ദുബൈ: ദുബൈ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർ.ടി.എ)യുടെ വെബ്‌സൈറ്റ് വഴി മാത്രമായി നേരത്തെ ലഭ്യമായിരുന്ന ഇ സ്കൂട്ടർ റൈഡിങ് പെർമിറ്റ് അപ്ലിക്കേഷൻ സർവിസ് എല്ലാ ഔദ്യോഗിക ചാനലുകളിലും ലഭ്യമാക്കി. ഈ സേവനം ഇപ്പോൾ ആർ‌.ടി.എ ദുബൈ ആപ്ലിക്കേഷനിലേക്കും ദുബൈ നൗ ആപ്ലിക്കേഷനിലേക്കും സംയോജിപ്പിച്ചിരിക്കുന്നു. ഇത് സേവന കേന്ദ്രങ്ങൾ സന്ദർശിക്കേണ്ടതിന്റെ ആവശ്യകത ഇല്ലാതാക്കുന്നു. ലോകത്തിലെ ഏറ്റവും സ്മാർട്ടായ നഗരമായി മാറാനുള്ള ദുബൈയുടെ അഭിലാഷവുമായി പൊരുത്തപ്പെടാനും ഡിജിറ്റൽ പരിവർത്തനം ത്വരിതപ്പെടുത്താനും സേവനങ്ങളിലേക്കുള്ള ആക്‌സസ് വർധിപ്പിക്കാനും അതുവഴി ഉപയോക്താക്കളുടെ സമയവും പരിശ്രമവും ലാഭിക്കാനുമുള്ള ആർ‌.ടി.എയുടെ നിരന്തര ശ്രമങ്ങളുടെ ഭാഗമാണീ ഘട്ടം.

ആർ‌.ടി.എ ആപ്പ് വഴി ഇ സ്കൂട്ടർ റൈഡിങ് പെർമിറ്റിന് അപേക്ഷിക്കാൻ ഇപ്പോൾ ലളിതവും ഉപയോക്തൃ-സൗഹൃദപരവുമായ പ്രക്രിയ നിലവിലുണ്ട്. അപേക്ഷകർ പ്രധാന ഇ സ്കൂട്ടർ ഉപയോഗ നിയമങ്ങൾ, സുരക്ഷാ ആവശ്യകതകൾ, സുരക്ഷിത റൈഡിങ് അടിസ്ഥാന കാര്യങ്ങൾ എന്നിവ ഉൾക്കൊള്ളുന്ന ഓൺലൈൻ തിയറി ടെസ്റ്റ് പൂർത്തിയാക്കേണ്ടതുണ്ട്. ടെസ്റ്റ് വിജയിച്ചാൽ, ആർ‌.ടി.എയുടെ നിയുക്ത പ്രദേശങ്ങളിലും സ്ട്രീറ്റുകളിലും ഈ സോഫ്റ്റ് മൊബിലിറ്റി മാർഗം ഉപയോഗിക്കാൻ അപേക്ഷകർക്ക് അധികാരമുണ്ട്. ആർ‌.ടി.എയുടെ സ്മാർട്ട് ചാനലുകൾ വഴിയാണ് ഇലക്ട്രോണിക് ആയി പെർമിറ്റ് നൽകുന്നത്.

ഇ സ്കൂട്ടർ ഉപയോഗം നിയന്ത്രിക്കുക, ഗതാഗത അവബോധം വർധിപ്പിക്കുക, റോഡ് ഉപയോക്താക്കളെ സംരക്ഷിക്കുക എന്നിവ ലക്ഷ്യമിട്ടുള്ള വിപുലമായ സംരംഭങ്ങളുടെ ഒരു പാക്കേജിന്റെ ഭാഗമാണ് ഈ സേവനം. ഇ സ്കൂട്ടർ പെർമിറ്റ് ആപ്ലിക്കേഷൻ സേവനം ആർ‌.ടി.എയുടെ ഔദ്യോഗിക വെബ്‌സൈറ്റ് വഴി ലഭ്യമായതിനാൽ, ഉപയോക്താക്കൾക്ക് അവരുടെ ആവശ്യങ്ങൾക്ക് ഏറ്റവും അനുയോജ്യമായ ചാനൽ തെരഞ്ഞെടുക്കാൻ സൗകര്യപ്രദമായ ഓപ്ഷനുകൾ നൽകുന്നുവെന്നും അധികൃതർ കൂട്ടിച്ചേർത്തു.

ഇ സ്കൂട്ടർ ഉപയോക്താക്കൾ അംഗീകൃത പ്രദേശങ്ങളിൽ ഇ സ്കൂട്ടറുകൾ പ്രവർത്തിപ്പിക്കുന്നതിന് മുമ്പ് ആവശ്യമായ പെർമിറ്റ് നേടണമെന്നും പൊതുസുരക്ഷ നിലനിർത്താൻ ബാധകമായ എല്ലാ നിയമങ്ങളും ചട്ടങ്ങളും നിർദേശങ്ങളും പാലിക്കണമെന്നും ആർ‌.ടി.എയിലെ കോർപറേറ്റ് സപോർട്ട് സർവിസസ് സി.ഇ.ഒ അഹ്മദ് ഹസ്സൻ മഹ്ബൂബ് അഭ്യർഥിച്ചു.

പെർമിറ്റ് നേടാനുള്ള ഘട്ടങ്ങൾ:

1. ആർ‌.ടി.എ വെബ്‌സൈറ്റ്/ആപ്ലിക്കേഷനുകൾ ഉപയോഗിക്കുക (ആർ‌.ടി.എ ദുബൈ, ദുബൈ നൗ).

2. ലോഗിൻ ചെയ്യുക/അക്കൗണ്ട് സൃഷ്ടിക്കുക.

3. 'ഇ സ്കൂട്ടർ റൈഡിങ് പെർമിറ്റ്' എന്ന സേവനം തെരഞ്ഞെടുക്കുക.

4. ട്രാഫിക് സുരക്ഷാ നിയമങ്ങളെയും ഇ സ്കൂട്ടറുകളുടെ സുരക്ഷിത ഉപയോഗത്തെയും കുറിച്ചുള്ള നിർദേശങ്ങൾ വിലയിരുത്തി പരിശീലനം പൂർത്തിയാക്കുക.

5. ഇലക്ട്രോണിക് ടെസ്റ്റ് വിജയിക്കുക.

6. ഇമെയിൽ, ടെക്സ്റ്റ് സന്ദേശം എന്നിവ വഴി ഡിജിറ്റൽ പെർമിറ്റ് സ്വീകരിക്കുക.

പ്രധാന നിബന്ധനകളും വ്യവസ്ഥകളും:

• പ്രായം: 17 വയസും അതിൽ കൂടുതലും.

• ഇളവുകൾ: സാധുവായ യു.എ.ഇ/അന്താരാഷ്ട്ര ഡ്രൈവിങ് ലൈസൻസുള്ളവർക്ക്.

• അനുവദനീയ പ്രദേശങ്ങൾ: ഡൗൺ ടൗൺ ദുബൈ, ജുമൈറ, പാം ജുമൈറ എന്നിവയുൾപ്പെടെ നിയുക്ത സോണുകളും സമർപ്പിത ഇ സ്കൂട്ടർ ട്രാക്കുകളും.

• പിഴകൾ: പെർമിറ്റ് ഇല്ലാതെ വാഹനമോടിക്കുക, അംഗീകൃതവും അനുമതിയുള്ളതുമായ പ്രദേശങ്ങൾക്ക് പുറത്ത് പ്രവർത്തിക്കുക, അല്ലെങ്കിൽ ഹെൽമെറ്റ് ധരിക്കാതിരിക്കുക എന്നിവ ഉൾപ്പെടെയുള്ള ലംഘനങ്ങൾക്ക് പിഴ ചുമത്തും.