തൃശൂര്‍: തൃശൂര്‍ റെയില്‍വേ സ്റ്റേഷനിലെ പാര്‍ക്കിങ് ഏരിയയിലുണ്ടായ തീപിടിത്തത്തില്‍ സ്‌റ്റേഷന്‍ മാസ്റ്റര്‍ക്ക് തൃശൂര്‍ കോര്‍പറേഷന്‍ നോട്ടിസ് അയച്ചു. തീപിടിത്തമുണ്ടായ പാര്‍ക്കിംഗ് ഏരിയയില്‍ മുന്‍സിപ്പാലിറ്റി ബില്‍ഡിംഗ് നിയമങ്ങളുടെ ലംഘനമുണ്ടായെന്നാണ് കണ്ടെത്തല്‍. ഏഴ് ദിവസത്തിനകം പരിശോധന നടത്തണമെന്നും നോട്ടീസില്‍ പറയുന്നു. തീപിടിത്തത്തില്‍ 500ലേറെ ബൈക്കുകളാണ് കത്തിയമര്‍ന്നത്. അഞ്ച് ഫയര്‍ യൂണിറ്റ് ഒന്നര മണിക്കൂറിലേറെ നടത്തിയ പരിശ്രമത്തിനൊടുവിലാണ് തീ നിയന്ത്രണ വിധേയമാക്കിയത്.

ഇന്ന് രാവിലെ ആറരയോടെയാണ് തൃശ്ശൂര്‍ റെയില്‍വേ സ്റ്റേഷന്റെ രണ്ടാം ഗേറ്റിലുള്ള ബൈക്ക് പാര്‍ക്കിംഗ് കേന്ദ്രത്തില്‍ തീ പടര്‍ന്നത്. ബൈക്കുകളുടെ പെട്രോള്‍ ടാങ്ക് പൊട്ടിത്തെറിച്ചതോടെ മറ്റു ബൈക്കുകളിലേക്ക് വളരെ വേഗത്തില്‍ തീ ആളിപ്പടരുകയായിരുന്നു. മൂന്ന് ജീവനക്കാരും രക്ഷാപ്രവര്‍ത്തകരും പുറത്തേക്ക് ഇറങ്ങിയോടിയതോടെ ആളപായമുണ്ടായില്ല. 

ഒന്നര മണിക്കൂറിലേറെ നടത്തിയ പരിശ്രമത്തിനൊടുവിലാണ് തീ നിയന്ത്രണ വിധേയമായമാക്കിയത്. പാര്‍ക്കിംഗ് ഗ്രൗണ്ടിനോട് ചേര്‍ന്ന് പാളത്തില്‍ നിര്‍ത്തിയിട്ടിരുന്ന എന്‍ജിനും ഭാഗികമായി തീപിടിച്ചു. തൊട്ടടുത്ത ടിക്കറ്റ് കൗണ്ടറും തീപിടിത്തത്തില്‍ കത്തിനശിച്ചു.