തിരുവനന്തപുരം: തിരുവനന്തപുരം കോര്‍പറേഷനിലെ തോല്‍വിയിലെ വിമര്‍ശനങ്ങള്‍ക്ക് മറുപടിയുമായി മേയര്‍ ആര്യ രാജേന്ദ്രന്‍. ഒരിഞ്ച് പോലും പിന്നോട്ടില്ല(not an inch back) എന്നെഴുതിയ വാട്‌സ്ആപ്പ് സ്റ്റാറ്റസിലൂടെയാണ് വിമര്‍ശനങ്ങള്‍ക്ക് ആര്യാ രാജേന്ദ്രന്‍ മറുപടി നല്‍കിയത്. 

നേരത്തെ, മേയര്‍ ആര്യാ രാജേന്ദ്രന് എതിരേ രൂക്ഷവിമര്‍ശനവുമായി മുന്‍ കൗണ്‍സിലര്‍ ഗായത്രി ബാബു രംഗത്തെത്തിയിരുന്നു. കരിയര്‍ വളര്‍ത്താനുള്ള കോക്കസായി ഓഫിസിനെ കണ്ടെന്നും പാര്‍ട്ടിയെക്കാള്‍ വലുതെന്ന ഭാവമായിരുന്നെന്നും കൗണ്‍സിലിലെ ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ കൂടിയായിരുന്ന ഗായത്രി ബാബു ഫേസ്ബുക്കില്‍ കുറിച്ചു. പേര് പരാമര്‍ശിക്കാതെയായിരുന്നു വിമര്‍ശനം.

ALSO READ: 'പാര്‍ട്ടിയേക്കാള്‍ വലുതാണെന്ന ഭാവവും തന്നെക്കാള്‍ താഴ്ന്നവരോടുള്ള പുച്ഛവും'; മേയര്‍ ആര്യാ രാജേന്ദ്രനെതിരെ സി.പി.എം കൗണ്‍സിലര്‍

വിവാദമായതിന് പിന്നാലെ പോസ്റ്റ് പിന്‍വലിച്ചു. ചിലര്‍ക്ക് തന്നെക്കാള്‍ താഴ്ന്നവരോട് പുച്ഛമാണ്. കാണാന്‍ പുറത്ത് കാത്തുനിന്നിരുന്നവരെ പോലും കണ്ടില്ല. പ്രാദേശിക നേതാക്കളുടെയോ സഖാക്കളുടെയോ ആവശ്യങ്ങള്‍ പരിഗണിച്ചില്ല. കഴിഞ്ഞ അഞ്ചുവര്‍ഷം കൊണ്ട് എല്‍.ഡി.എഫിന്റെ ജനകീയത ഇല്ലാതാക്കി. അടിസ്ഥാനപരമായ കാര്യങ്ങള്‍ അവഗണിച്ചു. ഇവയെല്ലാം ഒഴിവാക്കിയിരുന്നെങ്കില്‍ കനത്തിലാകുമായിരുന്നില്ല തിരിച്ചടിയെന്നും പോസ്റ്റിലുണ്ട്.

അതേസമയം, ഗായത്രി ബാബുവിനെ തള്ളി മന്ത്രി വി. ശിവന്‍കുട്ടി രംഗത്തെത്തിയിരുന്നു. ഗായത്രി ബാബുവിന്റേത് വ്യക്തിപരമായ അഭിപ്രായമാണെന്നും ആര്യയുടെ പ്രവര്‍ത്തനത്തെക്കുറിച്ച് ഒരു പരാതിയും പാര്‍ട്ടിക്ക് ലഭിച്ചിട്ടില്ല എന്നുമായിരുന്നു മന്ത്രി പറഞ്ഞത്. ഗായത്രിയുടെ പരാമര്‍ശം പാര്‍ട്ടി പരിശോധിക്കുമെന്നും മന്ത്രി വ്യക്തമാക്കിയിരുന്നു.

Thiruvananthapuram Mayor Arya Rajendran has responded to criticism following the Corporation election setback by posting a WhatsApp status stating “Not an inch back,” signalling that she will not retreat in the face of attacks.