കാസർകോട്: ഓരോ വർഷവും രാജ്യത്തുനിന്ന് അപ്രത്യക്ഷരാകുന്നത് അമ്പതിനായിരത്തോളം കുട്ടികൾ. അഞ്ച് വർഷത്തെ കണക്ക് മാത്രമെടുത്താൽ  233,088 കുട്ടികളെയാണ് കാണാതായത്. 2019 മുതൽ 2023വരെ സംസ്ഥാനങ്ങളിൽ നിന്നും കേന്ദ്രഭരണ പ്രദേശങ്ങളിൽനിന്നുമായി കാണാതായ കുട്ടികളുടെ കണക്കാണിത്. 2024, 2025 വർഷത്തെ കണക്കുകൂടി ലഭിച്ചാൽ സ്ഥിതി ഭയാനകമാകും.  2023ൽ  48800 കുട്ടികളാണ് അപ്രത്യക്ഷരായത്. 2022 ൽ 47313, 2021 ൽ  44524, 2020ൽ  43661, 2019ൽ 48790 കുട്ടികളെയും ഇതുവരെ കണ്ടെത്താനായിട്ടില്ല. നാഷണൽ ക്രൈം റെക്കോഡ് ബ്യൂറോയുടെ കണക്കിലാണ് ഞെട്ടിക്കുന്ന വിവരമുള്ളത്. 

എല്ലാവർഷവും പതിനായിരത്തിന് മുകളിൽ കുട്ടികളെ കാണാതാകുന്നത് പശ്ചിമ ബംഗാൾ, മധ്യപ്രദേശ്, ബിഹാർ, ഡൽഹി എന്നീ സംസ്ഥാനങ്ങളിൽനിന്നാണ്. മുന്നിൽ പശ്ചിമ ബംഗാളാണെങ്കിലും കൂടുതൽ കുട്ടികളെ കണ്ടെത്താനാകാത്തത് ബിഹാറിലാണ്. ഇവിടെ കാണാതായവരിൽ അമ്പത് ശതമാനം പോലും കണ്ടെത്താനായിട്ടില്ല. 

ALSO READ: മലയാറ്റൂരിലെ ചിത്രപ്രിയയുടെ മരണം കൊലപാതകമെന്ന് പൊലിസ്; ആണ്‍ സുഹൃത്ത് അറസ്റ്റില്‍; രാത്രി ഒരുമണിക്ക് ബൈക്കില്‍ പോകുന്ന ദൃശ്യങ്ങളും പുറത്ത്

61166 കുട്ടികളെ കാണാതായതിൽ 27630 കുട്ടികളെ കണ്ടെത്തി. എന്നാൽ 33536 കുട്ടികൾ എങ്ങോട്ടുപോയെന്നറിയില്ല. തൊട്ടുപിന്നിൽ ഡൽഹിയിലാണ്. 58239 കുട്ടികളെ കാണാതായതിൽ 29392 കുട്ടികളെ മാത്രമെ കണ്ടെത്താനായിട്ടുള്ളു. 28847 കുട്ടികളുടെ ഒരു വിവരവുമില്ല. ബംഗാളിൽ 86176 കുട്ടികളെ കാണായപ്പോൾ 58,956 കുട്ടികളെ കണ്ടെത്തി. 27220 കുട്ടികളെയാണ് ഇനിയും കണ്ടെത്താനുള്ളത്.

 മധ്യപ്രദേശിൽ 78936 കുട്ടികളെ കാണാതായതിൽ 56029 കുട്ടികളെ കണ്ടെത്തി. 22907 പേരുടെ വിവരമില്ല. കേരളത്തിൽ10125 കുട്ടികളെയാണ് അഞ്ചുവർഷത്തിനിടെ കാണാതായത്. ഇവരിൽ 9518 കുട്ടികളെ കണ്ടെത്തിയെങ്കിലും 607 പേരുടെ വിവരമൊന്നുമില്ല. മിസോറാമിൽ നിന്ന് 2022ലും 2023ലും കാണാതായത് ഓരോ കുട്ടികളെയാണ്. ഇവരെ കണ്ടെത്തി. ലഡാക്കിൽ നിന്ന് ഏഴ് കുട്ടികളെയാണ് ഇതുവരെ കാണാതായത്. ഈ കാലയളവിനുള്ളിൽ ഒരു കുട്ടിയെപ്പോലും നഷ്ടപ്പെടാത്തത് ലക്ഷദ്വീപിലാണ്.