ദുബൈ: ദുബൈയിലെ അതിവേഗം വളരുന്ന റെസിഡൻഷ്യൽ, വികസന മേഖലകളിലെ യാത്രാദുരിതത്തിന് അറുതി വരുത്തിക്കൊണ്ട്, ഷെയ്ഖ് സായിദ് ബിൻ ഹംദാൻ അൽ നഹ്യാൻ സ്ട്രീറ്റും അൽ അവീർ റോഡും അൽ മനാമ സ്ട്രീറ്റും തമ്മിലുള്ള പ്രധാന കവല നവീകരിക്കുന്നതിനുള്ള കരാർ നൽകി റോഡ്സ് ആൻഡ് ട്രാൻസ്‌പോർട്ട് അതോറിറ്റി (RTA).

ഗതാഗതക്കുരുക്ക് ലഘൂകരിക്കുന്നതിനും, ദുബൈയിലെ നഗര വികാസത്തിനും ജനസംഖ്യാ വളർച്ചയ്ക്കും അനുസൃതമായി ഗതാഗതം മെച്ചപ്പെടുത്തുന്നതിനുമുള്ള ആർടിഎയുടെ വിശാലമായ ശ്രമങ്ങളുടെ ഭാഗമാണിത്. 2,300 മീറ്റർ നീളമുള്ള പാലങ്ങളുടെ നിർമ്മാണം, പാതകൾ വീതി കൂട്ടൽ, സർവീസ് റോഡുകളുടെ വികസനം, പുതിയ പ്രവേശന, എക്സിറ്റ് പോയിന്റുകൾ എന്നിവയും പദ്ധതിയിൽ ഉൾപ്പെടുന്നു.

ALSO READ: ദുബൈ മെട്രോ ബ്ലൂ ലൈൻ റൂട്ട് മാപ്പ് പുറത്തിറക്കി ആർടിഎ; 2029-ൽ പ്രവർത്തനം ആരംഭിക്കും 

യാത്രാ സമയം കുത്തനെ കുറയും

2028-ന്റെ മൂന്നാം പാദത്തിൽ പദ്ധതി പൂർത്തിയാകുമ്പോൾ, റോഡിന്റെ കാര്യശേഷി മണിക്കൂറിൽ 5,200 വാഹനങ്ങളിൽ നിന്ന് മണിക്കൂറിൽ 14,400 വാഹനങ്ങളായി വർദ്ധിക്കും. കൂടാതെ, ഈ പ്രധാന ഇടനാഴിയിലൂടെയുള്ള യാത്രാ സമയം 20 മിനിറ്റിൽ നിന്ന് കേവലം അഞ്ച് മിനിറ്റായി കുറയുമെന്നും ആർടിഎ അധികൃതർ അറിയിച്ചു.

ദുബൈ സിലിക്കൺ ഒയാസിസ്, അക്കാദമിക് സിറ്റി, ഗ്ലോബൽ വില്ലേജ് ഉൾപ്പെടെ 600,000-ത്തിലധികം താമസക്കാർക്ക് പ്രയോജനകരമാകുന്ന ഈ പദ്ധതി, ​ഗതാ​ഗതം വേ​ഗത്തിലാക്കുന്നതിനുള്ള ആർടിഎയുടെ മാസ്റ്റർ പ്ലാനിന്റെ ഭാഗമാണെന്ന് ആർടിഎ ഡയറക്ടർ ജനറൽ മതാർ അൽ തായർ പറഞ്ഞു.

ഷെയ്ഖ് സായിദ് ബിൻ ഹംദാൻ അൽ നഹ്യാൻ സ്ട്രീറ്റിന്റെയും അൽ അവീർ റോഡിന്റെയും കവലയിലെ നിലവിലുള്ള റൗണ്ട് എബൗട്ട്, എല്ലാ ദിശകളിലേക്കും സ്വതന്ത്ര ഗതാഗതം അനുവദിക്കുന്നതിനായി ഗ്രേഡ്-സെപ്പറേറ്റഡ് ഇന്റർചേഞ്ചായി മാറ്റും. ഷെയ്ഖ് സായിദ് ബിൻ ഹംദാൻ അൽ നഹ്യാൻ സ്ട്രീറ്റിൽ ഓരോ ദിശയിലേക്കും നാല് വരികളുള്ള പ്രധാന പാലങ്ങളും, വലത്തോട്ടും ഇടത്തോട്ടും തിരിയുന്നതിനുള്ള റാമ്പുകളും ഇതിന്റെ ഭാഗമായി നിർമ്മിക്കും.

അൽ അവീറിലേക്കും ഷാർജയിലേക്കുമുള്ള ഗതാഗതം സുഗമമാക്കുന്നതിനായി അൽ അവീർ റോഡും എമിറേറ്റ്സ് റോഡും തമ്മിലുള്ള കവലയിൽ ഒരു പാലവും നിർമ്മിക്കും. അൽ മനാമ സ്ട്രീറ്റുമായുള്ള കവലയിലെ റോഡുകൾ നവീകരിക്കുകയും, ഷെയ്ഖ് സായിദ് ബിൻ ഹംദാൻ അൽ നഹ്യാൻ സ്ട്രീറ്റ് രണ്ട് വരികളിൽ നിന്ന് നാല് വരികളായി വീതി കൂട്ടുകയും ചെയ്യും.

dubai authorities announced the upgrade of sheikh zayed bin hamdan street to ease traffic congestion. the project is expected to reduce travel time to just five minutes, improve traffic flow, and enhance road safety. the development supports dubai’s smart mobility goals and growing urban infrastructure needs.