കൊല്‍ക്കത്ത: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ പ്രതി നല്‍കിയ പുനപരിശോധന ഹരജി കൊല്‍ക്കത്ത ഹൈക്കോടതി തള്ളി. താനും പെണ്‍കുട്ടിയും തമ്മില്‍ പ്രണയത്തിലായിരുന്നെന്നും, പരസ്പര സമ്മതത്തോടെയാണ് ലൈംഗിക ബന്ധത്തില്‍ ഏര്‍പ്പെട്ടതെന്നുമായിരുന്നു പ്രതിയുടെ വാദം. എന്നാല്‍ പ്രായപൂര്‍ത്തിയാകാത്ത പെണ്‍കുട്ടിക്ക് ലൈംഗിക ബന്ധത്തിന്റെ അനന്തരഫലങ്ങള്‍ അറിയാന്‍ കഴിയില്ലെന്നും, അഥിനാല്‍ കുട്ടിയുടെ സമ്മതം സാധുവല്ലെന്നും കോടതി നിരീക്ഷിച്ചു. പ്രതിയുടെ ശിക്ഷ കോടതി ശരിവെക്കുകയും ചെയ്തു. 

23 വയസുള്ള യുവാവും, 14 വയസുള്ള പെണ്‍കുട്ടിയുമായി ലൈംഗിക ബന്ധത്തില്‍ ഏര്‍പ്പെട്ടെന്നാണ് കേസ്. 2018ല്‍ കേസില്‍ പ്രതിക്ക് ജീവപര്യന്തം തടവും, രണ്ട് ലക്ഷം രൂപ പിഴയും കോടതി വിധിച്ചിരുന്നു. ഇത് ചോദ്യം ചെയ്താണ് പ്രതി ഹൈക്കോടതിയെ സമീപിച്ചത്. 

ALSO READ: തദ്ദേശ തെരഞ്ഞെടുപ്പ് ഫലം: കോഴിക്കോട് റൂറലിൽ ആഹ്ലാദ പ്രകടനങ്ങൾക്ക് കർശന നിയന്ത്രണം; നിർദ്ദേശങ്ങളുമായി ജില്ലാ പൊലിസ് മേധാവി 

പ്രണയം അവസാനിപ്പിച്ചതിലുള്ള വൈരാഗ്യമാണ് തനിക്കെതിരെ കേസ് കൊടുക്കാന്‍ പെണ്‍കുട്ടിയെ പ്രേരിപ്പിച്ചതെന്ന് പ്രതി കോടതിയെ അറിയിച്ചു. എന്നാല്‍ ഈ വാദം ജസ്റ്റിസുമാരായ രാജശേഖര്‍ മന്തയും, അജയ് കുമാര്‍ ഗുപ്തയും അടങ്ങുന്ന ഡിവിഷന്‍ ബെഞ്ച് തള്ളി. ഇരയാക്കപ്പെട്ട പെണ്‍കുട്ടിക്ക് പ്രായപൂര്‍ത്തിയായിട്ടില്ലെന്നും അതിനാല്‍ ലൈംഗിക ബന്ധത്തിന് സമ്മതം നല്‍കാന്‍ കഴിയില്ലെന്നും കോടതി വ്യക്തമാക്കി. പരാതി നല്‍കുന്നതിലുണ്ടായ കാലതാമസം പെണ്‍കുട്ടിക്ക് പുരുഷനോടുള്ള സ്‌നേഹത്തിന്റെ അടിസ്ഥാനത്തിലായിരുന്നെന്നും കോടതി കണ്ടെത്തി.

അതേസമയം പ്രതിയായ യുവാവ് തന്നെ വിവാഹം കഴിക്കുമെന്ന് വിശ്വസിപ്പിച്ചിരുന്നതായാണ് പെണ്‍കുട്ടി കോടതിയില്‍ നല്‍കിയ മൊഴി. എന്നാല്‍ പിന്നീട് ഇതില്‍ നിന്ന് പിന്‍മാറി.