തിരുവനന്തപുരം: ഇൻഡിഗോ വിമാന സർവിസുകൾ മുടങ്ങുന്ന സാഹചര്യത്തിൽ യാത്രക്കാരുടെ സൗകര്യത്തിനായി തിരക്കേറിയ റൂട്ടുകളിൽ പ്രത്യേക സർവിസുകളും അധിക കോച്ചുകളും അനുവദിച്ച് ദക്ഷിണ റെയിൽവേ. ഹസ്രത് നിസാമുദ്ദീൻ -തിരുവനന്തപുരം സെൻട്രൽ സൂപ്പർഫാസ്റ്റ് സ്പെഷൽ, എറണാകുളം ജങ്ഷൻ - യെലഹങ്ക (ബംഗളൂരു) - എറണാകുളം സ്പെഷൽ, തിരുവനന്തപുരം നോർത്ത്-ചെന്നൈ എഗ്‌മൂർ - തിരുവനന്തപുരം നോർത്ത് എക്സ്പ്രസ് സ്പെഷൽ എന്നീ ട്രെയിനുകളാണ് കേരളത്തിലേക്കും പുറത്തേക്കുമായി അധികമായി അനുവദിച്ചത്.

കൂടാതെ, എം.ജി.ആർ ചെന്നൈ സെൻട്രൽ-തിരുവനന്തപുരം സെൻട്രൽ സൂപ്പർഫാസ്റ്റ് എക്സ്പ്രസിന് 11 വരെ ഒരു സ്ലീപ്പർ കോച്ച് അധികമായും തിരുവനന്തപുരം സെൻട്രൽ - എം.ജി.ആർ ചെന്നൈ സെൻട്രൽ സൂപ്പർഫാസ്റ്റ് എക്സ്പ്രസിന് 12 വരെ ഒരു സ്ലീപ്പർ ക്ലാസ് കോച്ച് അധികമായും അനുവദിച്ചു. ഇതോടൊപ്പം ചെന്നൈ എഗ്‌മൂർ - കൊല്ലം ജങ്ഷൻ അനന്തപുരി എക്സ്പ്രസിന് ഇന്നും കൊല്ലം-ചെന്നൈ എഗ്‌മൂർ അനന്തപുരി എക്സ്പ്രസിന് നാളെയും ഒരു സ്ലീപ്പർ ക്ലാസ് കോച്ച് അധികമായി അനുവദിച്ചു. കൂടാതെ, ആലപ്പുഴ - എം.ജി.ആർ ചെന്നൈ സെൻട്രൽ സൂപ്പർഫാസ്റ്റ് എക്സ്പ്രസിന് ഇന്ന് ഒരു സ്ലീപ്പർ ക്ലാസ് കോച്ചും തിരുവനന്തപുരം സെൻട്രൽ – കോഴിക്കോട് – തിരുവനന്തപുരം സെൻട്രൽ ജനശതാബ്ദി എക്സ്പ്രസിന് 11 വരെ ഒരു ചെയർകാർ കോച്ചും അധികമായി അനുവദിച്ചു.