ഡല്‍ഹി: അര്‍ജന്റീന സൂപ്പര്‍താരം ലയണല്‍ മെസ്സി ഇന്ന് ഡല്‍ഹിയില്‍. ഡല്‍ഹിയില്‍ എത്തുന്ന മെസ്സി പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തും. തുടര്‍ന്ന് ചീഫ് ജസ്റ്റിസുമായും സൈനിക മേധാവിയുമായും കൂടിക്കാഴ്ച നടത്തും. 

പിന്നാലെ അരുണ്‍ ജെയ്റ്റ്ലി സ്റ്റേഡിയത്തില്‍ വച്ച് നടക്കുന്ന സെലിബ്രിറ്റി ഫുട്‌ബോള്‍ മത്സരത്തിലും മെസ്സി പന്ത് തട്ടും. കൊല്‍ക്കത്ത, ഹൈദരാബാദ് മുംബൈ എന്നിവിടങ്ങളിലെ സന്ദര്‍ശനത്തിന് ശേഷമാണ് മെസ്സി ഡല്‍ഹിയില്‍ എത്തുന്നത്. ഇന്ത്യ ടൂറിന്റെ അവസാന ദിവസം ഫിറോസ്ഷാ കോട്ല സ്റ്റേഡിയത്തില്‍ ഇന്ത്യന്‍ ക്രിക്കറ്റ് ടീമിലെ രണ്ട് അംഗങ്ങളുമായി മെസ്സി ആശംസകള്‍ കൈമാറുകയും ചെയ്യുമെന്നും റിപ്പോര്‍ട്ടുകള്‍ പറയുന്നു. 

സുവാരസും റോഡ്രിഗോ ഡി പോളും മെസ്സിക്കൊപ്പമുണ്ട്. ഇന്നലെ മുംബൈയിലെ ചടങ്ങില്‍ സച്ചിന്‍ തന്റെ പത്താം നമ്പര്‍ ജഴ്സി മെസ്സിക്ക് സമ്മാനിച്ചിരുന്നു. ഡല്‍ഹിയിലെ പരിപാടിക്ക് ശേഷം മെസ്സി നാട്ടിലേക്ക് മടങ്ങും.

മെസ്സി രാവിലെ 10.45 നാണ് രാജ്യ തലസ്ഥാനത്ത് എത്തുക. നഗരത്തിലെ ഒരു ഹോട്ടലില്‍ 50 മിനിറ്റ് നീണ്ടുനിന്ന മീറ്റ് ആന്‍ഡ് ഗ്രീറ്റ് സെഷനുശേഷം അദ്ദേഹം പ്രധാനമന്ത്രിയുടെ വസതിയിലേക്ക് പോകും. അവിടെ അദ്ദേഹം മോദിയുമായി 20 മിനിറ്റ് സംവദിക്കും.

അദ്ദേഹത്തിന്റെ അടുത്ത സ്റ്റോപ്പ് ഒരു എംപിയുടെ വസതിയായിരിക്കും, അവിടെ അദ്ദേഹം ഇന്ത്യയിലെ അര്‍ജന്റീന അംബാസഡര്‍ മരിയാനോ അഗസ്റ്റിന്‍ കൗസിനോയെയും ചീഫ് ജസ്റ്റിസ് സൂര്യ കാന്തിനെയും കരസേനാ മേധാവി ജനറല്‍ ഉപേന്ദ്ര ദ്വിവേദിയെയും കാണുമെന്നുമാണ് റിപ്പോര്‍ട്ടുകളില്‍ പറയുന്നത്. 

അതേസമയം ബംഗാളില്‍ മെസ്സി പങ്കെടുത്ത ചടങ്ങിലെ അക്രമങ്ങള്‍ക്ക് പിന്നാലെ ബി.ജെ.പി ടിഎംസി രാഷ്ട്രീയ പോര് വീണ്ടും ശക്തമാവുകയാണ്. സ്റ്റേഡിയത്തില്‍ അക്രമം അഴിച്ചുവിട്ടത് ബി.ജെ.പി പ്രവര്‍ത്തകരാണെന്നും കാവിക്കൊടി കെട്ടി വന്നവരാണ് അക്രമങ്ങള്‍ക്ക് പിന്നിലെന്നുമാണ് ടി.എം.സി ആരോപിക്കുന്നത്. മമത സര്‍ക്കാരിന്റെ കെടുംകാര്യസ്ഥതയാണ് അക്രമങ്ങള്‍ക്ക് കാരണമെന്നാണ് ബി.ജെ.പിയുടെ വാദം.

സംഭവത്തില്‍ ജുഡീഷ്യല്‍ അന്വേഷണം വേണമെന്ന് ഗവര്‍ണര്‍ ആവശ്യപ്പെട്ടിട്ടുണ്ട്. അക്രമങ്ങളെപ്പറ്റി അന്വേഷിക്കാന്‍ സര്‍ക്കാര്‍ നിയോഗിച്ച അന്വേഷണസംഘം സ്റ്റേഡിയത്തില്‍ എത്തിയ തെളിവുകള്‍ ശേഖരിച്ചു. പരിപാടിയുടെ മുഖ്യസംഘാടകന്‍ ശതാദ്രു ദത്തയെ 14 ദിവസത്തേക്ക് പൊലിസ് കസ്റ്റഡിയില്‍ വിട്ടിരിക്കുകയാണ്.

football legend lionel messi arrives in delhi today and is scheduled to meet prime minister narendra modi, the chief justice of india, and the indian army chief during his visit.