മസ്കത്ത്: ഒമാനിലെ പ്രവാസി തൊഴിലാളികൾക്ക് തൊഴിൽ നിയമ ലംഘനങ്ങളുമായി ബന്ധപ്പെട്ട സ്റ്റാറ്റസ് ശരിയാക്കാനും, പിഴത്തുകകളിൽ ഇളവുകൾ നേടാനും അനുവദിച്ചിട്ടുള്ള സമയപരിധി 2025 ഡിസംബർ 31-ന് അവസാനിക്കുമെന്ന് ഒമാൻ തൊഴിൽ മന്ത്രാലയം ഓർമ്മിപ്പിച്ചു.

അപേക്ഷിക്കാൻ ഇനി കുറഞ്ഞ സമയം

പിഴ ഇളവുകൾ ലഭിക്കുന്നതിനും, വർക്ക് പെർമിറ്റുകൾ പുതുക്കുന്നതിനും ആവശ്യമായ അപേക്ഷകൾ 2025 ഡിസംബർ 31-ന് മുമ്പ് സമർപ്പിക്കണമെന്ന് മന്ത്രാലയം ഒമാനിലെ തൊഴിലാളികളോടും തൊഴിലുടമകളോടും ആവശ്യപ്പെട്ടു. ഈ സമയപരിധിക്ക് ശേഷം ഇത്തരത്തിലുള്ള അപേക്ഷകൾ സ്വീകരിക്കില്ലെന്നും മന്ത്രാലയം വ്യക്തമാക്കി. 2025 ഡിസംബർ 9-നാണ് മന്ത്രാലയം ഇക്കാര്യം വ്യക്തമാക്കിയത്.

ALSO READ: തുടര്‍ച്ചയായ ഏഴാം വര്‍ഷവും ഏറ്റവും മികച്ചത് ആയി യു.എ.ഇ പാസ്‌പോര്‍ട്ട്

ഇളവുകൾ ലഭിക്കുന്ന കാര്യങ്ങൾ

കാലാവധി കഴിഞ്ഞ വർക്ക് പെർമിറ്റുകൾ: ഏഴ് വർഷം കാലാവധിയുണ്ടായിരുന്നതും, നിലവിൽ കാലാവധി കഴിഞ്ഞതുമായ പ്രവാസി വർക്ക് പെർമിറ്റുകൾക്കുള്ള പിഴത്തുകകൾ ഒഴിവാക്കും.

സ്വദേശത്തേക്ക് മടങ്ങുന്നവർക്ക്: ഒമാനിൽ നിന്ന് എന്നെന്നേക്കുമായി സ്വന്തം രാജ്യങ്ങളിലേക്ക് തിരികെ പോകാൻ ആഗ്രഹിക്കുന്ന പ്രവാസികളുടെ കാലാവധി കഴിഞ്ഞ വിസകളുമായി ബന്ധപ്പെട്ട് ചുമത്തിയിട്ടുള്ള പിഴത്തുകകൾ.

വർക്ക് പെർമിറ്റ് പുതുക്കുന്നവർക്കും മാറുന്നവർക്കും: ഒമാനിൽ റെസിഡൻസി പുതുക്കാൻ ആഗ്രഹിക്കുന്ന വിദേശികൾക്കോ, നിലവിലെ തൊഴിലുടമയിൽ നിന്ന് മറ്റൊരു തൊഴിലുടമയിലേക്ക് ജോലി മാറ്റാൻ (ട്രാൻസ്ഫർ ചെയ്യാൻ) ആഗ്രഹിക്കുന്ന വിദേശികൾക്കോ അവരുടെ കാലാവധി കഴിഞ്ഞ വർക്ക് വിസ, റെസിഡൻസി കാർഡ് എന്നിവയുമായി ബന്ധപ്പെട്ട് ചുമത്തിയിട്ടുള്ള മുഴുവൻ പിഴത്തുകകളിലും ഇളവ് ലഭിക്കുന്നതാണ്.

അതേസമയം, തൊഴിൽ മന്ത്രാലയത്തിന്റെ പരിശോധനകൾക്ക് വിധേയമായായിരിക്കും ഈ ഇളവുകൾ അനുവദിക്കുക. ഇളവുകൾ ലഭിക്കാൻ അർഹതയുള്ളവർ നിശ്ചിത സമയപരിധിക്കുള്ളിൽ അപേക്ഷകൾ സമർപ്പിക്കണം.

The Oman Ministry of Labour reminds expat workers to rectify their employment status and avail of penalty waivers by December 31, 2025, to avoid legal issues.