തിരുവനന്തപുരം: ശബരിമല സ്വർണക്കൊള്ള രണ്ടാമത്തെ കേസിൽ മുൻ ദേവസ്വം ബോർഡ് പ്രസിഡന്റ്‌ എ പത്മകുമാറിനെ എസ്ഐടി കസ്റ്റഡിയിൽ വാങ്ങും. ഒരു ദിവസത്തേക്കുള്ള കസ്റ്റഡി അപേക്ഷയാണ് കൊല്ലം വിജിലൻസ് കോടതി ഇന്ന് പരിഗണിക്കുക. ഗൂഢാലോചനയിൽ ഉൾപ്പടെ പങ്കുണ്ടെന്ന് കണ്ടെത്തിയതിന് പിന്നാലെയാണ് കട്ടിളപ്പാളി കേസിന് പുറമെ ദ്വാരപാലക ശില്പ കവർച്ചയിലും എ പത്മകുമാറിനെ പ്രതിചേർത്തത്. 

സ്വർണക്കൊള്ള കേസിൽ ഉന്നത ഇടപെടൽ സംശയം നിലനിൽക്കുന്ന സാഹചര്യത്തിലാണ് പത്മകുമാറിനെ കസ്റ്റഡിയിൽ വാങ്ങി വിശദമായ ചോദ്യം ചെയ്യൽ നടക്കുന്നത്. പത്മകുമാറിന്റെ ജാമ്യാപേക്ഷയിൽ ഇന്ന് വാദം കേൾക്കും. മുൻ എക്സിക്യൂട്ടീവ് ഓഫിസർ സുധീഷ് കുമാറിന്റെ ജാമ്യാപേക്ഷയിലും ഇന്നാണ് വാദം നടക്കുക.