മാഡ്രിഡ്: ഫുട്ബോൾ ലോകകപ്പ് ചരിത്രത്തിലെ ഏറ്റവും വിവാദമായ കളികളിലൊന്നായും കായികഭാവനയുടെ ലംഘനമായും ഇന്നും കണക്കാക്കുന്ന 'ഗിജോണിന്റെ അപമാനം' (Disgrace of Gijón) എന്ന വിവാദ മത്സരം നടന്നിട്ട് പതിറ്റാണ്ടുകൾ പിന്നിടുന്നു. 1982-ലെ ഫിഫ ലോകകപ്പിൽ, സ്പെയിനിലെ ഗിജോൺ നഗരത്തിൽ വെച്ച് നടന്ന പടിഞ്ഞാറൻ ജർമ്മനിയും ഓസ്ട്രിയയും തമ്മിലുള്ള ഗ്രൂപ്പ് ഘട്ട മത്സരമാണ് ഈ നാണക്കേടിന് കാരണമായത്.

ജൂൺ 25-ന് നടന്ന ഈ മത്സരം ഗ്രൂപ്പ് 2-ലെ അവസാനത്തേതായിരുന്നു. നേരത്തെ നടന്ന മത്സരങ്ങളിൽ അൽജീരിയ മികച്ച പ്രകടനം കാഴ്ചവെക്കുകയും നിർണ്ണായകമായ ഒരു ടീമായി മാറുകയും ചെയ്തിരുന്നു. അൽജീരിയ ഇതിനകം തന്നെ അവരുടെ ഗ്രൂപ്പ് മത്സരങ്ങൾ പൂർത്തിയാക്കിയിരുന്നു. അടുത്ത റൗണ്ടിലേക്ക് (രണ്ടാം ഗ്രൂപ്പ് ഘട്ടം) മുന്നേറാൻ, ജർമ്മനിക്ക് 1-0 അല്ലെങ്കിൽ 2-0 എന്ന സ്കോറിൽ വിജയിച്ചാൽ മതിയായിരുന്നു. ഈ സ്കോറുകൾ ഓസ്ട്രിയയെയും ജർമ്മനിയെയും ഒരുമിച്ച് അടുത്ത റൗണ്ടിലേക്ക് എത്തിക്കുകയും, അപ്രതീക്ഷിത കുതിപ്പ് നടത്തിയ അൽജീരിയയെ പുറത്താക്കുകയും ചെയ്യുമായിരുന്നു.

ALSO READ: ഇഞ്ചുറി ടൈം ഷോക്ക്: ആഴ്സണലിനെ വീഴ്ത്തി ആസ്റ്റൺ വില്ല; 2-1ന് അട്ടിമറി ജയം

മത്സരം ആരംഭിച്ചു. ഹോർസ്റ്റ് റുബേഷ് ആദ്യ 10 തന്നെ മിനിറ്റിനുള്ളിൽ ജർമ്മനിക്കായി ഗോൾ നേടി (1-0). അതിനുശേഷം സംഭവിച്ചത് ഫുട്ബോൾ ചരിത്രത്തിലെ ഏറ്റവും വിചിത്രമായ കാഴ്ചയായിരുന്നു. ഗോൾ നേടിയതോടെ, ഇരു ടീമുകളും യാതൊരുവിധ ആക്രമണ ശ്രമങ്ങളും കൂടാതെ, പ്രതിരോധത്തിലൂന്നി പന്ത് പരസ്പരം കൈമാറി കളിച്ചു. ശരിക്ക് പറഞ്ഞാൽ ഫുട്ബോൾ നടന്നു കളിച്ചു. സ്കോർ നിലനിർത്താൻ ഇരു ടീമുകളും ബോധപൂർവ്വം ശ്രമിക്കുന്നതായി വ്യക്തമായിരുന്നു.

മത്സരം കാണാനെത്തിയ സ്പാനിഷ്, അൽജീരിയൻ ആരാധകർ ഈ 'ഒത്തുകളി' കണ്ടതോടെ രോഷാകുലരായി. അവർ കളിക്കാർക്ക് നേരെ കൂവുകയും, "മാറിപ്പോകൂ!" എന്നും "ചതിയന്മാർ!" എന്നും മുദ്രാവാക്യം വിളിക്കുകയും ചെയ്തു. മത്സരം കണ്ടിരുന്ന ജർമ്മൻ ടെലിവിഷൻ കമന്റേറ്റർമാരിൽ ഒരാൾ താൻ കളി റിപ്പോർട്ട് ചെയ്യുന്നത് നിർത്തിവെക്കുകയാണെന്ന് പ്രഖ്യാപിച്ചു. അന്താരാഷ്ട്ര മാധ്യമങ്ങൾ ഈ മത്സരത്തെ "ലജ്ജാകരം", "വലിയ നാണക്കേട്" എന്ന് വിശേഷിപ്പിച്ചു.

ഈ വിവാദത്തെത്തുടർന്ന്, ഗ്രൂപ്പ് ഘട്ടത്തിൽ അവസാന മത്സരങ്ങൾ ഒരുമിച്ച് നടത്തുന്ന രീതിക്ക് ഫിഫ തുടക്കം കുറിച്ചു. ഇരു ടീമുകളും സ്കോർ നിലനിർത്താൻ ഒത്തുകളിക്കാനുള്ള സാധ്യത ഒഴിവാക്കുക എന്ന ലക്ഷ്യത്തോടെയാണ് ഈ നിയമം കൊണ്ടുവന്നത്. 1986-ലെ ലോകകപ്പ് മുതൽ ഈ നിയമം നിർബന്ധമായി നടപ്പിലാക്കി. കളിയുടെ ആത്മാവിനെ കളങ്കപ്പെടുത്തിയ ഈ സംഭവം 'ഫുട്ബോൾ ലോകത്തിലെ ഒരു കറുത്ത ഏടായി' ഇന്നും ഈ മത്സരം നിലനിൽക്കുന്നു.

the infamous “gijon disgrace” unfolded during the 1982 world cup when west germany and austria allegedly played a mutually beneficial match to eliminate algeria. their slow, predictable play after an early goal sparked global outrage, prompting accusations of match-fixing and betrayal of sporting spirit. the scandal forced fifa to change rules, ensuring all final group matches occur simultaneously.