കോട്ടയം: തദ്ദേശ തെരഞ്ഞെടുപ്പിനായി കേരളത്തിൽ ഉപയോഗിക്കുന്ന വോട്ടിങ് മിഷീനിൽ നോട്ടയില്ലാത്തതിനെതിരെ വിമർശനവുമായി ബിജെപി നേതാവ് പിസി ജോർജ്. വൃത്തികെട്ട തെരഞ്ഞെടുപ്പ് സമ്പ്രദായം എന്നാണ് പിസി ജോർജിന്റെ വിമർശനം. സ്വന്തം വാർഡിൽ എൻഡിഎ സ്ഥാനാർത്തിയില്ലാത്തതിന് പിന്നാലെയാണ് പിസി ജോർജിന്റെ വിമർശനം. നോട്ടയില്ലാതെ വോട്ടിങ് മിഷീൻ ക്രമീകരിച്ച ഇലക്ഷൻ കമ്മീഷന്റെ നടപടി വിവരക്കേടാണെന്നും പിസി ജോർജ് പറഞ്ഞു. 

ബിജെപി സ്ഥാനാർഥിയില്ലെങ്കിൽ ആ പാർട്ടിക്കാരനായ താൻ എവിടെ പോയി വോട്ട് ചെയ്യണമെന്നും നോട്ടക്ക് അല്ലെ ചെയ്യാൻ സാധിക്കുകയുള്ളൂ എന്നാണ് പിസി ജോർജ് ചോദിച്ചത്. ഇവിടെ രണ്ട് സ്ഥാനാർത്ഥികളാണ് ഉള്ളത്. അതിൽ ഒരാൾക്ക് വോട്ട് ചെയ്യാം. ഒരാൾക്ക് വോട്ട് ചെയ്തുവെന്നത് വേറെ കാര്യം. നോട്ട വേണ്ടേയെന്നും പിസി ജോർജ് ചോദിച്ചു.

തെരഞ്ഞെടുപ്പ് കമ്മീഷൻ വിവരക്കേട് കാണിക്കുകയാണോയെന്നും തനിക്ക് നോട്ടക്ക് വോട്ട് ചെയ്യണമെങ്കിൽ എവിടെ പോയി വോട്ട് ചെയ്യണമെന്നും അത് തന്റെ അവകാശമല്ലേയെന്നും പിസി ജോർജ് ചോദ്യം ഉന്നയിച്ചു. ഇത് വൃത്തികെട്ട തെരഞ്ഞെടുപ്പ് സമ്പ്രദായമാണെന്നും തനിക്ക് ഇതിൽ പരാതിയുണ്ടെന്നും അദ്ദേഹം വ്യക്തമാക്കി.