അബൂദബി: ശൈത്യകാലം ആസ്വദിക്കാൻ പുറത്തിറങ്ങുന്നവർ ജാഗ്രത പാലിക്കണമെന്ന് അൽ ദഫ്ര മുനിസിപ്പാലിറ്റിയുടെ മുന്നറിയിപ്പ്. അനുമതിയില്ലാതെ ക്യാമ്പിംഗ് നടത്തുന്നവർക്കും പൊതുഇടങ്ങളിൽ നിയമലംഘനം നടത്തുന്നവർക്കുമെതിരെ കടുത്ത പിഴ ചുമത്താൻ അധികൃതർ തീരുമാനിച്ചു. പൊതുജനങ്ങളുടെ സുരക്ഷയും സൗകര്യവും ഉറപ്പാക്കുന്നതിന്റെ ഭാഗമായാണ് നടപടി.

മുനിസിപ്പാലിറ്റിയുടെ മുൻകൂർ അനുമതിയില്ലാതെ പൊതുസ്ഥലങ്ങളിൽ ഒത്തുചേരുകയോ പരിപാടികളോ സംഘടിപ്പിക്കുന്നത് ഗുരുതരമായ നിയമലംഘനമാണ്. ഇത്തരത്തിലുള്ള നിയമലംഘനങ്ങൾക്ക് ആദ്യ തവണ 10,000 ദിർഹവും രണ്ടാം തവണ 15,000 ദിർഹവും മൂന്നാം തവണ 20,000 ദിർഹവും ആയിരിക്കും പിഴ ചുമത്തുക.

പെർമിറ്റ് കാലാവധി കഴിഞ്ഞിട്ടും ക്യാമ്പിംഗ് തുടരുന്നവർക്കും ലൈസൻസ് നിബന്ധനകൾ പാലിക്കാത്തവർക്കും 3,000 മുതൽ 7,000 ദിർഹം വരെ പിഴ ഈടാക്കും.

ALSO READ: യുഎഇയിൽ 'അവധിപ്പെരുമഴ'; 2026-ൽ 9 ദിവസത്തെ വാർഷികാവധി എടുത്താൽ 38 ദിവസം ആഘോഷിക്കാം 

പൊതുജനങ്ങൾക്ക് ശല്യമുണ്ടാക്കുന്ന കുറ്റങ്ങൾ

പൊതുസ്ഥലങ്ങളിൽ മറ്റുള്ളവർക്ക് ബുദ്ധിമുട്ടുണ്ടാക്കുന്ന രീതിയിൽ പെരുമാറുന്നവർക്കെതിരെയും നടപടിയുണ്ടാകും.  പിഴ ശിക്ഷ ലഭിക്കാവുന്ന കുറ്റങ്ങൾ:

കുടുംബങ്ങൾക്കോ സ്ത്രീകൾക്കോ മാത്രമായുള്ള ഇടങ്ങളിൽ പ്രവേശിക്കൽ.

വയോധികർക്കും നിശ്ചയദാർഢ്യമുള്ളവർക്കുമായി (People of Determination) നീക്കിവെച്ചിട്ടുള്ള ഇരിപ്പിടങ്ങൾ ഉപയോഗിക്കൽ.

അനുമതിയില്ലാതെ പോസ്റ്ററുകൾ ഒട്ടിക്കുകയോ വിതരണം ചെയ്യുകയോ ചെയ്യുക.

പൊതുസ്ഥലങ്ങളിൽ ലൗഡ്‌സ്പീക്കറുകൾ ഉപയോഗിച്ച് ശബ്ദമലിനീകരണം ഉണ്ടാക്കുക.

പൊതുടാപ്പുകളിലും മറ്റും മൃഗങ്ങളെ കുളിപ്പിക്കുകയോ വസ്തുക്കൾ കഴുകുകയോ ചെയ്യുക.

റോഡുകളിലും നടപ്പാതകളിലും തടസ്സമുണ്ടാക്കുന്ന രീതിയിൽ നിൽക്കുകയോ ഇരിക്കുകയോ ചെയ്യുക.

ഈ വിഭാഗത്തിലുള്ള ലംഘനങ്ങൾക്ക് 1,000 ദിർഹം മുതൽ 4,000 ദിർഹം വരെയാണ് പിഴ.

പുകവലിക്കും തുപ്പുന്നതിനും പിഴ

പൊതുസ്ഥലങ്ങളിൽ തുപ്പുന്നതും മൂക്കിലെ സ്രവങ്ങൾ പുറന്തള്ളുന്നതും ശിക്ഷാർഹമാണ്. നിശ്ചിത സ്ഥലത്തിന് പുറത്തുള്ള പുകവലിക്കും കടുത്ത നിയന്ത്രണമുണ്ട്. 500 ദിർഹം മുതൽ 2,000 ദിർഹം വരെയാണ് ഇത്തരം കുറ്റങ്ങൾക്കുള്ള പിഴത്തുക.

ശൈത്യകാലത്ത് ഔട്ട്‌ഡോർ ആക്ടിവിറ്റികൾ വർദ്ധിക്കുന്ന പശ്ചാത്തലത്തിലാണ് മുനിസിപ്പാലിറ്റി പരിശോധനകൾ കർശനമാക്കുന്നത്. പൊതു ഇടങ്ങൾ വൃത്തിയായും സുരക്ഷിതമായും സൂക്ഷിക്കാൻ എല്ലാവരും സഹകരിക്കണമെന്ന് അധികൃതർ അഭ്യർത്ഥിച്ചു.

abu dhabi authorities have introduced stricter regulations imposing fines on individuals caught spitting or smoking in public places. the move aims to maintain cleanliness, public health, and social order, emphasizing responsibility and civic discipline among residents and visitors.