തിരുവനന്തപുരം: സംസ്ഥാനം വീണ്ടും തെരഞ്ഞെടുപ്പ് ചൂടിലേക്ക്. സംസ്ഥാനത്ത് നിയമസഭ തെരഞ്ഞെടുപ്പ് ഏപ്രില്‍ രണ്ടാം വാരമുണ്ടാവുമെന്നാണ് സൂചന. തെരഞ്ഞെടുപ്പ് കമ്മീഷന്‍ ഒരുക്കങ്ങള്‍ വേഗത്തിലാക്കിയിരിക്കുകയാണ്. ഇത് സംബന്ധിച്ച വിജ്ഞാപനം മാര്‍ച്ചില്‍ ഇറങ്ങിയേക്കും. മെയ് ആദ്യവാരം ഫല പ്രഖ്യാപനമുണ്ടാകും.

നാളെ മുഖ്യതെരഞ്ഞെടുപ്പ് ഓഫിസര്‍ കേന്ദ്ര തെരഞ്ഞെടുപ്പ് കമ്മീഷണറുമായി കൂടിക്കാഴ്ച നടത്തും. കേരളമടക്കം തെരഞ്ഞെടുപ്പ് നടക്കുന്ന അഞ്ച് സംസ്ഥാനങ്ങളിലെ മുഖ്യതെരഞ്ഞെടുപ്പ് ഓഫിസര്‍മാരുടെ യോഗമാണ് തിങ്കളാഴ്ച ഡല്‍ഹിയില്‍ നടക്കുന്നത്. സി.ഇ.ഒക്ക് പുറമേ തെരഞ്ഞെടുപ്പ് സുരക്ഷ ചുമതലയുള്ള എ.ഡി.ജി.പിയും പങ്കെടുക്കും.

ALSO READ: റെയിൽവേ ട്രാക്ക് ജോലികൾ: മധുര - തിരുവനന്തപുരം ഡിവിഷനുകളിൽ റൂട്ട് മാറ്റം; ഗുരുവായൂർ - ചെന്നൈ എക്‌സ്പ്രസ് കോട്ടയം വഴി സർവിസ് നടത്തും  

തെരഞ്ഞെടുപ്പ് മുന്നൊരുക്കങ്ങളുടെ ഭാഗമായി വോട്ടിങ് യന്ത്രങ്ങളുടെ സാങ്കേതിക പരിശോധന തുടങ്ങിയിട്ടുണ്ട്. 2021 ല്‍ ഏപ്രില്‍ ആറിനായിരുന്നു കേരളത്തില്‍ നിയമസഭ തെരഞ്ഞെടുപ്പ് നടന്നത്. 

അതേസമയം, 2026 ഫെബ്രുവരി 21നാണ് എസ്.ഐ.ആര്‍ അന്തിമ പട്ടിക പ്രസിദ്ധീകരിക്കുക. ഇതുപ്രകാരമാകും തെരഞ്ഞെടുപ്പ് നടക്കുക. സംസ്ഥാനത്ത് എസ്.ഐ.ആറിന് സമാന്തരമായി ബൂത്ത് പുനഃക്രമീകരണവും നടന്നിരുന്നു. ഒരു ബൂത്തില്‍ പരമാവധി 1150 പേരെ ഉള്‍പ്പെടുത്തിയാണ് പുനഃക്രമീകരിച്ചത്. ഇതുപ്രകാരം പുതുതായി വന്ന 5003 എണ്ണമടക്കം 30,044 ബൂത്തുകളാണ് ഉണ്ടാവുക.

കൊവിഡ് സാഹചര്യത്തിലായിരുന്നു കഴിഞ്ഞ തെരഞ്ഞടുപ്പ്. അതിനാല്‍ പ്രധാന ബൂത്തുകള്‍ക്ക് (25,041) പുറമേ ഓക്‌സിലറി ബൂത്തുകള്‍ (15,730) ഉള്‍പ്പെടെ 40,771 ബൂത്തുകളാണ് കഴിഞ്ഞ നിയമസഭ തെരഞ്ഞെടുപ്പിനുണ്ടായിരുന്നത്.

kerala is heading into election mode again as the state assembly election is likely to be held in the second week of april. the election commission has accelerated preparations, with notification expected in march and results likely in early may.