ദുബൈ: യുഎഇയിൽ ഉടനീളം കനത്ത മഴ തുടരുന്നു. രാജ്യത്ത് ഇന്ന് ആരംഭിച്ച അസ്ഥിരമായ കാലാവസ്ഥ ഡിസംബർ 19, വെള്ളിയാഴ്ച വരെ നീണ്ടുനിൽക്കുമെന്ന് കാലാവസ്ഥാ നിരീക്ഷകർ മുന്നറിയിപ്പ് നൽകി. മേഖലയിൽ തുടരുന്ന ന്യൂനമർദ്ദം കാരണം രാജ്യത്തുടനീളം ശക്തമായ മഴയും ഇടിമിന്നലുമാണ് അനുഭവപ്പെടുന്നത്. ഈ സാഹചര്യത്തിൽ, അധികൃതർ യെല്ലോ, ഓറഞ്ച് അലേർട്ടുകൾ പ്രഖ്യാപിക്കുകയും പൊതുജനങ്ങളോട് അതീവ ജാഗ്രത പാലിക്കാൻ നിർദ്ദേശിക്കുകയും ചെയ്തിട്ടുണ്ട്.

കനത്ത മഴ തുടരുന്നു

ദുബൈ, അബൂദബി, അൽ ഐൻ, ഷാർജ, റാസൽഖൈമ എന്നിവിടങ്ങളിൽ ഇന്ന് ശക്തമായ മഴ രേഖപ്പെടുത്തി. ഉപരിതലത്തിലെയും മുകളിലെ വായുവിലെയും ന്യൂനമർദ്ദങ്ങളുടെ സംയോജനമാണ് വ്യാപകമായ മഴയ്ക്ക് കാരണമായതെന്ന് കാലാവസ്ഥാ നിരീക്ഷകർ ചൂണ്ടിക്കാണിക്കാട്ടി. ഷാർജയുടെ മധ്യമേഖലകളായ നിസ്‌വ, ഫിലി എന്നിവിടങ്ങളിൽ 'അൽ ബഷായർ ലോ' എന്നറിയപ്പെടുന്ന കാലാവസ്ഥാ വ്യവസ്ഥയുടെ ഭാഗമായി കനത്ത മഴ പെയ്തു. ഇടിമിന്നൽ, ആലിപ്പഴ വർഷം, ശക്തമായ കാറ്റ് എന്നിവ വരും ദിവസങ്ങളിലും പ്രതീക്ഷിക്കാം. കൂടാതെ, ചില പ്രദേശങ്ങളിൽ പൊടിക്കാറ്റു കാരണം ദൃശ്യപരത വലിയ തോതിൽ കുറയാനും സാധ്യതയുണ്ട്.

ALSO READ: യു.എ.ഇയില്‍ മഴയിലോ മൂടല്‍മഞ്ഞിലോ ഫോട്ടോ എടുക്കാന്‍ നില്‍ക്കേണ്ട; 800 ദിര്‍ഹം വരെ പിഴ ലഭിച്ചേക്കും  

സുരക്ഷാ മാർഗ്ഗനിർദ്ദേശങ്ങൾ: അധികൃതർ കർശന നിർദ്ദേശം നൽകി

അടിയന്തര സാഹചര്യങ്ങൾ കണക്കിലെടുത്ത് ആഭ്യന്തര മന്ത്രാലയം, റാസൽഖൈമ പൊലിസ്, നാഷണൽ സെന്റർ ഓഫ് മെറ്റീരിയോളജി (NCM) എന്നിവർ പൊതുജനങ്ങൾക്ക് കർശന സുരക്ഷാ മാർഗ്ഗനിർദ്ദേശങ്ങൾ നൽകി.

വഴുക്കലുള്ള റോഡുകളിൽ വേഗത കുറച്ച് ഓടിക്കണമെന്നും മറ്റു വാഹനങ്ങളിൽ നിന്ന് സുരക്ഷിതമായ അകലം പാലിക്കണമെന്നും ഡ്രൈവർമാരോട് അധികൃതർ നിർദ്ദേശിച്ചിട്ടുണ്ട്. ദൃശ്യപരത കുറയുമ്പോൾ വാഹനങ്ങളുടെ ഹെഡ്‌ലൈറ്റുകൾ നിർബന്ധമായും ഉപയോഗിക്കണം. സുരക്ഷിതമായ ഡ്രൈവിംഗിനായി NCM മാർഗ്ഗനിർദ്ദേശങ്ങൾ പുറത്തിറക്കിക്കിയിട്ടുണ്ട്. 

അസ്ഥിരമായ കാലാവസ്ഥയുടെ സമയത്ത് ബീച്ചുകളിൽ നിന്നും സമുദ്ര പ്രവർത്തനങ്ങളിൽ നിന്നും പൊതുജനങ്ങൾ വിട്ടുനിൽക്കണം. ജീവനും സ്വത്തിനും സംരക്ഷണം നൽകുന്നതിനായി, താഴ്‌വരകളും വെള്ളക്കെട്ടുള്ള പ്രദേശങ്ങളും ഒഴിവാക്കുകയും അധികാരികൾ നൽകുന്ന എല്ലാ അടിയന്തര നിർദ്ദേശങ്ങളും പാലിക്കുകയും ചെയ്യേണ്ടത് അനിവാര്യമാണ്. സ്ഥിരീകരിക്കാത്ത വിവരങ്ങളോ കിംവദന്തികളോ പ്രചരിപ്പിക്കുന്നത് ഒഴിവാക്കണമെന്നും അധികൃതർ അഭ്യർത്ഥിച്ചു.

യുഎഇയിലെ താമസക്കാരും സന്ദർശകരും ഡിസംബർ 19 വരെ അതീവ ജാഗ്രതയോടെ ഇരിക്കണമെന്നും ബന്ധപ്പെട്ട അധികാരികളുടെ അറിയിപ്പുകൾ കൃത്യമായി പിന്തുടരണമെന്നും മന്ത്രാലയം വ്യക്തമാക്കി.

THE UAE HAS ISSUED SEVERE RAIN WARNINGS, WITH YELLOW AND ORANGE ALERTS IN PLACE UNTIL FRIDAY. RESIDENTS ARE ADVISED TO STAY CAUTIOUS AS INTENSE RAINFALL IS EXPECTED. AUTHORITIES ARE URGING THE PUBLIC TO FOLLOW SAFETY MEASURES TO AVOID POTENTIAL HAZARDS CAUSED BY HEAVY RAINS AND FLOODING.