CID) അറസ്റ്റ് ചെയ്തു. ഖൈത്താൻ ഇൻവെസ്റ്റിഗേഷൻ ഡിവിഷൻ്റെ ഊർജ്ജിതമായ അന്വേഷണത്തിനൊടുവിലാണ് ഇവരെ പിടികൂടിയത്.

സുരക്ഷാ വൃത്തങ്ങൾ നൽകുന്ന വിവരമനുസരിച്ച്, അതീവ വൈ​ദ​ഗ്ധ്യത്തോടെയാണ് മോഷ്ടാക്കൾ വീട്ടിൽ അതിക്രമിച്ചു കയറിയത്. വീടിനുള്ളിലെ നിരീക്ഷണ ക്യാമറകളിൽ സംഭവം പതിഞ്ഞെങ്കിലും, ദൃശ്യങ്ങൾക്ക് വ്യക്തത കുറവായിരുന്നത് പ്രതികളെ തിരിച്ചറിയുന്നതിന് തുടക്കത്തിൽ കാലതാമസം വരുത്തി. മോഷണത്തിന് ശേഷം ഇരുവരും സ്വർണ്ണാഭരണങ്ങളുമായി സംഭവസ്ഥലത്ത് നിന്ന് രക്ഷപ്പെടുകയായിരുന്നു.

മോഷ്ടിച്ച സ്വർണ്ണാഭരണങ്ങളെക്കുറിച്ച് ജ്വല്ലറികൾക്ക് വിവരം നൽകി അന്വേഷണം ഊർജിതമാക്കാൻ അന്വേഷണ ഉദ്യോഗസ്ഥർ ഉടൻ തന്നെ വിപുലമായ പദ്ധതി തയ്യാറാക്കി. ഈ നടപടിയാണ് പ്രതികളിലേക്ക് എത്താൻ സഹായിച്ചത്.

ALSO READ: പ്രവാസികൾക്ക് സന്തോഷവാർത്തയുമായി എയർ ഇന്ത്യ എക്സ്പ്രസ്: കുവൈത്തിൽ നിന്ന് കോഴിക്കോട്, കണ്ണൂർ സർവിസുകൾ ഉടൻ; ബുക്കിംഗ് ആരംഭിച്ചു 

“മോഷ്ടിച്ച ആഭരണങ്ങളുടെ ഒരു ഭാഗം വിൽക്കാൻ രണ്ട് വ്യക്തികൾ ശ്രമിച്ചതായി ഒരു ജ്വല്ലറി സ്റ്റോറിൽ നിന്ന് റിപ്പോർട്ട് ലഭിച്ചു,” ഒരു ഉദ്യോഗസ്ഥൻ പറഞ്ഞു. "പ്രതികളിലൊരാൾ മുഖംമൂടി ധരിച്ചാണ് കടയിൽ പ്രവേശിച്ചത്. എന്നാൽ മറ്റൊരാൾ മുഖം മറയ്ക്കാതെയാണ് അകത്തുകടന്നത്. ഇതാണ് പിന്നീട് ഇയാളെ തിരിച്ചറിയാൻ സഹായകമായത്."

മുഖം വ്യക്തമായിരുന്ന പ്രതിയെ സുരക്ഷാ ഉദ്യോഗസ്ഥർ ബയോമെട്രിക് ഫേഷ്യൽ റെക്കഗ്നിഷൻ സാങ്കേതികവിദ്യ ഉപയോഗിച്ച് ഉടൻ തന്നെ തിരിച്ചറിഞ്ഞു. തുടർന്ന് ഖൈത്താൻ പ്രദേശത്തെ വസതിയിൽ വെച്ച് ഇയാളെ അറസ്റ്റ് ചെയ്യുകയും ഇയാളുടെ കൂട്ടാളിയെക്കുറിച്ചുള്ള വിവരങ്ങൾ ശേഖരിക്കുകയും ചെയ്തു. കൂട്ടാളിയെയും അധികം വൈകാതെ പിടികൂടി. പ്രാഥമിക ചോദ്യം ചെയ്യലിൽ, അറബികളായ യുവാക്കൾ മോഷണം സമ്മതിച്ചു. സാമ്പത്തിക ബുദ്ധിമുട്ടുകളാണ് കുറ്റകൃത്യം ചെയ്യാൻ തങ്ങളെ പ്രേരിപ്പിച്ചതെന്നാണ് ഇരുവരും അവകാശപ്പെട്ടത്.

പരിഹരിക്കപ്പെടാത്ത മറ്റ് മോഷണ കേസുകളുമായി ഇവർക്ക് ബന്ധമുണ്ടോ എന്ന് കണ്ടെത്താൻ കൂടുതൽ അന്വേഷണം നടന്നുവരികയാണെന്ന് അധികൃതർ അറിയിച്ചു. കുറ്റവാളികളെ പിന്തുടരുന്നതിനും സ്വത്ത് സംരക്ഷിക്കുന്നതിനും ഫർവാനിയ ഗവർണറേറ്റിലുടനീളം സുരക്ഷ ശക്തിപ്പെടുത്തുന്നതിനും വേണ്ടിയുള്ള ആഭ്യന്തര മന്ത്രാലയത്തിൻ്റെ നിരന്തരമായ ശ്രമങ്ങളുടെ ഭാഗമായാണ് ഈ അറസ്റ്റ്.

an arab couple was arrested in farwaniya for allegedly committing theft while in disguise reportedly stating financial difficulties as the reason