2026 ഫിഫ ലോകകപ്പിൽ കിരീടം നേടാൻ സാധ്യതയുള്ള ടീമുകൾ ഏതെല്ലാമാണെന്ന് തുറന്നു പറഞ്ഞിരിക്കുകയാണ് അർജന്റൈൻ ഇതിഹാസം ലയണൽ മെസി. സ്‌പെയ്ൻ, ജർമനി, ബ്രസീൽ, ഇംഗ്ലണ്ട്, ഫ്രാൻസ് എന്നീ ടീമുകളെയാണ് മെസി ലോകകപ്പ് ഫേവറൈറ്റുകളായി തെരഞ്ഞെടുത്തത്.  സ്പോർട്സ് സെന്റർ അർജന്റീനക്ക് നൽകിയ പ്രത്യേക അഭിമുഖത്തിലാണ് മെസി ഇക്കാര്യം പറഞ്ഞത്. 

''ലോകകപ്പ് നേടാൻ സ്‌പെയ്ൻ, ഇംഗ്ലണ്ട്, ഫ്രാൻസ്, ജർമനി, ബ്രസീൽ എന്നീ ടീമുകൾക്ക് സാധ്യതയുണ്ട്. എന്നാൽ ഞങ്ങൾ ലോകകപ്പ് നേടാനുള്ള മത്സരം നിർത്തില്ല അതിൽ ഒരു സംശയവും വേണ്ട'' ലയണൽ മെസി പറഞ്ഞു. 

അതേസമയം 2026 ലോകകപ്പിൽ കളിക്കുമോയെന്ന ചോദ്യത്തിന് മെസി അടുത്തിടെ മറുപടി നൽകിയിരുന്നു. ലോകകപ്പിൽ കളിക്കുന്നതിനെക്കുറിച്ച് ഇതുവരെ താൻ തീരുമാനമെടുത്തിട്ടില്ലെന്നാണ്‌ മെസി പറഞ്ഞത്. 

''മുമ്പ് ഞാൻ പറഞ്ഞതുപോലെ ഇനി ഒരിക്കലും ലോകകപ്പിൽ കളിക്കില്ലെന്ന് ഞാൻ കരുതുന്നു. എന്റെ പ്രായം കാരണമാണ് ഞാൻ ഇത് പറയുന്നത്. ഞങ്ങളിപ്പോൾ ലോകകപ്പിനായി അടുത്തുകൊണ്ടിരിക്കുന്നു. ലോകകപ്പിൽ കളിക്കുന്നതിൽ എനിക്ക് വളരെയധികം ആവേശമുണ്ട്. ഞാൻ എപ്പോഴും പറയുന്നതുപോലെ എല്ലാ ദിവസവും ഓരോ മത്സരങ്ങൾ കളിക്കാനാന് ഞാൻ ചിന്തിക്കുന്നത്. ഓരോ ദിവസവും നല്ല രീതിയിൽ പ്രകടനം നടത്താൻ ഞാൻ ശ്രമിക്കുന്നു. കാര്യങ്ങൾ നല്ലതായി തോന്നുമ്പോൾ അത് ഞാൻ ആസ്വദിക്കും പക്ഷേ കാര്യങ്ങൾ നല്ലതായിരിക്കുമ്പോൾ ലോകകപ്പ് കളിക്കാതിരിക്കാനാണ് ഞാൻ ഇഷ്ടപ്പെടുന്നത്. നമുക്ക് നോക്കാം, ലോകകപ്പിനെ കുറിച്ച് ഞാൻ ഇതുവരെ ഒരു തീരുമാനം എടുത്തിട്ടില്ല. ഞാൻ ഈ സീസൺ പൂർത്തിയാക്കും. പിന്നെ ഇതിനുശേഷം പ്രീ സീസൺ ഉണ്ടാകും. അതിനുശേഷം ആറു മാസം കൂടി ബാക്കിയുണ്ടാകും അതുവരെ നമുക്ക് നോക്കാം. 2026ൽ എനിക്ക് നല്ലൊരു ഫ്രീ സീസൺ ലഭിക്കുമെന്നും ഈ എംഎൽഎസ് സീസൺ നന്നായി പൂർത്തിയാക്കണമെന്ന് ഞാൻ പ്രതീക്ഷിക്കുന്നു. അതിനുശേഷമായിരിക്കും ഞാൻ ഈ തീരുമാനം എടുക്കുക'' മെസി പറഞ്ഞു. 

ലോകകപ്പിൽ അർജന്റീന ഗ്രൂപ്പ് ജെയിൽ ആണ് ഇടം നേടിയിട്ടുള്ളത്. അർജന്റീനക്കൊപ്പം ജോർദാൻ, അൾജീരിയ, ഓസ്ട്രിയ എന്നീ ടീമുകളാണ് ഇടം നേടിയത്. 2022 ഖത്തർ ലോകകപ്പ് വിജയം 2026ലും മെസി ആവർത്തിക്കുമോയെന്നാണ് ഫുട്ബോൾ ലോകം ഉറ്റുനോക്കുന്നത്. 

Argentine legend Lionel Messi has revealed which teams are likely to win the 2026 FIFA World Cup. Messi has picked Spain, Germany, Brazil, England and France as the World Cup favorites.