തിരുവനന്തപുരം: എസ്.ഐ.ആര്‍ കരട് പട്ടികയിലെ ബൂത്ത് പുനഃക്രമീകരണ പാളിച്ചകള്‍ പരിഹാരിക്കുമെന്ന് മുഖ്യ തെരഞ്ഞെടുപ്പ് ഓഫീസര്‍. ഫാമിലി ഗ്രൂപ്പിങ് നടത്തി അന്തിമ പട്ടികക്ക് മുന്‍പ് പ്രശ്‌നം പരിഹരിക്കുമെന്ന് മുഖ്യ തെരഞ്ഞെടുപ്പ് ഓഫീസര്‍ രത്തന്‍ യു ഖേല്‍ക്കര്‍ പറഞ്ഞു. എസ്.ഐ.ആറിന് സമാന്തരമായി ധൃതിപിടിച്ച് ബൂത്ത് പുനഃക്രമീകരണം നടത്തിയത് വലിയ വിവാദങ്ങള്‍ക്ക് കാരണമായിത്തീര്‍ന്നിരുന്നു. 

ഒരു കുടുംബത്തിലെ വോട്ടര്‍മാര്‍ക്ക് പല ബൂത്തുകളിലാണ് വോട്ട്. ഒരേ ബൂത്തില്‍ തന്നെ കുടുംബാംഗങ്ങള്‍ പലയിടത്തായ കേസുകളും റിപ്പോര്‍ട്ട് ചെയ്തിരുന്നു. നിയമസഭാ തെരഞ്ഞെടുപ്പ് മുന്നില്‍ കണ്ട് ഓരോ ബൂത്തിലെയും വോട്ടര്‍മാരുടെ എണ്ണം 1100 നും 1150നും മധ്യേ നിജപ്പെടുത്തിയതാണ് പ്രതിസന്ധിക്ക് കാരണമായത്. ഭൂമിശാസ്ത്രപരമായ അതിര്‍ത്തി നോക്കാതെ വോട്ടര്‍മാരുടെ എണ്ണം കണക്കാക്കിയതും തിരിച്ചടിയായി. 

ALSO READ: തായ്‌വാനിൽ ഒരാഴ്ചക്കിടെ രണ്ടാമത്തെ ഭൂചലനം; റിക്ടർ സ്കെയിലിൽ 7.0 തീവ്രത രേഖപ്പെടുത്തി; നാശനഷ്ടങ്ങൾ വിലയിരുത്തുന്നു 

സംസ്ഥാനത്തെ 70 ശതമാനം ബൂത്തുകളിലും 1200-1500 എന്ന നിലയിലായിരുന്നു നേരത്തെയുള്ള വോട്ടര്‍മാരുടെ എണ്ണം. ഇത് 1150ല്‍ താഴെയാക്കാനാണ് ബൂത്ത് പുനഃക്രമീകരണം നടത്തിയതെന്നാണ് തെരഞ്ഞെടുപ്പ് കമ്മീഷന്റെ വാദം. ഇതോടെ പുതുതായി 5030 ബൂത്തുകള്‍ രൂപീകരിച്ചതായും കമ്മീഷന്‍ വ്യക്തമാക്കി. 

അതേസമയം 1150ല്‍ അധികം വരുന്ന വോട്ടര്‍മാരെ പുതിയ ബൂത്തിലേക്ക് മാറ്റാന്‍ കൃത്യമായ നിര്‍ദേശമുണ്ടായിരുന്നെങ്കിലും പാലിക്കാത്തതാണ് വോട്ടര്‍മാര്‍ ചിതറി പോകാന്‍ കാരണമെന്നാണ് ആക്ഷേപമുയരുന്നത്. വോട്ടറുടെ താമസസ്ഥലത്ത് നിന്ന് രണ്ട് കിലോമീറ്റര്‍ പരിധിയിലാകണം പുതിയ ബൂത്ത്. മാറ്റുമ്പോള്‍ ഒരു കുടുംബത്തില്‍ എത്ര അംഗങ്ങളുണ്ടെങ്കിലും ഇവര്‍ എല്ലാവരും ഒരു ബൂത്തില്‍ തന്നെയാകണമെന്ന് നിര്‍ദേശമുണ്ടായിരുന്നെങ്കില്‍ പാലിച്ചില്ലെന്നാണ് ആരോപണമുയരുന്നത്.

the chief electoral officer said mistakes in booth reorganisation in the draft sir list will be fixed before the final list is published.