സൗത്ത് ആഫ്രിക്കതിരായ ആദ്യ ഏകദിനത്തിൽ ഇന്ത്യ 17 റൺസിന്റെ വിജയമാണ് സ്വന്തമാക്കിയത്. റാഞ്ചിയിൽ നടന്ന മത്സരത്തിൽ ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ 50 ഓവറിൽ എട്ട് വിക്കറ്റ് നഷ്ടത്തിൽ 349 റൺസാണ് നേടിയത്. വിജയലക്ഷ്യം പിന്തുടർന്ന് സൗത്ത് ആഫ്രിക്കൻ ഇന്നിംഗ്സ് 49.2 ഓവറിൽ 332 റൺസിന്‌ ഓൾ ഔട്ട് ആവുകയായിരുന്നു. 

മത്സരശേഷം ടെസ്റ്റ് ക്രിക്കറ്റിലേക്ക് വീണ്ടും തിരിച്ചുവരുമോയെന്ന ചോദ്യത്തിന് ഇന്ത്യൻ താരം വിരാട് കോഹ്‌ലി മറുപടി നൽകിയിരുന്നു. ടെസ്റ്റിലേക്ക് തിരിച്ചുവരില്ലെന്നും ഒരു ഫോർമാറ്റിൽ മാത്രമാണ് കളിക്കുകയെന്നുമാണ് വിരാട് വ്യക്തമാക്കിയത്. ഇപ്പോഴും ക്രിക്കറ്റിനോടുള്ള തന്റെ ആവേശത്തെക്കുറിച്ചും കോഹ്‌ലി സംസാരിച്ചു. 

''അത് എപ്പോഴും അങ്ങനെയായിരിക്കും ഞാൻ ഒരു ഫോർമാറ്റിൽ മാത്രമാണ് കളിക്കുന്നത്. ഞാൻ ഒരു സ്ഥലത്ത് ക്രിക്കറ്റ് കളിക്കാൻ എത്തിയാൽ 120 ശതമാനം ആവേശത്തോടെയാവും ഞാൻ എത്തുക റാഞ്ചിയിൽ ഞാൻ നേരത്തെ പരിശീലനത്തിന് എത്തിയിരുന്നു. ഫോം കുറവാണെന്ന് തോന്നുമ്പോൾ കൂടുതൽ പരിശീലനം നടത്തണം. പരിശീലനത്തിൽ ഫോം വീണ്ടെടുത്തുവെന്ന് ഉറപ്പാക്കണം. എനിക്കിപ്പോൾ 37 വയസായി അതുകൊണ്ട് ശരീരത്തിന് വേണ്ടത്ര വിശ്രമം നൽകേണ്ടതും പ്രധാനമായ കാര്യമാണ്'' വിരാട് കോഹ്‌ലി പറഞ്ഞു. 

മത്സരത്തിൽ സെഞ്ച്വറി നേടി തിളങ്ങാനും കോഹ്‌ലിക്ക് സാധിച്ചു. 120 പന്തിൽ 135 റൺസ് നേടിയാണ് കോഹ്‌ലി കളിയിലെ താരമായത്. 11 ഫോറുകളും ഏഴ് സിക്സുകളും ആണ് താരത്തിന്റെ ബാറ്റിൽ നിന്നും പിറന്നത്. മത്സരത്തിലെ പ്ലയെർ ഓഫ് ദി മാച്ച് അവാർഡ് സ്വന്തമാക്കിയത് വിരാട് തന്നെയാണ്. ഇതോടെ ഇന്റർനാഷണൽ ക്രിക്കറ്റിൽ സ്വന്തം മണ്ണിൽ ഏറ്റവും കൂടുതൽ പ്ലയെർ ഓഫ് ദി മാച്ച് അവാർഡ് നേടുന്ന താരമായും കോഹ്‌ലി റെക്കോർഡിട്ടു.

ഇന്ത്യയിലെ കോഹ്‌ലിയുടെ 32 പ്ലയെർ ഓഫ് ദി മാച്ച് അവാർഡ് ആയിരുന്നു ഇത്. 31 തവണ ഈ നേട്ടം സ്വന്തമാക്കിയ ഇതിഹാസ താരങ്ങളായ സച്ചിൻ ടെണ്ടുൽക്കർ, ജാക് കാലിസ് എന്നിവരെ മറികടന്നാണ് വിരാടിന്റെ ഈ നേട്ടം. ഇന്ത്യക്കായി കുൽദീപ് യാദവ് നാല് വിക്കറ്റുകളും ഹർഷിദ് റാണ മൂന്ന് വിക്കറ്റുകളും നേടി സൗത്ത് ആഫ്രിക്കയെ എറിഞ്ഞു വീഴ്ത്തി. അർഷ്ദീപ് സിങ് രണ്ട് വിക്കറ്റും പ്രസിദ് കൃഷ്ണ ഒരു വിക്കറ്റും നേടി. 

Indian cricketer Virat Kohli had responded to a question about whether he would return to Test cricket after the first ODI against South Africa. Virat clarified that he will not return to Test cricket and will play only one format.