ദുബൈ: പ്രിയപ്പെട്ട ഒരാളെ നഷ്ടപ്പെടുമ്പോൾ ദുഃഖിക്കുന്ന കുടുംബങ്ങളെ സഹായിക്കാൻ 'ജബ്ർ' (Jabir) സംവിധാനവുമായി ദുബൈ. മരണാനന്തര ചടങ്ങുകൾക്കും നിയമപരമായ നടപടികൾക്കുമായി ഒന്നിലധികം സർക്കാർ ഓഫീസുകളിൽ കയറിയിറങ്ങേണ്ട അവസ്ഥ ഇനി ദുബൈയിൽ ഉണ്ടാകില്ല.

സിറ്റി മേക്കേഴ്സ് സംരംഭത്തിൻ്റെ ഭാഗമായി ദുബൈ ഹെൽത്ത് അതോറിറ്റി (DHA) ആരംഭിച്ച ജബ്ർ, മരണം സംബന്ധിച്ച എല്ലാ നടപടിക്രമങ്ങളും കൈകാര്യം ചെയ്യുന്നതിനുള്ള സംയോജിത ഡിജിറ്റൽ പ്ലാറ്റ്‌ഫോമാണ്.

ALSO READ: നാടുകടത്തലും ജയിൽ ശിക്ഷയും ലഭിക്കാവുന്ന യുഎഇയിലെ 7 വിസ ലംഘനങ്ങൾ | uae visa violations 

എന്താണ് 'ജബ്ർ', എങ്ങനെ പ്രവർത്തിക്കുന്നു?

ഒരു മരണം രജിസ്റ്റർ ചെയ്യുന്ന നിമിഷം മുതൽ ഈ സംവിധാനം ഓട്ടോമാറ്റിക്കായി പ്രവർത്തിച്ചു തുടങ്ങും. ആരോഗ്യ അതോറിറ്റി, കോടതികൾ, മുനിസിപ്പാലിറ്റി തുടങ്ങി ബന്ധപ്പെട്ട എല്ലാ സർക്കാർ സ്ഥാപനങ്ങളെയും ഇത് ഒറ്റ പ്ലാറ്റ്‌ഫോമിൽ ബന്ധിപ്പിക്കുന്നു.

പ്രവർത്തന ഘട്ടങ്ങൾ:

1. തുടക്കം: ദുബൈയിലെ ഏതെങ്കിലും ആശുപത്രിയിൽ മരണം രജിസ്റ്റർ ചെയ്യുമ്പോൾ തന്നെ ഈ ഡിജിറ്റൽ പ്ലാറ്റ്‌ഫോം ഓട്ടോമാറ്റിക്കായി  ആക്ടീവാകും.

2.  നിയുക്ത ഉദ്യോഗസ്ഥൻ: മണിക്കൂറുകൾക്കുള്ളിൽ, ഒരു ഗവൺമെന്റ് സർവീസ് ഓഫീസർ (GSO) കുടുംബവുമായി ബന്ധപ്പെടും. ഈ ഉദ്യോഗസ്ഥൻ എല്ലാ കാര്യങ്ങൾക്കുമുള്ള കുടുംബത്തിൻ്റെ ആശ്രയ കേന്ദ്രമായി മാറും.

3.  ഡിജിറ്റൽ ഏകോപനം: കുടുംബം ഓഫീസുകളിൽ കയറിയിറങ്ങാതെ, GSO എല്ലാ സർക്കാർ സ്ഥാപനങ്ങളുമായും ഏകോപിപ്പിക്കും. മരണ സർട്ടിഫിക്കറ്റുകൾ മുതൽ മറ്റ് ക്രമീകരണങ്ങൾ വരെയുള്ള പേപ്പർ വർക്കുകളും പണമടയ്ക്കലുകളും GSO കൈകാര്യം ചെയ്യും.

4.  പൂർത്തീകരണവും കൈമാറ്റവും: ഡിജിറ്റൽ മരണ സർട്ടിഫിക്കറ്റ് ലഭിക്കുകയും അതിൻ്റെ പ്രിൻ്റ് ഔട്ട് വീട്ടിൽ എത്തിക്കുകയും ചെയ്യും. മരിച്ചയാളുടെ ബാങ്ക് അക്കൗണ്ടുകൾ, വാഹനങ്ങൾ, മറ്റ് സ്വത്തുക്കൾ എന്നിവയുടെ എസ്റ്റേറ്റ് ഫയലുകൾ ദുബൈ കോടതികളിൽ മുൻകൂട്ടി തുറക്കുകയും നടപടിക്രമങ്ങൾ സുഗമമാക്കുകയും ചെയ്യും.

പ്രധാന പ്രയോജനങ്ങൾ:

• എല്ലാ രേഖകളും ഒന്നായി: മരണ സർട്ടിഫിക്കറ്റ് വേഗത്തിൽ നൽകുകയും എല്ലാ സ്ഥാപനങ്ങൾക്കും ഓട്ടോമാറ്റിക്കായി അയക്കുകയും ചെയ്യും.
• വേഗത്തിലുള്ള ചടങ്ങുകൾ: സംസ്കാരം, അല്ലെങ്കിൽ മൃതദേഹം നാട്ടിലേക്ക് കൊണ്ടുപോകൽ (Repatriation) എന്നിവ വേഗത്തിൽ പൂർത്തിയാക്കാൻ GSO സഹായിക്കും.
• മാനസിക പിന്തുണ: കുടുംബാംഗങ്ങളെ നഷ്ടപ്പെട്ട വിദ്യാർത്ഥികളെ സഹായിക്കാൻ സ്കൂൾ കൗൺസിലർമാർക്ക് പരിശീലനം നൽകിയിട്ടുണ്ട്. മതപരമായ ഉപദേശങ്ങൾ ആവശ്യമുള്ളവർക്ക് പ്രത്യേക കൗൺസിലർമാരുടെ സേവനവും ലഭിക്കും.
• എസ്റ്റേറ്റ് മാനേജ്‌മെൻ്റ്: കോടതികൾ എസ്റ്റേറ്റ് ഫയലുകൾ സ്വയമേവ തുറക്കുന്നതിനാൽ, അനന്തരാവകാശ രേഖകൾ വേഗത്തിൽ ലഭിക്കാൻ ഇത് സഹായിക്കും.
• ചെലവുകൾ: ജബ്ർ സേവനം സൗജന്യമാണ്. പ്രത്യേക ചടങ്ങുകൾക്ക് ഫീസ് ആവശ്യമെങ്കിൽ, ദുബൈ നൗ ആപ്പ് വഴി ഒറ്റത്തവണയായി പണമടച്ചാൽ മതി.

പ്രയോജനം ആർക്കൊക്കെ?

ദുബൈയിൽ പ്രിയപ്പെട്ടവരെ നഷ്ടപ്പെടുന്ന എല്ലാ വിഭാഗം ആളുകൾക്കും (ഇമാറാത്തി പൗരന്മാർ, പ്രവാസികൾ, സന്ദർശകർ) ഈ സൗകര്യം ലഭ്യമാണ്. ദുരിത സമയങ്ങളിൽ ഭരണപരമായ കാര്യങ്ങളുടെ ഭാരം കുറയ്ക്കുക, സഹാനുഭൂതിയോടെയുള്ള പിന്തുണ നൽകുക എന്നിവയാണ് ജബ്ർ ലക്ഷ്യമിടുന്നതെന്ന് അധികൃതർ അറിയിച്ചു.

dubai introduces the jabr service to help residents and expatriates complete post-death legal procedures more easily, offering faster, simplified processing for families