വാഷിംഗ്ടൺ: ക്രിസ്മസ് ദിനത്തിലും രാഷ്ട്രീയ എതിരാളികൾക്കെതിരെ രൂക്ഷമായ ഭാഷയിൽ വിമർശനം ഉന്നയിച്ച് യുഎസ് പ്രസിഡന്റ് ഡോണൾഡ് ട്രംപ്. സമാധാനത്തിന്റെയും സന്തോഷത്തിന്റെയും സന്ദേശം പകരേണ്ട വേളയിലും തന്റെ സോഷ്യൽ മീഡിയ പ്ലാറ്റ്‌ഫോമായ 'ട്രൂത്ത് സോഷ്യലിലൂടെ' വിവാദ പരാമർശങ്ങളുമായാണ് ട്രംപ് രംഗത്തെത്തിയത്. രാജ്യത്തെ നശിപ്പിക്കാൻ ശ്രമിക്കുന്ന 'തീവ്ര ഇടതുപക്ഷ മാലിന്യങ്ങൾ' (Radical Left Garbage) ഉൾപ്പെടെ എല്ലാവർക്കും ക്രിസ്മസ് ആശംസകൾ നേരുന്നു എന്നായിരുന്നു ട്രംപിന്റെ കുറിപ്പ്.

ഇതൊരു ക്രിസ്മസ് ആശംസയാണോ അതോ രാഷ്ട്രീയ ആക്രമണമാണോ എന്ന ചർച്ചകൾക്ക് ട്രംപിന്റെ വാക്കുകൾ ഇതിനോടകം വഴിവെച്ചു കഴിഞ്ഞു. മുൻ വർഷങ്ങളിലേതുപോലെ തന്നെ ആഘോഷ വേളകളെ രാഷ്ട്രീയ പ്രചാരണത്തിനുള്ള വേദിയാക്കി മാറ്റുന്ന ശൈലിയാണ് ഇത്തവണയും അദ്ദേഹം സ്വീകരിച്ചത്. തന്റെ ഭരണത്തിന് കീഴിൽ രാജ്യം കൈവരിച്ച പുരോഗതികൾ എണ്ണിപ്പറഞ്ഞുകൊണ്ടായിരുന്നു ആശംസകൾ. തുറന്ന അതിർത്തികൾക്ക് അന്ത്യമായെന്നും കുടിയേറ്റക്കാർക്കെതിരെ കർശന നടപടികൾ സ്വീകരിച്ചുവെന്നും ട്രംപ് അവകാശപ്പെട്ടു. 

രാജ്യം റെക്കോർഡ് സ്റ്റോക്ക് മാർക്കറ്റ് വളർച്ചയും 4.3 ശതമാനം ജിഡിപി നിരക്കും കൈവരിച്ചുവെന്ന് അദ്ദേഹം കുറിച്ചു. പണപ്പെരുപ്പമില്ലാത്ത സാമ്പത്തിക വ്യവസ്ഥയാണ് നിലവിലുള്ളതെന്നും തന്റെ വ്യാപാര നയങ്ങൾ രാജ്യത്തിന് ട്രില്യൺ കണക്കിന് ഡോളറിന്റെ ലാഭമുണ്ടാക്കിയെന്നും ട്രംപ് അവകാശപ്പെട്ടു. കായികരംഗത്തെ ട്രാൻസ്‌ജെൻഡർ പങ്കാളിത്തം, ദുർബലമായ നിയമപാലനം എന്നിവയ്ക്ക് തന്റെ ഭരണത്തിന് കീഴിൽ അവസാനമായെന്ന് അദ്ദേഹം സന്ദേശത്തിൽ ഓർമ്മിപ്പിച്ചു.

വിവാദങ്ങളുടെ തുടർച്ച

ക്രിസ്മസ് വേളയിൽ ട്രംപ് വിവാദ പരാമർശങ്ങൾ നടത്തുന്നത് ഇതാദ്യമല്ല. 2017-ൽ എഫ്ബിഐ ഉദ്യോഗസ്ഥരെയും മാധ്യമങ്ങളെയും ലക്ഷ്യം വെച്ചായിരുന്നു വിമർശനം. കഴിഞ്ഞ വർഷം രാഷ്ട്രീയ എതിരാളികളെ 'തീവ്ര ഇടതുപക്ഷ ഭ്രാന്തന്മാർ' എന്നാണ് അദ്ദേഹം വിശേഷിപ്പിച്ചത്.

ദേശീയ സുരക്ഷയുടെ കാര്യത്തിൽ അമേരിക്ക മുമ്പെങ്ങുമില്ലാത്തവിധം കരുത്താർജ്ജിച്ചുവെന്നും ലോകരാജ്യങ്ങൾക്കിടയിൽ രാജ്യം വീണ്ടും ബഹുമാനിക്കപ്പെടുന്നുവെന്നും ട്രംപ് അവകാശപ്പെട്ടു. 'ദൈവം അമേരിക്കയെ അനുഗ്രഹിക്കട്ടെ' എന്ന വാചകത്തോടെയാണ് അദ്ദേഹം തന്റെ വിവാദ ക്രിസ്മസ് സന്ദേശം അവസാനിപ്പിച്ചത്.

u.s. president donald trump has sparked controversy with a christmas message that combined holiday greetings with sharp political attacks. in a post on truth social, he wished a merry christmas to everyone, including those he called "radical left scum" who he claimed are trying to destroy the country. trump used the festive occasion to boast about economic growth, record stock market numbers, and his border policies, turning a traditional holiday wish into a platform for political battle.