കൊച്ചി: കേരള ഹൈക്കോടതിയുടെ പുതിയ ചീഫ് ജസ്റ്റിസായി ജസ്റ്റിസ് സൗമെൻ സെന്നിനെ നിയമിച്ചു. നിലവിലെ ചീഫ് ജസ്റ്റിസ് നിതിൻ ജാംദാർ വിരമിക്കുന്ന ഒഴിവിലേക്കാണ് നിയമനം. സുപ്രിംകോടതി കൊളീജിയം നൽകിയ ശുപാർശ അംഗീകരിച്ച് കേന്ദ്ര സർക്കാർ ഇതുസംബന്ധിച്ച ഉത്തരവിറക്കി.

നിലവിൽ മേഘാലയ ഹൈക്കോടതി ചീഫ് ജസ്റ്റിസ് ആയി സേവനമനുഷ്ഠിക്കുന്ന സൗമെൻ ജനുവരി 9-ന് ആണ് കേരള ഹൈക്കോടതി ചീഫ് ജസ്റ്റിസായി ചുമതലയേൽക്കുക. 2027 ജൂലൈ 27 വരെ അദ്ദേഹം ചീഫ് ജസ്റ്റിസ് പദവിയിൽ തുടരും.

കൊൽക്കത്ത സ്വദേശിയായ ജസ്റ്റിസ് സൗമെൻ സെൻ 1991-ലാണ് അഭിഭാഷകനായി ഔദ്യോഗിക ജീവിതം ആരംഭിക്കുന്നത്. നീണ്ട ഇരുപത് വർഷത്തെ സേവനത്തിന് ശേഷം 2011 ഏപ്രിൽ 13-ന് അദ്ദേഹം കൊൽക്കത്ത ഹൈക്കോടതിയിൽ ജഡ്ജിയായി നിയമിതനായി. പിന്നീട് കഴിഞ്ഞ ഓഗസ്റ്റിലാണ് മേഘാലയ ഹൈക്കോടതി ചീഫ് ജസ്റ്റിസായി അദ്ദേഹം ചുമതലയേറ്റത്.

കഴിഞ്ഞ ഡിസംബർ 18-നാണ് ജസ്റ്റിസ് സൗമെൻ സെന്നിനെ കേരള ഹൈക്കോടതിയുടെ തലപ്പത്തേക്ക് കൊണ്ടുവരാൻ സുപ്രിംകോടതി കൊളീജിയം കേന്ദ്രത്തിന് ശുപാർശ നൽകിയത്. നിലവിലെ ചീഫ് ജസ്റ്റിസ് നിതിൻ ജാംദാർ ജനുവരി ഒമ്പതിന് വിരമിക്കുന്നതോടെ പുതിയ ചീഫ് ജസ്റ്റിസ് സത്യപ്രതിജ്ഞ ചെയ്ത് അധികാരമേൽക്കും.

Justice Soumen Sen, the current Chief Justice of the Meghalaya High Court, has been appointed as the new Chief Justice of the Kerala High Court. He will officially take charge on January 9, 2026, succeeding Justice Nitin Jamdar, who is set to retire on the same day. The appointment follows a recommendation by the Supreme Court Collegium, which was recently cleared by the Central Government.