കേരള ബ്ലാസ്റ്റേഴ്‌സ് ചരിത്രത്തിലെ ഏറ്റവും മികച്ച വിദേശ താരങ്ങളിലൊരാളായ അഡ്രിയാൻ ലൂണ ഈ സീസണിൽ ക്ലബ്ബിനായി കളിക്കില്ല. 2025-26 സീസണിൽ താരം വായ്പാടിസ്ഥാനത്തിൽ (Loan) ഒരു വിദേശ ക്ലബ്ബിലേക്ക് മാറുമെന്ന് കേരള ബ്ലാസ്റ്റേഴ്‌സ് മാനേജ്‌മെന്റ് സോഷ്യൽ മീഡിയയിലൂടെ അറിയിച്ചു.

വിടവാങ്ങൽ പരസ്പര സമ്മതത്തോടെ

ക്ലബ്ബും താരവും തമ്മിലുള്ള പരസ്പര ധാരണയുടെ അടിസ്ഥാനത്തിലാണ് ഈ നീക്കമെന്ന് ബ്ലാസ്റ്റേഴ്‌സ് വ്യക്തമാക്കി. ഐ‌എസ്എൽ നടത്തിപ്പുമായി ബന്ധപ്പെട്ട അനിശ്ചിതത്വങ്ങളും താരത്തിന്റെ വ്യക്തിപരമായ താൽപ്പര്യവുമാണ് ഈ തീരുമാനത്തിന് പിന്നിലെന്നാണ് സൂചന. 33-കാരനായ ലൂണയുടെ അഭാവം വരാനിരിക്കുന്ന സീസണിൽ ബ്ലാസ്റ്റേഴ്‌സിന് കടുത്ത തിരിച്ചടിയാകും.

മഞ്ഞപ്പടയുടെ ഉറുഗ്വേയൻ കരുത്ത്

2021 മുതൽ കേരള ബ്ലാസ്റ്റേഴ്‌സിന്റെ അഭിഭാജ്യ ഘടകമാണ് ലൂണ.ബ്ലാസ്റ്റേഴ്‌സിനായി കളിച്ച 87 മത്സരങ്ങളിൽ നിന്നായി 15 ഗോളുകളും നിരവധി അസിസ്റ്റുകളും താരം സ്വന്തമാക്കിയിട്ടുണ്ട്.ടീമിനെ പ്രതിസന്ധി ഘട്ടങ്ങളിൽ നയിക്കുന്നതിൽ ലൂണ വഹിച്ച പങ്ക് വാക്കുകൾക്ക് അതീതമാണ്.എന്നാൽ കഴിഞ്ഞ സീസണിലെ ടീമിന്റെ മോശം പ്രകടനത്തിലും ഐ‌എസ്എൽ നേരിടുന്ന സാമ്പത്തിക-ഭരണ പ്രതിസന്ധികളിലും ലൂണ അതീവ നിരാശനായിരുന്നു. ലീഗ് കൃത്യമായി നടത്തുന്നതിനായി താരം ഇന്ത്യൻ ഫുട്ബോൾ ഫെഡറേഷനോട് (AIFF) പരസ്യമായി അഭ്യർത്ഥിച്ചത് മുൻപ് വാർത്തയായിരുന്നു. നിലവിൽ വളരെ കുറഞ്ഞ ചിലവിൽ ലീഗ് നടത്താനാണ് ഫെഡറേഷൻ ആലോചിക്കുന്നത്.

ആരാധകർക്ക് കനത്ത ആഘാതം

പുതുവർഷത്തിൽ ടീമിലേക്ക് പുതിയ താരങ്ങൾ വരുമെന്ന് പ്രതീക്ഷിച്ചിരുന്ന ആരാധകർക്ക് ലൂണയുടെ വിടവാങ്ങൽ വലിയ ആഘാതമായി. "ലൂണയില്ലാത്ത ബ്ലാസ്റ്റേഴ്‌സിനെ ചിന്തിക്കാനാവില്ല" എന്നാണ് സോഷ്യൽ മീഡിയയിൽ ആരാധകരുടെ പ്രതികരണം.