വിശാഖപട്ടണം: ഓപ്പണർ യശസ്വി ജയ്‌സ്വാളിന്റെ തകർപ്പൻ കന്നി ഏകദിന സെഞ്ചുറിയുടെയും മുൻ നായകന്മാരായ രോഹിത് ശർമയുടെയും വിരാട് കോലിയുടെയും അർധസെഞ്ചുറികളുടെയും ബലത്തിൽ ഇന്ത്യക്ക് ദക്ഷിണാഫ്രിക്കയ്‌ക്കെതിരെ മൂന്നാം ഏകദിനത്തിൽ 9 വിക്കറ്റിന്റെ ആധികാരിക വിജയം.

ആദ്യം ബാറ്റ് ചെയ്ത ദക്ഷിണാഫ്രിക്ക ഉയർത്തിയ 271 റൺസ് വിജയലക്ഷ്യം ഇന്ത്യ വെറും 39.5 ഓവറിൽ ഒരു വിക്കറ്റ് മാത്രം നഷ്ടപ്പെടുത്തി മറികടന്നു. വിജയത്തോടെ മൂന്ന് മത്സരങ്ങളടങ്ങിയ ഏകദിന പരമ്പര ഇന്ത്യ 2-1ന് സ്വന്തമാക്കി.

സ്കോർ ചുരുക്കത്തിൽ:

ദക്ഷിണാഫ്രിക്ക: 47.5 ഓവറിൽ 270ന് ഓൾ ഔട്ട്.

ഇന്ത്യ: 39.5 ഓവറിൽ 271-1.

116 റൺസുമായി ജയ്‌സ്വാളും 65 റൺസുമായി കോലിയും പുറത്താകാതെ നിന്നപ്പോൾ 75 റൺസെടുത്ത രോഹിത് ശർമയുടെ വിക്കറ്റ് മാത്രമാണ് ഇന്ത്യക്ക് നഷ്ടമായത്.

ഇന്ത്യൻ ബാറ്റിംഗ്: രോഹിത് തുടങ്ങി, ജയ്‌സ്വാളും കോലിയും പൂർത്തിയാക്കി

271 റൺസ് വിജയലക്ഷ്യം പിന്തുടർന്ന ഇന്ത്യക്ക് വേണ്ടി രോഹിത് ശർമയും യശസ്വി ജയ്‌സ്വാളും കരുതലോടെയാണ് ഇന്നിംഗ്‌സ് ആരംഭിച്ചത്. തുടക്കത്തിൽ റൺസ് കണ്ടെത്താൻ ജയ്‌സ്വാൾ വിഷമിച്ചപ്പോൾ രോഹിത് സ്കോറിംഗിന് വേഗത കൂട്ടി. പിന്നീട് എൻഗിഡിയെയും യാൻസനെയും ബൗണ്ടറി കടത്തി ജയ്‌സ്വാളും താളം കണ്ടെത്തി.

ആദ്യ പവർ പ്ലേയിൽ വിക്കറ്റ് നഷ്ടമില്ലാതെ 48 റൺസ് നേടിയ ഇന്ത്യക്ക് വേണ്ടി രോഹിത് ശർമ തന്റെ വ്യക്തിഗത സ്കോർ 27 കടന്നതോടെ രാജ്യാന്തര ക്രിക്കറ്റിൽ 20,000 റൺസ് എന്ന വലിയ നാഴികക്കല്ല് പിന്നിട്ടു.54 പന്തിൽ രോഹിത് അർധസെഞ്ചുറി പൂർത്തിയാക്കി. 20-ാം ഓവറിൽ ഇന്ത്യ വിക്കറ്റ് നഷ്ടമില്ലാതെ 100 കടന്നു.പിന്നാലെ 75 പന്തിൽ ജയ്‌സ്വാളും അർധസെഞ്ചുറിയിലെത്തി.26-ാം ഓവറിൽ 75 റൺസെടുത്ത രോഹിത് ശർമയെ കേശവ് മഹാരാജ് പുറത്താക്കി.തുടർന്നെത്തിയ വിരാട് കോലി വേഗത്തിൽ റൺസ് കണ്ടെത്താൻ ശ്രമിച്ചു.

ജയ്‌സ്വാളിന്റെ കന്നി ഏകദിന സെഞ്ചുറി
 
111 പന്തിലാണ് ജയ്‌സ്വാൾ ഏകദിനത്തിലെ തന്റെ ആദ്യ സെഞ്ചുറി തികച്ചത്. അർധസെഞ്ചുറിക്ക് ശേഷം വെറും 36 പന്തുകളേ സെഞ്ചുറിയിലെത്താൻ അദ്ദേഹത്തിന് വേണ്ടിവന്നുള്ളൂ. ഇതോടെ ക്രിക്കറ്റിന്റെ മൂന്ന് ഫോർമാറ്റുകളിലും (ടെസ്റ്റ്, ഏകദിനം, ടി20) സെഞ്ചുറി നേടുന്ന ആറാമത്തെ മാത്രം ഇന്ത്യൻ താരമായി ജയ്‌സ്വാൾ മാറി.ജയ്‌സ്വാളിന് പിന്നാലെ 40 പന്തിൽ കോലിയും അർധസെഞ്ചുറി പൂർത്തിയാക്കി.ജയ്‌സ്വാൾ (116* റൺസ്, 12 ബൗണ്ടറി, 2 സിക്സ്), കോലി (65* റൺസ്, 6 ബൗണ്ടറി, 3 സിക്സ്) എന്നിവർ ചേർന്ന് ഇന്ത്യക്ക് 9 വിക്കറ്റിന്റെ ഉജ്ജ്വല വിജയം സമ്മാനിച്ചു.

ദക്ഷിണാഫ്രിക്കൻ ഇന്നിംഗ്‌സ്: ഡി കോക്കിന് സെഞ്ചുറി, പിന്നാലെ തകർച്ച

ടോസ് നഷ്ടപ്പെട്ട് ആദ്യം ബാറ്റ് ചെയ്ത ദക്ഷിണാഫ്രിക്കക്ക് ഓപ്പണർ ക്വിന്റൺ ഡി കോക്കിന്റെ (106 റൺസ്, 89 പന്തിൽ) സെഞ്ചുറിയും നായകൻ ടെംബ ബാവുമയുടെ (48) പ്രകടനവും മികച്ച തുടക്കം നൽകി. എന്നാൽ, പിന്നീടുള്ള താരങ്ങൾക്ക് വലിയ പ്രകടനം നടത്താനായില്ല.ദക്ഷിണാഫ്രിക്ക 47.5 ഓവറിൽ 270 റൺസിന് എല്ലാവരും പുറത്തായി.ഇന്ത്യക്ക് വേണ്ടി കുൽദീപ് യാദവും പ്രസിദ്ധ് കൃഷ്ണയും നാല് വിക്കറ്റ് വീതം വീഴ്ത്തി ദക്ഷിണാഫ്രിക്കൻ ബാറ്റിംഗിനെ തകർത്തു.