കാസര്‍കോട്: ജില്ലയില്‍ രണ്ടു മാസത്തിനിടയില്‍ പത്ത് എച്ച്.ഐ.വി ബാധിര്‍ മരിച്ച സംഭവത്തില്‍ അടിയന്തിര നടപടികള്‍ സ്വീകരിക്കാന്‍ സംസ്ഥാന മനുഷ്യാവകാശ കമ്മിഷന്‍ ആരോഗ്യ വകുപ്പ് സെക്രട്ടറിക്കു നിര്‍ദേശം നല്‍കി.  കാസര്‍കോട് ജില്ലാ കലക്ടറും നടപടി സ്വീകരിക്കണമെന്നും കമ്മിഷന്‍ നല്‍കിയ നിര്‍ദേശത്തിലുണ്ട്.
ജില്ലയിലെ ആന്റി റിട്രോവൈറല്‍ തെറാപ്പി സെന്ററില്‍ വിദഗ്ദ ഡോക്ടര്‍മാരുടെ അഭാവം നേരിടുന്നതു കാരണം ചികിത്സ നിഷേധിക്കുന്നതായാണു പരാതി. അഞ്ചുമാസമായി പോഷകാഹാര വിതരണവും നടക്കുന്നില്ല. 970 എച്ച്.ഐ.വി ബാധിതര്‍ ജില്ലയിലുണ്ട്.  ആഴ്ചയിലൊരിക്കല്‍ ഇവര്‍ക്ക് ഡോക്ടറെ കാണേണ്ടതുണ്ട്. ഇതും സാധ്യമാക്കണമെന്ന് കമ്മിഷന്‍ നിര്‍ദേശിച്ചു. മാധ്യമ വാര്‍ത്തകളുടെ അടിസ്ഥാനത്തില്‍ മനുഷ്യാവകാശ പ്രവര്‍ത്തകനായ ശ്രീകുമാര്‍ നൂറനാട് സമര്‍പ്പിച്ച പരാതിയിലാണ് ഉത്തരവ്.