കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴിൽ തീർഥാടനത്തിന് പോകാൻ 391 പേർക്കു കൂടി അവസരം. നറുക്കെടുപ്പിലെ വെയ്റ്റിങ് ലിസ്റ്റ്റ്റിൽ ഉൾപ്പെട്ട ക്രമനമ്പർ 4783 മുതൽ 5173 വരെയുള്ള അപേക്ഷകർക്കാണ് അവസരം ലഭിച്ചത്. 

പുതുതായി അവസരം ലഭിച്ചവർ ഈമാസം 15-നകം ആദ്യ ഗഡുവും രണ്ടാം ഗഡുവും ഉൾപ്പെടെ ഒരാൾക്ക് 2,77,300 രൂപ അടയ്ക്കണം. ഓരോ കവർ നമ്പറിനും പ്രത്യേകം ലഭിക്കുന്ന ബാങ്ക് റഫറൻസ് നമ്പർ രേഖപ്പെടുത്തിയ പേ-ഇൻ സ്ലിപ്പ് ഉപയോഗിച്ച് സ്റ്റേറ്റ് ബാങ്ക് ഓഫ് ഇന്ത്യ, യൂനിയൻ ബാങ്ക് ഓഫ് ഇന്ത്യ ഇവയുടെ ഏതെങ്കിലും ബ്രാഞ്ചിലോ ഓൺലൈൻ ആയോ പണമടക്കാം. 

പുതുതായി തെരഞ്ഞെടുക്കപ്പെട്ടവർ ഹജ്ജ് അപേക്ഷാ ഫോമും അനുബന്ധ രേഖകളും (അപേക്ഷയിൽ അപേക്ഷകനും നോമിനിയും ഒപ്പിടണം) പണമടച്ച പേ-ഇൻ സ്ലിപ്പ്, നിശ്ചിത മാതൃകയിലുള്ള ഫോട്ടോ പതിച്ച മെഡിക്കൽ സ്‌ക്രീനിങ് ഫിറ്റ്നസ് സർട്ടിഫിക്കറ്റ് (സർട്ടിഫിക്കറ്റ് ഗവൺമെന്റ് അലോപ്പതി ഡോക്ടർ നൽകുന്നതാണം) ഈ മാസം 20-നകം ഓൺലൈനായി അപ്‌ലോഡ് ചെയ്യുകയോ സംസ്ഥാന ഹജ്ജ് കമ്മിറ്റിയുടെ കരിപ്പൂർ ഓഫിസിൽ സമർപ്പിക്കുകയോ വേണം.

ALSO READ: ഇന്ന് ഡിസംബര്‍ 6: ബാബരി മസ്ജിദ് ദിനം; കൊടുംചതിയുടെ 33 വര്‍ഷങ്ങള്‍ | Babri Day 

'സ്വകാര്യ ഹജ്ജ് തീർഥാടകർ ബുക്കിങ് ജനുവരി 15നകം പൂർത്തിയാക്കണം'

കോഴിക്കോട്: 2026 ഹജ്ജിനുള്ള ബുക്കിങ് നടപടികൾ തീർഥാടകർ ജനുവരി 15നകം പൂർത്തീകരിക്കണമെന്ന് കേരളത്തിലെ അംഗീകൃത ഹജ്ജ് ഗ്രൂപ്പ്‌ കൂട്ടായ്മയായ ഇന്ത്യൻ ഹജ്ജ് ഉംറ ഗ്രൂപ്പ് അസോസിയേഷൻ അഭ്യർഥിച്ചു. കഴിഞ്ഞവർഷം 80 ശതമാനത്തോളം ആളുകൾക്ക് യാത്ര മുടങ്ങിയ സാഹചര്യത്തിൽ കേന്ദ്ര ഹജ്ജ് മന്ത്രാലയം ബുക്കിങ് നടപടികൾ ജനുവരി 15 നകം അവസാനിപ്പിക്കണമെന്ന് കർശനമായി നിർദേശിച്ചിട്ടുണ്ട്. ഈ മാസം 15നകം തന്നെ ഹജ്ജ് സേവനങ്ങൾക്കാവശ്യമായ തുക ഗ്രൂപ്പുകൾ കേന്ദ്ര സർക്കാരിലേക്ക് അയക്കണം.  
കൂടാതെ മുൻ വർഷങ്ങളിൽ നിന്നും വിഭിന്നമായി സൗദി ഹജ്ജ് മന്ത്രാലയം മെഡിക്കൽ ഫിറ്റ്നസുമായി ബന്ധപ്പെട്ട് കർശന നിർദേശങ്ങളടങ്ങിയ സർക്കുലറും പുറത്തിറക്കിയിരുന്നു. ഇതിനായി നിരവധി നടപടിക്രമങ്ങൾ പൂർത്തീകരിക്കേണ്ടതുണ്ട്.

ബുക്കിങ് നടത്തുമ്പോൾ 2026 ഹജ്ജിനുള്ള അംഗീകൃത ലൈസൻസ്, അനുവദിക്കപ്പെട്ട നിശ്ചിത ക്വാട്ട എണ്ണം എന്നിവ ഹാജിമാർ അന്വേഷിച്ചു ഉറപ്പ് വരുത്തണമെന്നും കഴിഞ്ഞ ദിവസം പുറത്തിറക്കിയ സർക്കുലറിൽ കേന്ദ്ര ഹജ്ജ് മന്ത്രാലയം ആവശ്യപ്പെടുന്നുണ്ട്.  ലൈസൻസ് ലഭിച്ച ഹജ്ജ് ഗ്രൂപ്പ്‌ പട്ടിക ഹജ്ജ് മന്ത്രാലയ വെബ്സൈറ്റിൽ പ്രസിദ്ധീകരിച്ചിട്ടുണ്ട്. സുഗമമായ ഹജ്ജ് തീർഥാടനത്തിന് ഏവരും സഹകരിക്കണമെന്ന് ഇന്ത്യൻ ഹജ്ജ് ഉംറ ഗ്രൂപ്പ്‌ അസോസിയേഷൻ അഭ്യർഥിച്ചു.