തിരുവനന്തപുരം: പച്ചക്കറി ഉത്പാദനത്തില്‍ സംസ്ഥാനത്തെ സ്വയം പര്യാപ്തമാക്കുമെന്ന് മുഖ്യമന്ത്രി പിണറായി വിജയന്‍ പ്രഖ്യാപിച്ചു.
കൃഷിവകുപ്പിന്റെ നേതൃത്വത്തില്‍ സംഘടിപ്പിക്കുന്ന ഓണസമൃദ്ധി 2016 വിപണന ശൃംഖലകളുടെ സംസ്ഥാനതല ഉദ്ഘാടനം പാളയത്തുളള ഹോര്‍ട്ടികോര്‍പ്പ് വിപണന കേന്ദ്രത്തില്‍ വച്ച് നിര്‍വഹിച്ച് സംസാരിക്കുകയായിരുന്നു മുഖ്യമന്ത്രി. ഉല്‍പാദന വര്‍ധനവ്, വ്യാവസായിക അടിസ്ഥാനത്തിലുള്ള ഉത്പാദനം ഇവയാണ് സര്‍ക്കാര്‍ ലക്ഷ്യം വയ്ക്കുന്ന പ്രധാനപ്പെട്ട കാര്യങ്ങള്‍.
അധികം ഉല്‍പാദിപ്പിക്കുന്ന വിഭവങ്ങള്‍ മറ്റു പ്രദേശങ്ങളില്‍ എത്തിക്കുന്നതിനുളള വിപണന ശൃംഖലകള്‍ കൂടി മെച്ചപ്പെടുത്തും. ഓരോരുത്തര്‍ക്കും ആവശ്യമുളള പച്ചക്കറികള്‍ സ്വയം ഉത്പാദിപ്പിക്കേണ്ടതാണ്. അത്തരത്തിലുളള സംസ്‌കാരം വളര്‍ന്നുവരുന്നതില്‍ സന്തോഷമുണ്ടെന്നും മുഖ്യമന്ത്രി കൂട്ടിച്ചേര്‍ത്തു. കൃഷിമന്ത്രി വി.എസ്.സുനില്‍കുമാര്‍ അധ്യക്ഷനായിരുന്ന യോഗത്തില്‍ ഫാം
ഫ്രെഷ് കേരള വെജിറ്റബിള്‍സിന്റെ ലോഗോ പ്രകാശനവും മുഖ്യമന്ത്രി നിര്‍വഹിക്കുകയുണ്ടായി.
സുരക്ഷിത പച്ചക്കറികള്‍ വിപണനം ചെയ്യുന്ന ഇക്കോഷോപ്പുകള്‍ 200 എണ്ണം ആക്കി വര്‍ധിപ്പിക്കുമെന്ന് ചടങ്ങില്‍ അധ്യക്ഷസ്ഥാനം വഹിച്ച കൃഷിമന്ത്രി വി.എസ്.സുനില്‍കുമാര്‍ പറഞ്ഞു. മൂന്നു വര്‍ഷത്തിനുളളില്‍ സംസ്ഥാനത്തെ പച്ചക്കറി ഉത്പാദനത്തില്‍ സ്വയം
പര്യാപ്തതയിലെത്തിക്കാന്‍ കഴിയും.
പച്ചക്കറി രംഗത്ത് വിവിധ ജാതി - മത സംഘടനകള്‍, രാഷ്ട്രീയ പാര്‍ട്ടികള്‍, വിദ്യാര്‍ഥി സംഘടനകള്‍, പത്രപ്രവര്‍ത്തകര്‍ എന്നിവര്‍ കാണിക്കുന്ന താല്‍പര്യം പ്രശംസനീയമാണ്. ഇത്തരത്തില്‍ കൃഷി ഏറ്റെടുക്കുന്ന സംഘടനകള്‍ക്ക് സര്‍ക്കാരിന്റെ പൂര്‍ണ്ണ പിന്തുണ ഉണ്ടാകുമെന്ന് മന്ത്രി അറിയിച്ചു.