ദുബൈ: നഗര ആസൂത്രണത്തിലും ഡിജിറ്റലൈസേഷനിലും സുപ്രധാന മാറ്റങ്ങൾ ലക്ഷ്യമിട്ടുള്ള സുപ്രധാന നയങ്ങൾക്കും തന്ത്രപരമായ മാതൃകകൾക്കും അംഗീകാരം നൽകി ദുബൈ കിരീടാവകാശിയും എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. പൗരന്മാരുടെ ക്ഷേമവും കുടുംബ ശാക്തീകരണവും ലക്ഷ്യമിട്ടുള്ള റെസിഡൻഷ്യൽ ഏരിയകൾക്കായുള്ള പുതിയ ആസൂത്രണ മാതൃകയും, എമിറേറ്റിന്റെ ഡിജിറ്റൽ പ്രതിരോധശേഷി ശക്തിപ്പെടുത്തുന്ന നയവുമാണ് ഇതിൽ പ്രധാനപ്പെട്ടവ.

പുതിയതായി പ്രഖ്യാപിച്ച പദ്ധതികൾ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ പ്രഖ്യാപിച്ച 'കുടുംബ വർഷം', ദുബൈ ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂം ആരംഭിച്ച 'ദുബൈ സോഷ്യൽ അജണ്ട 33' എന്നിവയ്ക്ക് അനുസൃതമായാണ് രൂപകൽപ്പന ചെയ്തിരിക്കുന്നത്.

ദുബൈയിലെ നഗരവികസനത്തിൽ പൗരന്മാരുടെ പാർപ്പിട മേഖലകൾക്ക് മുൻഗണന നൽകുന്ന റെസിഡൻഷ്യൽ ഏരിയകൾക്കായുള്ള പുതിയ ആസൂത്രണ മാതൃകയ്ക്ക് അംഗീകാരം ലഭിച്ചു. 'ഫരീജ്' (പരമ്പരാഗത കമ്മ്യൂണിറ്റി ക്ലസ്റ്റർ) എന്ന ആശയത്തെ ശക്തിപ്പെടുത്തുന്ന ഈ മാതൃക സുസ്ഥിര ജീവിതത്തെയും സാമൂഹിക സ്ഥിരതയെയും പ്രോത്സാഹിപ്പിക്കാൻ ലക്ഷ്യമിട്ടാണ് നടപ്പാക്കുന്നത്.

പാർക്കുകൾ: മദീനത്ത് ലത്തീഫ്, അൽ യലായിസ് എന്നീ പ്രദേശങ്ങളിലായി 152 പുതിയ പാർക്കുകൾ കൂട്ടിച്ചേർക്കും. താമസക്കാർക്ക് ഏറ്റവും അടുത്തുള്ള പാർക്കിലേക്ക് പരമാവധി 150 മീറ്റർ മാത്രം നടക്കാവുന്ന ദൂരമായിരിക്കും ഉണ്ടാവുക. 33 കിലോമീറ്ററിലധികം പുതിയ സൈക്ലിംഗ് പാതകൾ കൂട്ടിച്ചേർക്കും. കമ്മ്യൂണിറ്റി മജ്‌ലിസുകളും വിവാഹ ഹാളുകളും നിർമ്മിക്കും.

ALSO READ: 'ബ്ലൂ വെരിഫിക്കേഷൻ നിങ്ങളെ രക്ഷിക്കില്ല': പണമടച്ചുള്ള വെരിഫിക്കേഷൻ വിശ്വാസ്യതയെ തകർക്കുന്നു; മുന്നറിയിപ്പുമായി യുഎഇയിലെ വിദഗ്ധർ 

വികസന മേഖലകൾ
    
മദീനത്ത് ലത്തീഫ്: 3,000 ഹെക്ടർ വിസ്തൃതിയിൽ 77 പാർക്കുകളും 12 കിലോമീറ്റർ സൈക്ലിംഗ് പാതകളും ഉൾപ്പെടെ 18,500 റെസിഡൻഷ്യൽ യൂണിറ്റുകൾക്ക് സൗകര്യമൊരുക്കും.
    
അൽ യലായിസ്: 1,108 ഹെക്ടറിൽ 75 പാർക്കുകളും 8,000 റെസിഡൻഷ്യൽ യൂണിറ്റുകളും ഉൾപ്പെടുത്തി, ജീവിത നിലവാരം ഉയർത്തുന്ന ഹരിത ഇടനാഴിയായി മാറും.

ഡിജിറ്റൽ പ്രതിരോധ നയം (Digital Resilience Policy)

ദുബൈയുടെ ഡിജിറ്റൽ അടിസ്ഥാന സൗകര്യങ്ങൾക്ക് വെല്ലുവിളികളെ നേരിടാൻ കഴിയുമെന്ന് ഉറപ്പാക്കുന്ന സമഗ്രമായ ഡിജിറ്റൽ റെസിലിയൻസ് പോളിസിക്ക് എക്സിക്യൂട്ടീവ് കൗൺസിൽ അംഗീകാരം നൽകി.

ലക്ഷ്യം: ദുബൈ ഡിജിറ്റൽ തന്ത്രം 2023-ന്റെ ലക്ഷ്യങ്ങൾ നിറവേറ്റുന്നതിനായി ഡിജിറ്റൽ പ്രതിരോധശേഷി ശക്തിപ്പെടുത്തുക, ഡിജിറ്റൽ സേവനങ്ങളുടെ തുടർച്ച ഉറപ്പാക്കുക, നിർണായക ഡിജിറ്റൽ ആസ്തികൾ സംരക്ഷിക്കുക.

പ്രധാന ഘടകം: ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള നൂതന സാങ്കേതികവിദ്യകൾ ഉപയോഗിച്ച് ഡിജിറ്റൽ സമ്പദ്‌വ്യവസ്ഥയെ ശക്തിപ്പെടുത്താനും ജനങ്ങളുടെ ജീവിതം ലളിതമാക്കാനും ഈ നയം സഹായകമാകും.

"ലോകത്തിലെ ഏറ്റവും നൂതനമായ ഡിജിറ്റൽ അടിസ്ഥാന സൗകര്യങ്ങളിൽ ഒന്നാണ് ഞങ്ങൾക്കുള്ളത്. ഡിജിറ്റൽ പ്രതിരോധ നയം അംഗീകരിച്ചതിലൂടെ, സമഗ്രമായ രീതിയിലുള്ള ഡിജിറ്റൽ നേതൃത്വം വർദ്ധിപ്പിക്കുന്നതിനുള്ള ഒരു പ്രധാന ഉപകരണമാണ് ഞങ്ങൾ നേടിയിരിക്കുന്നത്," ഷെയ്ഖ് ഹംദാൻ പറഞ്ഞു.

dubai has introduced a comprehensive digital resilience policy aimed at enhancing cyber security, protecting critical digital infrastructure, and promoting sustainable digital growth. the policy provides guidelines for government and private sectors to mitigate risks, ensure data safety, and strengthen overall national digital resilience.