ഷാർജ: ഷാർജ പൊലിസും ഷാർജ തുറമുഖം, കസ്റ്റംസ്, ഫ്രീ സോൺ അതോറിറ്റിയും ചേർന്ന് നടത്തിയ സംയുക്ത നീക്കത്തിൽ, രാജ്യത്തിനകത്തും പുറത്തുമായി രണ്ട് ലഹരിക്കടത്ത് ശ്രമങ്ങൾ പരാജയപ്പെടുത്തി. ഈ ഓപ്പറേഷനുകളിൽ ആകെ 17 കിലോഗ്രാം കൊക്കെയ്ൻ പിടിച്ചെടുത്തു.

ഷാർജ പൊലിസ് ജനറൽ കമാൻഡ് വ്യക്തമാക്കിയത് പ്രകാരം, ഡയറക്ടറേറ്റ് ഓഫ് ഡ്ര​ഗ് പ്രിവൻഷൻ ആൻഡ് കൺട്രോൾ നാല് രാജ്യങ്ങളിലായി വ്യാപിച്ചുകിടക്കുന്ന ഒരു വലിയ അന്താരാഷ്ട്ര ലഹരിക്കടത്ത് ശൃംഖലയെയാണ് തകർത്തത്. വിതരണത്തിനായി 12 കിലോഗ്രാമിലധികം കൊക്കെയ്ൻ യുഎഇയിലേക്ക് കടത്താനാണ് സംഘം ശ്രമിച്ചത്. 

ഡയറക്ടറേറ്റ് ഓഫ് ഡ്ര​ഗ് പ്രിവൻഷൻ ആൻഡ് കൺട്രോൾ ഡയറക്ടർ മേജർ മാജിദ് സുൽത്താൻ അൽ അസ്സാം നൽകിയ വിവരമനുസരിച്ച്, സംഘത്തിലെ പ്രധാനി ഒരു ഏഷ്യൻ പൗരനാണ്. ഇയാളെ, അയൽ രാജ്യത്തിലൂടെ യുഎഇയിൽ പ്രവേശിച്ച ഉടൻ അറസ്റ്റ് ചെയ്തു. കൂടാതെ, യുഎഇയിൽ മയക്കുമരുന്ന് കൈപ്പറ്റാൻ കാത്തിരുന്ന രണ്ട് ആഫ്രിക്കൻ പൗരന്മാരെയും പിടികൂടിയിട്ടുണ്ട്. 

ALSO READ: ഫിഫ അറബ് കപ്പ്: ക്വാർട്ടറിൽ യുഎഇക്ക് കടുപ്പം; എതിരാളികൾ നിലവിലെ ചാമ്പ്യന്മാർ

ദേശീയ അടിയന്തര അന്വേഷണ കേന്ദ്രം (National Centre for Early Inquiry) നടത്തിയ വിശദമായ അന്വേഷണത്തിൽ, ശൃംഖലയുമായി ബന്ധമുള്ള മറ്റൊരാളെ കൂടി തിരിച്ചറിഞ്ഞു. ഇയാൾ പ്രധാനപ്രതിയുടെ അതേ രാജ്യക്കാരനാണ്. യുഎഇ വിമാനത്താവളം വഴി രണ്ട് ഗൾഫ് രാജ്യങ്ങൾക്കിടയിൽ യാത്ര ചെയ്യുന്നതിനിടെയാണ് ഇയാളെ തടഞ്ഞത്. കൂടാതെ, ഇയാൾ പോകാനിരുന്ന രാജ്യത്തെ അധികാരികളുമായി സഹകരിച്ച് നടത്തിയ പരിശോധനയിൽ 5 കിലോഗ്രാം കൊക്കെയ്ൻ കൂടി പിടിച്ചെടുത്തു.

വിവരങ്ങൾ ട്രാക്ക് ചെയ്യുന്നതിലെ കൃത്യതയും ഏജൻസികൾ തമ്മിലുള്ള വേഗത്തിലുള്ള ഏകോപനവുമാണ് ചെറിയ സമയത്തിനുള്ളിൽ ഈ ശൃംഖലയെ തകർക്കാൻ സഹായിച്ചതെന്ന് അൽ അസ്സാം വ്യക്തമാക്കി. സമൂഹത്തിന് സംരക്ഷണം നൽകുന്നതിലും അന്താരാഷ്ട്ര ലഹരിക്കടത്ത് സംഘങ്ങളെ നേരിടുന്നതിലും ഷാർജ പൊലിസ്, ദേശീയ മയക്കുമരുന്ന് വിരുദ്ധ ഏജൻസി, മറ്റ് പങ്കാളി സ്ഥാപനങ്ങൾ എന്നിവയുടെ കൂട്ടായ പ്രവർത്തനത്തെ അദ്ദേഹം പ്രശംസിച്ചു.

Sharjah Police and Sharjah Port, Customs, and Free Zone Authority thwarted two major drug smuggling attempts, confiscating 17kg of cocaine in operations targeting shipments within and outside the country.