ഷിംല: നിയമവിരുദ്ധമായി നിര്‍മിച്ചതെന്നാരോപിച്ച് തീവ്രഹിന്ദുത്വവാദികളുടെ അക്രമാസക്ത പ്രതിഷേധപരിപാടികള്‍ക്ക് സാക്ഷ്യംവഹിച്ച ഹിമാചല്‍പ്രദേശിലെ സഞ്ജൗലി പള്ളിയുടെ താഴത്തെ രണ്ട് നിലകള്‍ സംരക്ഷിക്കാനും മുകളിലത്തെ മൂന്ന് നിലകള്‍ പൊളിച്ചുനീക്കാനും ഉത്തരവിട്ട് ഹൈക്കോടതി. മുകളിലത്തെ നിലകള്‍ പൊളിക്കാനുള്ള മുനിസിപ്പല്‍ കമ്മിഷനറുടെ ഉത്തരവ് മാര്‍ച്ച് ഒമ്പതിന് മുമ്പ് നടപ്പാക്കണമെന്ന് ഹിമാചല്‍പ്രദേശ് ഹൈക്കോടതിയിലെ ജസ്റ്റിസ് അജയ് മോഹന്‍ ഗോയലിന്റെ ബെഞ്ച് നിര്‍ദ്ദേശിച്ചു. മുനിസിപ്പല്‍ കമ്മിഷനറുടെ ഉത്തരവ് ചോദ്യംചെയ്ത് വഖ്ഫ് ബോര്‍ഡും മസ്ജിദ് കമ്മിറ്റിയും സമര്‍പ്പിച്ച ഹരജി തള്ളിയാണ് കോടതിയുടെ നടപടി. ഇതോടെ മുകളിലെ മൂന്ന് നിലകളില്‍ രണ്ടെണ്ണം ഇതിനകം നീക്കം ചെയ്തിട്ടുണ്ടെന്നും ബാക്കിയുള്ള ഒന്ന് പൊളിക്കാമെന്നും വഖ്ഫ് ബോര്‍ഡ് കോടതിയെ അറിയിച്ചു.

നിയമവിരുദ്ധമായി നിര്‍മ്മിച്ചതാണെന്ന് അവകാശപ്പെടുന്ന പള്ളിയുടെ ഭാഗങ്ങള്‍ പൊളിക്കണമെന്നാവശ്യപ്പെട്ട് കഴിഞ്ഞവര്‍ഷം സെപ്റ്റംബര്‍ മുതല്‍ ഹിമാചലില്‍ ഹിന്ദുത്വ സംഘടനകള്‍ അക്രമാസക്ത പ്രതിഷേധസമരങ്ങള്‍ നടത്തിവരികയായിരുന്നു.
ഇതേത്തുടര്‍ന്ന് പള്ളിയുടെ മുകളിലെ മൂന്ന് നിലകള്‍ പൊളിക്കണമെന്ന് മുനിസിപ്പല്‍ കമ്മീഷണര്‍ ഉത്തരവിട്ടു. ഇത് പിന്നീട് അഞ്ചുനിലയും പൊളിക്കണമെന്ന തരത്തില്‍ കമ്മിഷനര്‍ കഴിഞ്ഞ മെയില്‍ പരിഷ്‌കരിച്ചു. ഈ വിധി കഴിഞ്ഞ ഒക്ടോബറില്‍ ജില്ലാ കോടതി ശരിവച്ചു. ഇതിനെയാണ് വഖ്ഫ് ബോര്‍ഡ് ഹൈക്കോടതിയില്‍ ചോദ്യംചെയ്തത്. എന്നാല്‍ മുഴുവന്‍ പൊളിക്കേണ്ടതില്ലെന്നും രണ്ട് നില നിലനിര്‍ത്തണമെന്നും ഹൈക്കോടതി നിര്‍ദേശിക്കുകയായിരുന്നു. അടുത്തവര്‍ഷം മാര്‍ച്ചില്‍ കേസ് വീണ്ടും പരിഗണിക്കും.