തിരുവനന്തപുരം: തദ്ദേശ തെരഞ്ഞെടുപ്പിൽ തിരുവനന്തപുരം കോർപ്പറേഷനിലുണ്ടായ രാഷ്ട്രീയമാറ്റത്തെ ബിജെപിയുടെ വിജയമായി കണ്ട് അഭിനന്ദനമറിയിച്ച കോൺഗ്രസ് എംപി ശശി തരൂരിന്റെ നിലപാട് യുഡിഎഫ് ക്യാമ്പുകളിൽ കടുത്ത അമർഷത്തിന് ഇടയാക്കുന്നു. സ്വന്തം മുന്നണിക്ക് ഭരണം നഷ്ടപ്പെട്ട ഇടത്ത്, വിജയിച്ച എതിരാളികളെ പ്രശംസിച്ച തരൂരിന്റെ സമീപനം കോൺഗ്രസിന്റെ രാഷ്ട്രീയ പക്വതയെ ചോദ്യം ചെയ്യുന്നതായാണ് വിലയിരുത്തുന്നത്.

ALSO READ: റീകൗണ്ടിങ്ങിൽ അട്ടിമറി വിജയം; സി.പി.ഐ വിട്ട് കോൺഗ്രസിൽ ചേർന്ന ശ്രീനാദേവി കുഞ്ഞമ്മയ്ക്ക് മിന്നും ജയം

തലസ്ഥാന നഗരിയിലെ ബിജെപിയുടെ  പ്രകടനത്തെ അഭിനന്ദിച്ച തരൂർ, ഈ വിജയം "നിർണ്ണായകമായ രാഷ്ട്രീയ മാറ്റമാണ്" സൂചിപ്പിക്കുന്നതെന്നും അഭിപ്രായപ്പെട്ടു. എൽഡിഎഫിന്റെ ദുർഭരണത്തിനെതിരെയായിരുന്നു താൻ പ്രചാരണം നടത്തിയതെന്നും, എന്നാൽ ജനങ്ങൾ മറ്റൊരു പാർട്ടിയെ തിരഞ്ഞെടുത്തെന്നും തരൂർ വ്യക്തമാക്കി. ഇത്, എൽഡിഎഫ് വിരുദ്ധ വോട്ടുകൾ യുഡിഎഫിലേക്ക് എത്തിക്കുന്നതിൽ താൻ പരാജയപ്പെട്ടു എന്നതിനേക്കാൾ, ബിജെപിക്ക് അനുകൂലമായ രാഷ്ട്രീയ മാറ്റത്തെ ശശി തരൂർ സ്വാഗതം ചെയ്യുന്ന തരത്തിലുള്ള പ്രതികരണമായി പല കോൺഗ്രസ് നേതാക്കളും ചൂണ്ടിക്കാണിക്കുന്നു.

ALSO READ: തദ്ദേശ തെരഞ്ഞെടുപ്പ് ഫലം ജനങ്ങള്‍ക്ക് യുഡിഎഫിലുള്ള വിശ്വാസത്തിന് തെളിവ്; കേരള ജനതയ്ക്ക് നന്ദി; രാഹുല്‍ ഗാന്ധി

കോൺഗ്രസ് നേതാവായിരിക്കെ, പ്രധാന രാഷ്ട്രീയ എതിരാളിയായ ബിജെപിയുടെ വിജയത്തെ പരസ്യമായി അഭിനന്ദിച്ചതിലൂടെ, തരൂർ സ്വന്തം പാർട്ടിയുടെ നിലപാടിന് വിരുദ്ധമായി പ്രവർത്തിച്ചെന്ന വിമർശനമാണ് ശക്തമാകുന്നത്.

യുഡിഎഫിന്റെ പ്രകടനത്തെ അഭിനന്ദിക്കാനും തരൂർ മറന്നില്ല. 2020-നേക്കാൾ മെച്ചപ്പെട്ട പ്രകടനമാണ് ഇത്തവണ കാഴ്ചവെച്ചതെന്നും, ഇത് കഠിനാധ്വാനത്തിന്റെയും ഭരണവിരുദ്ധ വികാരത്തിന്റെയും ഫലമാണെന്നും അദ്ദേഹം പറഞ്ഞു. "നിയമസഭാ തെരഞ്ഞെടുപ്പിലേക്കുള്ള വലിയൊരു സൂചനയാണ് ഈ ഫലം" എന്നും തരൂർ കൂട്ടിച്ചേർത്തു.

ALSO READ: തദ്ദേശ തെരഞ്ഞെടുപ്പ്: സംസ്ഥാനത്തുടനീളം യു.ഡി.എഫിന് 'കൈ'യടി, എൽഡിഎഫിന് കനത്ത പ്രഹരം; ഇനി കണ്ണ് നിയമസഭയിലേക്ക്

കോർപ്പറേഷൻ നിലവിൽ യുഡിഎഫ് 19 സീറ്റുകളുമായി മൂന്നാം സ്ഥാനത്ത് ഒതുങ്ങിയ സാഹചര്യത്തിൽ, "മെച്ചപ്പെട്ട പ്രകടനം" എന്ന് പറഞ്ഞ് തരൂർ നടത്തിയത് ആത്മപരിശോധനയില്ലാത്ത സ്വയം പുകഴ്ത്തലാണോ എന്ന ചോദ്യവും ഉയരുന്നുണ്ട്.

തെരഞ്ഞെടുപ്പ് ഫലം അനുസരിച്ച് തിരുവനന്തപുരത്ത് ബിജെപി 50 സീറ്റുകൾ നേടി ഒന്നാം സ്ഥാനത്തെത്തിയപ്പോൾ, എൽഡിഎഫ് 29 സീറ്റുകളോടെ രണ്ടാം സ്ഥാനത്തും, യുഡിഎഫ് 19 സീറ്റുകളുമായി മൂന്നാം സ്ഥാനത്തുമാണ് എത്തിച്ചേർന്നത്.

തോൽവിക്ക് പിന്നാലെ സിപിഐഎമ്മിൽ പൊട്ടിത്തെറി

തോൽവിക്ക് പിന്നാലെ സിപിഐഎമ്മിൽ രൂക്ഷമായ പൊട്ടിത്തെറികൾ ഉണ്ടാകുന്നതും തലസ്ഥാനത്തെ ശ്രദ്ധേയമായ സംഭവമാണ്. മുൻ മേയർ ആര്യ രാജേന്ദ്രനെതിരെ രൂക്ഷ വിമർശനവുമായി വനിതാ നേതാവ് ഗായത്രി ബാബു രംഗത്തെത്തി. "പാർട്ടിയേക്കാൾ വലുതാണെന്ന ഭാവം," "അധികാരപരമായി തന്നേക്കാൾ താഴ്ന്നവരോടുള്ള പുച്ഛം," തുടങ്ങിയ വാക്കുകളിലൂടെയായിരുന്നു വിമർശനം.

ഈ ആഭ്യന്തര കലഹം എൽഡിഎഫിനെ പ്രതിരോധത്തിലാക്കുമ്പോൾ, ബിജെപിക്ക് ആശംസകൾ നേർന്ന് തരൂർ നടത്തിയ പ്രസ്താവന യുഡിഎഫ് എന്ന നിലയിൽ രാഷ്ട്രീയ നേട്ടം മുതലെടുക്കുന്നതിൽ കോൺഗ്രസ് എംപിക്ക് സംഭവിച്ച പിഴവാണോ എന്നും വിലയിരുത്തപ്പെടുന്നു.

Congress MP Shashi Tharoor lauded the BJP's win in Thiruvananthapuram, a position seen as damaging to the UDF coalition.