ദുബൈ: അബൂദബിയിൽ നിന്നും ലിസ്ബണിലേക്കുള്ള വിമാന സർവിസുകൾ റദ്ദാക്കി എത്തിഹാദ് എയർവേയ്‌സ്. പോർച്ചുഗലിൽ ഇന്ന് നടക്കുന്ന പൊതു പണിമുടക്കിനെ (National Industrial Action) തുടർന്നാണ് ഈ തീരുമാനം. ഈ പണിമുടക്ക് രാജ്യത്തുടനീളം വിമാന യാത്ര, പൊതുഗതാഗതം, മറ്റ് അത്യാവശ്യ സേവനങ്ങൾ എന്നിവയെ തടസ്സപ്പെടുത്താൻ സാധ്യതയുണ്ട്.

അബൂദബി സായിദ് അന്താരാഷ്ട്ര വിമാനത്താവളത്തിൽ നിന്ന് ലിസ്ബൺ പോർട്ടേല അന്താരാഷ്ട്ര വിമാനത്താവളത്തിലേക്കുള്ള EY099 നമ്പർ വിമാനവും, തിരിച്ചുള്ള EY100 നമ്പർ വിമാനവുമാണ് ഇന്ന് (ഡിസംബർ 11, വ്യാഴാഴ്ച) റദ്ദാക്കിയത്. 

"ലിസ്ബൺ വിമാനത്താവളത്തിലെ എല്ലാ എയർലൈനുകളെയും ബാധിക്കുന്ന ദേശീയ തലത്തിലുള്ള പണിമുടക്ക്" ആണ് റദ്ദാക്കലിന് കാരണമെന്ന് എത്തിഹാദ് വ്യക്തമാക്കി.

“ഈ ബുദ്ധിമുട്ടിൽ ഞങ്ങൾ ക്ഷമ ചോദിക്കുന്നു. നിങ്ങളുടെ യാത്രാ ക്രമീകരണങ്ങൾക്കായി ഞങ്ങളുടെ ടീമുകൾ പരമാവധി ശ്രമിക്കുന്നുണ്ട്,” എത്തിഹാദ് പ്രസ്താവനയിൽ അറിയിച്ചു. 

ALSO READ: ബഹ്‌റൈനിൽ സാമ്പത്തിക ബാധ്യത തീര്‍ക്കാതെ ഇനി രാജ്യം വിടാനാകില്ല; തട്ടിപ്പുകാർക്കെതിരെ കടുത്ത നടപടി വരും, ബില്ലിന് പാര്‍ലമെന്റ് പിന്തുണ

അതേസമയം, യാത്രാ തടസ്സം നേരിട്ട യാത്രക്കാർക്ക് ഏറ്റവും പുതിയ വിവരങ്ങളും സഹായവും ലഭിക്കുന്നതിനായി etihad.com/contactme എന്ന വെബ്സൈറ്റിൽ ബന്ധപ്പെടാനുള്ള വിവരങ്ങൾ അപ്ഡേറ്റ് ചെയ്യാനും എയർലൈൻ ആവശ്യപ്പെട്ടു.

2013-ന് ശേഷം ആദ്യമായാണ് പോർച്ചുഗൽ ഒരു പൊതു പണിമുടക്കിനെ നേരിടുന്നത്. ഈ സാഹചര്യത്തിലാണ് വിമാനങ്ങൾ റദ്ദാക്കിയിരിക്കുന്നത്. സിജിടിപി (CGTP), യുജിടി (UGT) എന്നീ രാജ്യത്തെ ഏറ്റവും വലിയ രണ്ട് തൊഴിലാളി യൂണിയനുകളാണ് ഈ പണിമുടക്കിന് ആഹ്വാനം ചെയ്തിരിക്കുന്നത്. രാജ്യത്തെ പ്രധാന സേവനങ്ങളെ ഇത് സ്തംഭിപ്പിക്കുമെന്നാണ് പ്രതീക്ഷിക്കുന്നത്. 

അധ്യാപകർ, ആരോഗ്യ പ്രവർത്തകർ, മുനിസിപ്പൽ ജീവനക്കാർ, ഗതാഗത തൊഴിലാളികൾ എന്നിവരും പങ്കെടുക്കുന്ന ഈ പണിമുടക്ക് പോർച്ചുഗലിലെ പൊതുമേഖലയുടെ പ്രവർത്തനങ്ങളെ നിശ്ചലമാക്കുമെന്നാണ് വിലയിരുത്തുന്നത്.

വ്യോമയാന മേഖലയിൽ, TAP എയർ പോർച്ചുഗൽ, റയാൻഎയർ, ഈസിജെറ്റ്, അസോറസ് എയർലൈൻസ് എന്നിവയിലെ 5,000-ത്തിലധികം കാബിൻ ക്രൂ അംഗങ്ങളെ പ്രതിനിധീകരിക്കുന്ന സിവിൽ ഏവിയേഷൻ യൂണിയനായ SNPVAC-യും പ്രതിഷേധത്തിൽ ചേർന്നിട്ടുണ്ട്. വിമാനങ്ങളുടെ സമയക്രമം താളം തെറ്റിയതോടെ ലിസ്ബൺ, പോർട്ടോ വിമാനത്താവളങ്ങളിലെ പ്രവർത്തനങ്ങളിൽ തടസം നേരിടുന്നുണ്ട്.

യാത്രക്കാരുടെയും ജീവനക്കാരുടെയും സുരക്ഷയും സൗകര്യവുമാണ് തങ്ങളുടെ പ്രഥമ പരി​ഗണനയെന്ന് എത്തിഹാദ് വ്യക്തമാക്കി. യാത്രാ പദ്ധതികളെ ബാധിച്ചതിൽ എത്തിഹാദ് ഖേദം പ്രകടിപ്പിച്ചു. 

Etihad Airways has cancelled its flights between Abu Dhabi and Lisbon, Portugal, citing the National Industrial Action affecting all airlines at Lisbon airport. The strike is expected to disrupt air travel, public transport, and essential services across Portugal.