സൗത്ത് ആഫ്രിക്കക്കെതിരായ അഞ്ചു ടി-20 മത്സരങ്ങളുടെ പരമ്പരക്ക് ഇന്നാണ് തുടക്കമാവുന്നത്‌. പരമ്പരയിലെ ആദ്യ മത്സരം കട്ടക്കിലാണ് നടക്കുന്നത്. ഡിസംബർ 11ന് മുല്ലാൻപൂരിൽ രണ്ടാം മത്സരവും 14ന് ധർമ്മശാലയിൽ മൂന്നാം മത്സരവും നടക്കും. ഡിസംബർ 17ന് ലഖ്‌നൗവിൽ നാലാം മത്സരവും 19ന് അഹമ്മദാബാദിൽ അവസാന മത്സരവും നടക്കും. 

ഇന്ത്യൻ ടീമിൽ പരുക്കേറ്റ്‌ ഏകദിന പരമ്പരയിൽ നിന്നും പുറത്തായ ശുഭ്മൻ ഗിൽ വൈസ് ക്യാപ്റ്റനായി തിരിച്ചെത്തി. സ്റ്റാർ ഓൾ റൗണ്ടർ ഹർദിക് പാണ്ഡ്യയും ടി-20 ടീമിലേക്ക് തിരിച്ചെത്തി. രണ്ട് മാസത്തിന് ശേഷമാണ് ഹർദിക് ടീമിലേക്ക് തിരിച്ചെത്തുന്നത്. വിക്കറ്റ് കീപ്പർമാരിൽ സഞ്ജു സാംസണും ജിതേഷ് ശർമയും ടീമിൽ ഇടം നേടി. ഈ പരമ്പരയിൽ സഞ്ജു സാംസണ് ഒരു തകർപ്പൻ റെക്കോർഡ് സ്വന്തമാക്കാനുള്ള അവസരവുമുണ്ട്. 

മത്സരത്തിൽ നാല് റൺസ് കൂടി നേടിയാൽ സഞ്ജുവിനെ കാത്തിരിക്കുന്നത് ഒരു തകർപ്പൻ നേട്ടമാണ്. ടി-20യിൽ 8000 റൺസ് പൂർത്തിയാക്കുന്ന ആറാമത്തെ ഇന്ത്യൻ താരമായി മാറാനുള്ള അവസരമാണ് സഞ്ജുവിന്റെ മുന്നിലുള്ളത്. വിരാട് കോഹ്‌ലി, രോഹിത് ശർമ്മ, ശിഖർ ധവാൻ, സൂര്യകുമാർ യാദവ്, കെഎൽ രാഹുൽ എന്നീ താരങ്ങളാണ് ഇതിനു മുമ്പ് ഈ നാഴികക്കല്ല് പിന്നിട്ടുള്ളത്. 

സയ്യിദ് മുഷ്താഖ് അലി ട്രോഫിയിൽ കേരളത്തിന് വേണ്ടി മിന്നും പ്രകടനമാണ് സഞ്ജു നടത്തിക്കൊണ്ടിരിക്കുന്നത്. താരത്തിന്റെ ഈ മിന്നും പ്രകടനം സൗത്ത് ആഫ്രിക്കക്കെതിരെയും ഉണ്ടാവുമെന്നാണ് ആരാധകർ ഉറച്ചു വിശ്വസിക്കുന്നത്. 

The five-match T20I series against South Africa begins today. The first match of the series will be played in Cuttack. Sanju Samson has a chance to break a record in this series. If he scores four more runs in the match, a breakthrough awaits Sanju. Sanju has the opportunity to become the sixth Indian player to complete 8000 runs in T20Is.