അഹമ്മദാബാദ്: വിജയ് ഹസാരെ ട്രോഫിയിൽ ജാർഖണ്ഡിനെതിരെ കേരളത്തിന് എട്ട് വിക്കറ്റിന്റെ മിന്നും വിജയം. അഹമ്മദാബാദിൽ നടന്ന മത്സരത്തിൽ ടോസ് നേടിയ ജാർഖണ്ഡ് ക്യാപ്റ്റൻ ഇഷാൻ കിഷൻ ബാറ്റിംഗ് തെരഞ്ഞെടുത്തു. ആദ്യം ബാറ്റ് വീശിയ ജാർഖണ്ഡ് 50 ഓവറിൽ ഏഴ് വിക്കറ്റ് നഷ്ടത്തിൽ 311 റൺസാണ് നേടിയത്. മറുപടി ബാറ്റിങ്ങിൽ കേരളം രണ്ട് വിക്കറ്റ് നഷ്ടത്തിൽ ലക്ഷ്യം മറികടന്നു. 

സെഞ്ച്വറി നേടിയ ക്യാപ്റ്റൻ രോഹൻ കുന്നുമ്മലിന്റെയും സഞ്ജു സാംസണിന്റെയും കരുത്തിലാണ് കേരളം വിജയിച്ചു കയറിയത്. രോഹൻ 78 പന്തിൽ 124 റൺസ് നേടിയാണ് ടീമിന്റെ ടോപ് സ്‌കോറർ ആയത്. എട്ട് ഫോറുകളും 11 സിക്സുകളും അടങ്ങുന്നതായിരുന്നു കേരള ക്യാപ്റ്റന്റെ ഇന്നിംഗ്സ്. സഞ്ജു 95 പന്തിൽ നിന്നും ഒമ്പത് ഫോറുകളും മൂന്ന് സിക്സുകളും അടക്കം 101 റൺസും നേടി വിജയത്തിൽ നിർണായകമായി. 

നേരത്തെ ആദ്യം ബാറ്റ് ചെയ്ത ജാർഖണ്ഡ് കുമാർ കുശാഗ്രയുടെ സെഞ്ച്വറിയുടെ മികവിലാണ് മികച്ച സ്കോർ നേടിയത്. 137 പന്തിൽ പുറത്താവാതെ 143 റൺസ് നേടിയാണ് താരം തിളങ്ങിയത്. എട്ട് ഫോറുകളും ഏഴ് സിക്സുകളും അടങ്ങുന്നതാണ് ഇന്നിംഗ്സ്. അനുകുൽ റോയ് അർദ്ധ സെഞ്ച്വറിയും സ്വന്തമാക്കി. നാല് ഫോറുകളും മൂന്ന് സിക്സുകളും അടക്കം 72 റൺസാണ് താരം നേടിയത്. 

Kerala registered a stunning eight-wicket win over Jharkhand in the Vijay Hazare Trophy. Kerala won on the strength of captain Rohan Kunnummal, who scored centuries, and Sanju Samson. Rohan was the team's top scorer with 124 runs off 78 balls. Sanju was instrumental in the victory by scoring 101 runs off 95 balls, including nine fours and three sixes.