ന്യൂഡല്‍ഹി: രാജ്യത്ത് വീണ്ടും ആള്‍ക്കൂട്ടക്കൊല. ബംഗ്ലാദേശിയെന്ന് പറഞ്ഞ് ആള്‍ക്കൂട്ടം 30കാരനെ അടിച്ചു കൊല്ലുകയായിരുന്നു. വ്യാഴാഴ്ച ഒഡിഷയിലെ സംഭല്‍പൂര്‍ ജില്ലയിലാണ് സംഭവം. രണ്ട് പേര്‍ക്ക് പരുക്കേറ്റു. 

 പശ്ചിമ ബംഗാളില്‍ നിന്നുള്ള ജവല്‍ ശൈഖ് ആണ് കൊല്ലപ്പെട്ടത്. ബംഗാളില്‍ നിന്ന് കണ്‍സ്ട്രക്ഷന്‍ വര്‍ക്ക് ചെയ്യാനാണ് ഇവര്‍ ഒഡിഷയിലെത്തിയത്. ജോലി കഴിഞ്ഞ വരുന്നതിനിടെ ആറ് പേര്‍ ചേര്‍ന്ന് ഇവരെ തടഞ്ഞ് നിര്‍ത്തി ബീഡി ആവശ്യപ്പെട്ടു. തുടര്‍ന്ന് ആധാര്‍ കാര്‍ഡ് നല്‍കാനും ആവശ്യപ്പെട്ടു. പിന്നാലെ സംഘം തൊഴിലാളികളെ ആക്രമിക്കുകയായിരുന്നു.  ആക്രമണത്തില്‍ ജുവല്‍ ശൈഖിന്റെ തലക്കാണ് പരിക്കേറ്റത്. പരുക്കേറ്റ മറ്റ് രണ്ട് പേര്‍ ചികിത്സയിലാണ്.

ALSO READ: മധ്യപ്രദേശ് ബി.ജെ.പി നേതാവിന്റെ മകന്‍ പ്രതിയായ ബലാത്സംഗക്കേസിലെ അതിജീവിത ആത്മഹത്യക്ക് ശ്രമിച്ചു;  നിരന്തരമായി ഭീഷണിപ്പെടുത്തുന്നുവെന്ന് ആത്മഹത്യാകുറിപ്പ്

പ്രതികളെന്ന് സംശയിക്കുന്ന ആറ് പേരെ പൊലിസ് അറസ്റ്റ് ചെയ്തു. ബീഡി ചോദിച്ചപ്പോള്‍ നല്‍കാത്തതാണ് കൊലപാതകത്തിലെത്തിച്ചതെന്നാണ് പൊലിസ് പറയുന്നത്. തൊഴിലാളികള്‍ ഏഴ് വര്‍ഷമായി ഇവിടെ താമസിക്കുന്നവരാണെന്നും ഇവര്‍ക്ക് അക്രമികളെ പരിചയമുണ്ടായിരുന്നെന്നും പൊലിസ് കൂട്ടിച്ചേര്‍ത്തു.

സംഭവത്തില്‍ തൃണമൂല്‍ കോണ്‍ഗ്രസ് ബി.ജെ.പിയെ കുറ്റപ്പെടുത്തി. ബംഗാളികള്‍ക്ക് നേരെയുള്ള ബി.ജെ.പിയുടെ വിദ്വേഷ ക്യാംപയിനുകളാണ് അക്രമത്തിന് കാരണമായതെന്ന് തൃണമൂല്‍ കോണ്‍ഗ്രസ് വിമര്‍ശിച്ചു. ബി.ജെ.പി ഭരിക്കുന്ന സംസ്ഥാനത്താണ് ഇങ്ങനെ സംഭവിച്ചതെന്നും കൂട്ടിച്ചേര്‍ത്തു. ബംഗാളികളെ നുഴഞ്ഞുകയറ്റക്കാരായി ബി.ജെ.പി ചിത്രീകരിച്ചതിനെ ഫലമാണ് തെരുവുകളില്‍ അരങ്ങേറുന്നതെന്നും അവര്‍ ആവര്‍ത്തിച്ചു.

a 30-year-old construction worker from west bengal was lynched by a mob in odisha’s sambalpur district after being suspected as bangladeshi. six accused have been arrested.