കാസർകോട്: പാലാക്കാട് എംഎൽഎ രാഹുൽ മാങ്കൂട്ടത്തിലിനെ ഹാജരാക്കുമെന്ന സൂചനയെ തുടർന്ന് കാസർകോട് ഹൊസ്ദുർഗ് കോടതി പരിസരം കനത്ത സുരക്ഷയിൽ. കോടതിയിൽ വൻ പൊലിസ് സന്നാഹത്തെയാണ് വിന്യസിച്ചിട്ടുള്ളത്.

 ഡിവൈഎസ്പി നേതൃത്വത്തിൽ സുരക്ഷ ശക്തമാക്കി

ഹൊസ്ദുർഗ് കോടതിയിലേക്ക് രാഹുൽ മാങ്കൂട്ടത്തിലിനെ എത്തിക്കാനുള്ള സാധ്യത കണക്കിലെടുത്താണ് പൊലിസ് സുരക്ഷ ശക്തമാക്കിയത്. ഡിവൈഎസ്പി സുരേഷ് ബാബുവിന്റെ നേതൃത്വത്തിലാണ് നിലവിൽ പൊലിസ് സന്നാഹം ഒരുക്കിയിരിക്കുന്നത്.

 കോടതിക്ക് മുന്നിൽ പ്രതിഷേധവുമായി ബിജെപി പ്രവർത്തകർ

രാഹുൽ മാങ്കൂട്ടത്തിലിനെ ഹാജരാക്കുമ്പോൾ ശക്തമായ പ്രതിഷേധം നടത്താനായി ബിജെപി പ്രവർത്തകർ അടക്കം കോടതിക്ക് മുന്നിൽ എത്തിച്ചേർന്നിട്ടുണ്ട്. പ്രതിഷേധ സാധ്യത കണക്കിലെടുത്ത് കോടതിയിലേക്കുള്ള പ്രവേശന കവാടം (ഗേറ്റ്) പൊലിസ് അടച്ചു.

കോടതിക്ക് പുറത്ത് പൊലിസ് സന്നാഹം ഒരുക്കിയിരിക്കുന്നതും പ്രതിഷേധക്കാരെത്തിയതും കാരണം നിരവധി പൊതുജനങ്ങളും മാധ്യമപ്രവർത്തകരും കോടതി പരിസരത്ത് തടിച്ചുകൂടിയിട്ടുണ്ട്. രാഹുൽ മാങ്കൂട്ടത്തിലിനെ എപ്പോഴാണ് കോടതിയിൽ ഹാജരാക്കുക എന്ന കാര്യത്തിൽ ഔദ്യോഗിക സ്ഥിരീകരണം വന്നിട്ടില്ലെങ്കിലും സുരക്ഷാ ക്രമീകരണങ്ങൾ തുടരുകയാണ്.