കോതമംഗലം: ജില്ലാ പഞ്ചായത്ത് പോത്താനിക്കാട് ഡിവിഷനില്‍ ഇരു കേരള കോണ്‍ഗ്രസുകള്‍ തമ്മിലുള്ള പോരാട്ടമാണ് നടക്കുന്നത്. എല്‍.ഡി.എഫിനായി കേരള കോണ്‍ഗ്രസ് (എം) ബിനില്‍ യല്‍ദോയും യു.ഡി.എഫിനായി കേരള കോണ്‍ഗ്രസ് (ജെ) വിഭാഗത്തിലെ ജോമി തെക്കേക്കരയുമാണ് മത്സരിക്കുന്നത്. ഇക്കുറി പോത്താനിക്കാട് ഡിവിഷന്‍ തിരിച്ചു പിടിക്കാനുള്ള ഒരുക്കത്തിലാണ് എല്‍.ഡി.എഫ് .കഴിഞ്ഞ തവണത്തെ വാരപ്പെട്ടി ഡിവിഷന്‍ പേരും രൂപവും മാറിയാണ് ഇത്തവണ പോത്താനിക്കാട് ഡിവിഷന്‍ രൂപീകൃതമായിട്ടുള്ളത്.

നിലവിലെ യു.ഡി.എഫ് മെംബര്‍ ഡിവിഷനില്‍ ചിലവഴിക്കേണ്ട വികസന ഫണ്ടുകള്‍ മണ്ഡലത്തിന് പുറത്ത് ചിലവഴിച്ചതും ഡിവിഷനിലെ വികസന മുരടിപ്പും വോട്ടര്‍മാരുടെ ഇടയില്‍ ചര്‍ച്ചയാണ്. കോതമംഗലം ബ്ലോക്ക് പഞ്ചായത്തിലെ പൈങ്ങോട്ടൂര്‍, പോത്താനിക്കാട്, പല്ലാരിമംഗലം, നെല്ലിമറ്റം, വാരപ്പെട്ടി ഡിവിഷനുകളും മുവാറ്റുപുഴ ബ്ലോക്ക് പഞ്ചായത്തിലെ അഞ്ചല്‍പ്പെട്ടി ഡിവിഷനും ചേര്‍ന്നതാണ് പോത്താനിക്കാട് ഡിവിഷന്‍.

യു.ഡി.എഫ് സ്ഥാനാര്‍ഥിയായ ജോമി തെക്കേക്കര നിലവിലെ കോതമംഗലം ബ്ലോക്ക് പഞ്ചായത്തംഗവും കേരള കോണ്‍ഗ്രസ് സംസ്ഥാന ജനറല്‍ സെക്രട്ടറിയുമാണ്. ബിരുദാനന്തര ബിരുദധാരിയും നിയമ വിദ്യാര്‍ഥിയും കേരള വിദ്യാര്‍ഥി കോണ്‍ഗ്രസ് (എം) സംസ്ഥാന ജനറല്‍ സെക്രട്ടറിയുമായ ബിനില്‍ യല്‍ദോ വനം, വന്യജീവി പ്രശ്നങ്ങള്‍ പരിഹരിക്കാന്‍ നടത്തിയ ശ്രമങ്ങള്‍ ശ്രദ്ധേയമായിരുന്നു. ബി.ജെ.പി കവളങ്ങാട് മണ്ഡലം പ്രസിഡന്റ് അരുണ്‍ നെല്ലിമറ്റമാണ് എന്‍.ഡി.എ സ്ഥാനാര്‍ഥിയായി മല്‍സര രംഗത്തുള്ളത്.