വാഷിംഗ്‌ടൺ ഡിസി: 2026 ലോകകപ്പിനായുള്ള ഗ്രൂപ്പ് ഘട്ട നറുക്കെടുപ്പ് പൂർത്തിയായതിന് പിന്നാലെ ക്രിസ്റ്റ്യാനോ റൊണാൾഡോ നയിക്കുന്ന പോർച്ചുഗലിനെതിരെ ആരാധകർക്കിടയിൽ വിവാദങ്ങൾ കത്തുന്നു. റൊണാൾഡോയുടെ സസ്‌പെൻഷൻ കുറച്ച നടപടിക്ക് പിന്നാലെ ഇപ്പോൾ ലഭിച്ചിരിക്കുന്നത് 'ഏറ്റവും എളുപ്പമുള്ള നറുക്കെടുപ്പാണെ'ന്നാണ് ആരാധകരുടെ പ്രധാന വിമർശനം.

 പോർച്ചുഗലിന്റെ ഗ്രൂപ്പ് കെ

ഡിസംബർ 5 വെള്ളിയാഴ്ച കെന്നഡി സെന്ററിൽ നടന്ന നറുക്കെടുപ്പിൽ പോർച്ചുഗൽ ഗ്രൂപ്പ് കെയിൽ ഇടം നേടി. അവരുടെ എതിരാളികൾ:

• കൊളംബിയ (2024 കോപ്പ അമേരിക്ക റണ്ണേഴ്‌സ് അപ്പ്)
• ഉസ്ബെക്കിസ്ഥാൻ (ലോകകപ്പിൽ അരങ്ങേറ്റം കുറിക്കുന്ന ടീം)
• പ്ലേ-ഓഫ് ടൂർണമെന്റ് 1 വിജയി (ന്യൂ കാലിഡോണിയ, ജമൈക്ക, ഡെമോക്രാറ്റിക് റിപ്പബ്ലിക് ഓഫ് കോംഗോ എന്നീ ടീമുകളിൽ നിന്ന് മാർച്ച് മാസത്തിൽ യോഗ്യത നേടുന്ന ടീം).

ഈ ഗ്രൂപ്പ് ഘടനയാണ് ആരാധകരെ പ്രകോപിപ്പിച്ചത്.

 ആരാധകരുടെ വിമർശനം: 'നറുക്കെടുപ്പ് കൃത്രിമം'

റൊണാൾഡോയുടെ സസ്‌പെൻഷൻ കുറച്ചതിനെതിരെ നേരത്തെ തന്നെ പ്രതിഷേധം ഉയർന്നിരുന്നു. അതിന് പിന്നാലെ ലഭിച്ച ഈ 'എളുപ്പമുള്ള' ഗ്രൂപ്പിനെതിരെ സോഷ്യൽ മീഡിയയിൽ കടുത്ത വിമർശനങ്ങളാണ് ഉയരുന്നത്.

ഒരു ആരാധകൻ കുറിച്ചത് ഇങ്ങനെ:

"ലോകകപ്പ് നറുക്കെടുപ്പ് പോർച്ചുഗലിനായി കൃത്രിമമായി ഉണ്ടാക്കിയതാണ്. നോർവേ അവരുടെ ഗ്രൂപ്പിൽ ഉണ്ടാകേണ്ടതായിരുന്നു. ഫിഫ വീണ്ടും കളി തുടങ്ങിയിരിക്കുന്നു."

മറ്റൊരാൾ രോഷം പ്രകടിപ്പിച്ചത് ഇങ്ങനെയാണ്:

"പോർച്ചുഗൽ അഴിമതി നിറഞ്ഞ ഒരു ലോകകപ്പ് ​യോ​ഗ്യത നേടി, സസ്‌പെൻഷനുകൾ അവഗണിച്ചു. ഇപ്പോൾ ഏറ്റവും എളുപ്പമുള്ള ഗ്രൂപ്പും..."

എങ്കിലും ചിലർ പോർച്ചുഗലിന് മുന്നറിയിപ്പും നൽകുന്നുണ്ട്. "റൊണാൾഡോയ്ക്ക് ഏറ്റവും എളുപ്പമുള്ള ഗ്രൂപ്പാണെന്ന് തോന്നാം, പക്ഷേ ശ്രദ്ധിച്ചില്ലെങ്കിൽ അവരെ പുറത്താക്കാം. എന്റെ സ്വന്തം കൊളംബിയയെ അവർ കുറച്ചുകാണരുത്," എന്ന് ഒരാൾ അഭിപ്രായപ്പെട്ടു.

 റൊണാൾഡോയുടെ സസ്പെൻഷൻ വിവാദം

കഴിഞ്ഞ മാസം റിപ്പബ്ലിക് ഓഫ് അയർലൻഡിനെതിരായ ലോകകപ്പ് യോഗ്യതാ മത്സരത്തിനിടെ ചുവപ്പ് കാർഡ് ലഭിച്ചതിനെ തുടർന്ന് ക്രിസ്റ്റ്യാനോ റൊണാൾഡോയ്ക്ക് ആദ്യം മൂന്ന് മത്സരങ്ങളിൽ വിലക്ക് ലഭിക്കുമെന്നാണ് കരുതിയത്. എന്നാൽ ഫിഫയുടെ അച്ചടക്ക സമിതി രണ്ടാമത്തെയും മൂന്നാമത്തെയും മത്സരങ്ങളിലെ വിലക്ക് ഒരു വർഷത്തേക്ക് സസ്പെൻഡ് ചെയ്യുകയായിരുന്നു. ഇതോടെ, 40 വയസ്സുകാരനായ റൊണാൾഡോയ്ക്ക് പോർച്ചുഗലിന്റെ ലോകകപ്പ് ഉദ്ഘാടന മത്സരങ്ങൾ കളിക്കാൻ അവസരം ലഭിച്ചു. 2026 ലോകകപ്പ് തന്റെ അവസാന ലോകകപ്പായിരിക്കുമെന്ന് റൊണാൾഡോ സ്ഥിരീകരിച്ചിട്ടുണ്ട്.

2022 ലോകകപ്പിന്റെ ക്വാർട്ടർ ഫൈനലിൽ മൊറോക്കോയോടാണ് ക്രിസ്റ്റ്യാനോ റൊണാൾഡോയുടെ പോർച്ചുഗൽ പുറത്തായത്.